Magdi nimi opsiogha (7:1-24)
7
1 Olog wameka Nuni Allah ponekori Nuh ponekoag yubu lelamogti, “Nari an kemelangkenba, nimi wamangne anabiag ot an nhonog wana porogne wamlamba, anag Nari wana piamna. Ane sembe wene andi kelabo meap kabong sobaomne nenekoag wa'alulom. 2-3 A'un kabongag wa'alapmundi lebe aroba Na Allah sembe pimnep saogne so'oag yabiropneap, a im toman yabiropneap, si a'ero wamlange kel nenge saekpare topsimendi tolongolamsimendi, Allah sembe pimnep kom saogne nhon sao nhon sao wamlange ot yemne nhon, kelne nhon topsimendi tobongkahilulam. Magdi niknibahileba ya'ag orog taikag aro amik sin babe likto pukangba, ambatkenne nene sunsunum uro ualulam. 4 Ik saekpare wapmunba, ‘Hain eptoba Nari sumbahisinge orog talul,’ aro Nari mag nubunge pelengelaneba telamlea inipna teng nhon epto naualbare talul,” aro Nuni Allahri ambarog. 5 Nuni Allahri ambarogne sunsunum uro Nuh ponekori ulamog. 
Kabong Nuhri solingkiogne sunumna ene saog uro wamog. (Sum. 6:14)
6 Mag longoro walelamogti, mog so'o niknibaog sumeneko Nuh mangkaekne hengkun-kunne 600 wamogpa uro yabiog. 7 Anam uro yabin komag Nuh poneko kelabo meap, elmabori kelaboap, “Magdi opsileag,” aro kabongag wa'iek. 8-9 Kabongag wa'ilamek abeneko Allahri lebogne sunsunum uro lebe aroba so'oag yabiropneap, im toman yabiropneap, Allah sembe pimnep saogneap, Allah sembe pimnep komneap, si sisa a'ero-a'ero kel nenge kabong anekoag yalamekpa, Nuh ponekori tobongkipsiog. 10 Kabongag tobongki agha nen ik saekpare wamekpa, mag longol alamog. 11-12 Mag longoro walelamogti, mog so'o niknilamog sum Nuh poneko mangaro yabiogne hengkun-kunne 600, wal phendepne, ae ik ko'olom tarabare sumeneko mag punguro walelamogpa, imag siba im kupto mag nubunge kuluklamog paghabog ae inipna teng nhon epto naualbare taog.
13 Mag yalamog sumeneko Nuh, elkelabo, elmabo Sem, Yafet, Ham, sin kelaboap kabong anekoag wa'iek. 14-16 Wa'iek kabong lomag anekoa, lebe aroba nimiri pia mo'osiropneap, mo'osirop komneap, mon moagti so'oag lelepto yabiropneap, im toman yabiropne ol yagneap, hain eptoba so'oag uroba kel nenge kabongag aneko yingkiropne Allahri lebogne sunsunum uro Nuh ponekori tobongkipsiogpa, kabong lomag wamek. Kabong lomag wamekpa, Allahri ina siram serekatsiog.
Magti mog so'o niknilamogha (7:17-24)
17-18 Kabong lomag wamekpa, mag aneko longoro payangkalamog paghabog ae inipna teng nhon epto naualbare taogpa, kabong aneko poa walelamog. Poa walelamogti, mag alibag yingkiogpa, pol keyaglamog. 19-20 Mag aneko maiknoro longolamogti, yim nubunge ta'aro niknilamogti, im ngang tamag waelbaogpab, mog so'o wamloa abeneko ta'aro niknibaog. 21-23 Undo unulamogti, Nuni Allahri nia mangkina hain eptopne so'oag yabiropneap, im toman yabiropneap, nimiri mo'osiropneap, peret aro yabiropneap, kelero yabiropneap, nimiap ya'ag orog nenelamsiogti, ot Nuhap kabongag aneko wa'iekneog Allahri toro pipsiog. 24 Mag longoro waelbaogne neneko lo'oe tan koma wamog paghabog ik teng lambare eptopne naual tarabare 150 talamogpa, magti ni so'o nikniamog.