10
Sam seguay go iti go
1 Ngga ey, genam Yohanes nemu iti go, Kiwali yakena sik so lili go, don dega eygo Kiwali tamot meno gemang ikum. Utkenuim amka kalik pok go, nemot go wengkabui blo lo lemakuipuk go gemang ikum. Nemot go nebuemnemu, woy kalik blong ey. Ngga ey, koy nebleng eygo neguon king go kalik, masi gemang gualing. 2 Nemot go ta ba no sam seguay go rlok go, dali truk go gemang ikum. Nemot ip go, beap blo sono masi tasemlea idi-a, nan blo sono masi takali idi-a gemang gualing. 3 Ngga kalik ip gono, nebut kangok so, ‘singa’ kayang kalik nemot lo gemang tuot. Ngga ey, kukluim taidisonamon yam sogo lo nebut way gemang tenguo. 4 Se senong! Kukluim taidisonamon lo pu go nebut, seni ey gemang. Sam ba no klik sogo so genam se duduing. No, ngge kalik genam sono Kiwali yakena sik sogo nebut gemang pu, “Kukluim lo pu go nebut tup go ngga, sam ba no kua klik, no, dabui ba so se gigit!”
5 Ku ngganemot no, beap ey nan eygo blo no masi gualing go Kiwali tamot genam lo ikum go, ut sono tasemlea idi-a gemang mlak-biwon. 6 Ngga ey, Ki Wali Mani Iram, Ki Wali Kumam, ut-nan, bu-beap, mam naklay so semu go sui no, tanat go ngge kalik Kiwali tamot ngga lo gabe pu-biwon, “Mot mo senong: ku mo pung gabe. Keneng genang yakua!” 7 Se senong: taidisonamon tete sogo Kiwali tamot lo kabui tui go woy no, kekayso Ki Wali Iram go dabui ba so gigit go duduing mea pung-asiyun. Ngga Nemot go kebalisedue, senong eygo nabi-nabi no tegadi so dok-ngam go ey mo kerlam.
8 Nggano, banim go kalik, tandali genam sono, Kiwali yakena ba sik sogo nebut gabe pu, “Klong-a! Kiwali tamot, beap ey nan eygo blo no ip go ta ba sogo sam truk go ngga, se iti-nalo!” 9 Ngga ey, sam ngga iti sogo so, genam klong go, Kiwali tamot ngganemot no gemang wadong. Way so nemot lo pu go, “Iti go se dam-nalo! Lom ba nogo namseguongit kalik, tom mea tra. No, teguan ba nogo bete-a mea tra-nalo.” 10 Seni so, ta ba sik sogo sam seguay go ngganemot genam lo iti go dam go, namseguon git kalik tom kangok! No, teguan ba no yam so gut gono, kangok so bete-a gemang tra. a
11 Ngge kalik genam sono Kiwali tamot lo gabe pu, “Ki Wali Iram lo bebat go ngga, saula-saula, nebut meno-meno, nan-nan naklay, nggano iram-iram nogo, teguey genang tandali go tete nase pen-singsilo!”