13
Lema ey Menay eygo
1 Ngganemot no, genam Yohanes nemu iti go, beap ba sik so Menay pung go gemang ikum. Nemot go matu tanamon yam so, nggano wengkabui taidisonamon ey. Matu klay-klay blo nogo iramnali gemang kut-sing. Nggano, wengkabui temoy nogo Ki Wali Iram sono go suongsut semu genang, uwayang sogo sui gemang klik-sing. 2 Menay ngganemot, iseng eygo duenuduo ‘harimau’ suk so genam lo gemang ikum. Nemot go masi, don kangok go duenuduo ‘beruang’ go kalik. Nggano, nemot go lom, iseng eygo duenuduo ‘singa’ kalik.
Se ikum: Menay ngga sono Lemakupiamgo iramdemu blongdon itak gono, nemot klak go gemang suing. 3 Menay go wengkabui klaya tete sogo, kuo pung golo pegop go kalik yam so mo waluk. No, kuo ngganemot, kuet go tandali mo segoy. Ngga kalik ikum gono, kukunan sogo sikabung lo pu go, “Ya, seni so nemot naklay don dega eygo!” Ngga ey, nemot sono nemotnang gemang keng-lak. 4 Menay no blongdon Lemakupiamgo lo iti go tang so, sikabung mata so ngga ikum go, blo sono Lemakupiamgo sui iway-a gemang lelek. Seni so, ngga kalik menay go sui ngge kalik gemang i-iti, “Nando-a mot eygo ya kerlam? Mot eygo, nando-a don ey ya ip?” 5 Yang! Menay ngga go lom ba, nebleng piam golo damoy go nogo, dabuitategue ey Ki Wali Iram nogo suongsut nebut-a gemang pupung. No, ngga kalik nemot lo pupluok genang ku, yagui nangglik nesip a yam seguong so mo iti, nggano mea yam. 6 Piam go ku ngganemot no, nemot go lom ba sik sogo Ki Wali Iram nogo wayang nebut, Nemot go sui nogo, Nemot go Iramdemu nogo, nggano Kiwali yakena ba so susuing go nogo, wayang-a gemang pupung. 7 Ngga ey, Menay sono Ki Wali Iram go blung teguop sono plepung genang don gemang iti dali. Don malo gono, menay go masi ba no blung mea suing-lak, sang. Ngga kalik dali, tang-tang, saula-saula, nan-nan, nebut meno-meno, nemot go masi ba no suing genang, nemot no don mo iti. 8 Yang! Kublungkonggo sik sogo, Domba Nok tong go Kiki Sam ba no sui kua klik go sikabung-a, Menay nogo ta gemang kokong.
9-10 Yang! Nando kama gemang go, tup go ngge se mlak: boy ba no tega genang so pu go, seguaygo-babugo naklay, dok go boy ba sono mea tega. Tengang lo luk go kebong genang so pu go, but go mea kebong dali. Ngga senong go sik so, dabui lo tupduk so, Ki Wali Iram go blong duoyap-a don ey se suing.
Kukunan sik so namon tete sogo Menay inim pung go
11 Ngga ey, genam Yohanes lo ikum go, kukunan ba sik so menay meno demening go gemang pung. Nemot go matu, domba kalik namon ey. Nemot go nebut, Lemakupiamgo lo pepen go kalik gemang. 12 Menay banim go suongku no, don ey demening go menay lo ta mlak go gemang pupluok. Banim go menay kuo puit eygo sono takokong genang, kukunan sogo sikabung nemot go don lo gemang poplong. 13 Tasam-tasam dega-a, menay inim ngga lo gemang pupluok. Yang! Nemot lo pu gono, ibe damoy so, blo sik sogo koy, kuidop kalik gemang sebuk. 14 Yang! Menay banim go suongku no, tasam-tasam ngga pupluok go, kukunan sikabung ngga ikum go, nemot lo mo mlue-sing. Ngga ey, Menay inim lo pu goso, “Menay banim go, tengang lo luk go kuo puit eygo, maning go nogo, nemot suk sogo duosana-sana sikabung lo se klik!” 15 Yang! Duosana-sana yam so klik gono, Menay inim nogo don gemang iti. Don ngganemot lo, duosana-sana nebuemnebit eygo so gemang ip. Ngga ey, mea pu, “Menay banim go duosana-sana no, nando ta kua kokong go, tuk go mea leguot-sing!” 16 Tasam ngge nemot lo gabe pluok dali: kukunan sikabung, seguaygo-babugo, taut eygo-taut kuago, koybutasemu wengkabui, naklay go tasemlea ey suondon eygo no, Menay inim ngganemot lo segey gemang gang-sing. 17 Se senong: Menay go segey ey gang go sikabung-a, taut duoy logo mea idok, nggano duoy nay sogo taut nemotnang logo-a mea nay. Segey kua gang go sikabung taut duoy sogo, yakua idok go nay.
18 Ngge seni so: kunala blong eygo lo menay sogo tagu suey so i gono, mea senong. Seni so, menay ngga, sedue so pu go. Tagu so i go, b 6-6-6 so mea pen.