Sumbaogha 1

Allahri Imap So'oap Sumbaogha Sembe

Musari Mome Toro Pibog Yubu

Allahri Imap So'oap Sumbaogha (1:1-2:3)

1 Nia mangkina wamna komag, yum-yum samenag Allahri alniro sunulamogti, imap so'oap samenag sumbaog. 2 Imap so'oap sumbaog li mog so'o eraruk wamogpa, seneragna babe sunsunum kom wamog. Sik tapto inibin sogmondo aloamogpa, magti mog so'o nikniamog. Mog so'o nikniamogpa, ot Allah Yameog mag alip toman lebe alamog. 3 Mag alip toman Allah Yame lebe alamogpa, Allahri ik selek sum eneko yubu lelamogti, “Ae mog so'o tibin tae,” seog. Tibin tae seogpa, tibin taogpa, 4 kembaogti walia uan sembaog. Walia uan sembaogti, “Tibin mo inibin mo wamdik,” aro 5 tibin aneko “Ae yo'obi,” engero pibogti, inibin aneko “Ae inipna” engero pibog.

Imbaogti, inipna selekne taogpa kwelekaogpa, 6-7 ik phendep sum eneko Allah yubu lelamogti, “Mag mombolag sip longop tangkamlangeap, paliag sip longop tangkamlangeap, a'ero-a'ero longop tangkamdik,” aro irikna phela wengero pibog. 8 Wengero pibogti, irikna phela wengero pibogne neneko “Im” si engkaogpa, imbaog.

Imbaogti, inipna phendepne taogpa kwelekaogpa, 9 ik wilindip sum eneko Allahri yubu lelamogti, “Mag im mombolag sip wamlange mo longop taleba, mog so'o mektopne lag tale,” seogpa, mag mo longop taogti, so'o mektopne lag taog. 10 Mog so'o lag taogne eneko, “so'o” engkaogti, mag longop taogne neneko Allahri, “mag nubunge laut” engkaogti, kembaogti walia uan sembaog. 11 Walia uan sembaogti, Allahri yubu lelamogti, “So'o sumbanne neneri pongoroba kal wana maubalulneap nia mangkina wana pongop talulneap a'ero wamlulba pongop tale,” seog. 12 Pongop tale seogpa, mog so'o anekori nia mangkina pongoro yabiog. Pongoro yabiogpa, Allahri kembaogti, “Walia uan,” sembaog. 13 “Walia uan,” sembaogpa imbaog.

Imbaogti, inipna wilindi taogpa kwelekaogpa, 14-15 ik tom sum eneko Allahri yubu lelamogti, “Mog so'o tibin nenenne imag warebale. Yo'obi sembe nhon, inipnag sembe nhon, ae ik a'ilinne sembe babe, heng kom tangom yag tangom anpa a'ilinne sembe babe, Na Allah omeklamneikti awi uro wamika a'ilinne sembe babe warebale,” seogne nene sik taog. 16 Tibin nenenne nubunge phende sunulamogti, yo'obi sembe tibin sirikne heng sumbaogti, inipnag sembe wal sumbaogti, imberea babe sumbaog. 17-18 “Tibin mo inibin mo wamdik,” aro yo'obiap inipnaap sembe mog so'o tibin nenena abeneko Allahri imag mebirog. Mebirogti, kembaogti, “Walia uan,” sembaog. 19 “Walia uan,” sembaogti kembaogpa, ae inipna tom sum taog.

Imbaogti, inipna tomne taogpa kwelekaogpa, 20 ik lam sum eneko Allahri yubu lelamogti, “Maghag lebe aro longol piropneap, winang im toman yabilulneap yag tale,” seog. 21 Seogti, Allahri maghag lebe aropneap, nubungeap, ologneap, winang im toman yabiropneap sumbaog. Sumbaogti kembaogti, “Walia uan,” sembaog. 22 “Walia uan,” sembaogti Allahri yubu lelamogti, “Maghag wamukangneap winang im toman yabukangneap mangap taikti, so'oag maghag imag manga pilili sumundi, so'oap maghap to'op talulom,” aro mikip nembahiog.

23 Imbaogti, inipna lamne taogpa kwelekaogpa, 24 ik no'op sum eneko Allahri yubu lelamogti, “Nia mangkina lebe aroba, nimiri pia mo'osiropneap, pia mo'osirop komneap, yan toman piropneap, mon moagti yabiropneap a'ero wamukangpa, mog so'o aneri yag nenep tale,” seogne nene sik taog. 25 Nia mangkina lebe aroba sumbaogti, kembaogti, “Walia uan,” sembaog. 26 “Walia uan,” sembaogti nen Allahri yubu lelamogti, “Wene Na nongap yameap sunsunum uro nimi sumbanun. Sindi nia mangkina lebe aroba nubunge ologne nimiri pia mo'osiropneap, pia mo'osirop komneap, maghag uropneap babe, mon magti yabiropne babe, winang babe sindi yae saelbamsukang,” seog. 27 Allahri nimi sunulamsiogti, Allah Eldamne yame sunumna sunsunum uro nimi sumbahiogne abeneko, nhon nengabo, nhon kelabo sumbahiog. 28 Sumbahiogti, sin mikip nembahiogti, sinag aruklamsiogti, “A'unap a'unag agha nimi mangaro likto pilengeap mog so'o ane to'op tamundi, saelbamlulom. A'undi lebe aroba mog so'oag maghag im toman yabiropneap nia taneko paia yae wamlulom,” aro ambatsiog. 29 “A'undi telapmunne, pongoroba wana mauropneap, kal wana mauropneap, nia mangkina yina togtopneap a'ero wamlange Nari tarelamsin. 30 Winang, nimiri pia mo'osiropneap, pia mo'osirop komneap, nia ni lebe arobari hain eptopne tanekori pongoroba ma'al agha telamukang,” wene seogne nene sik taog. 31 Allahri nia taneko sumbaogti kembaogti, “Wali sirik uro uitna,” aro sembaog. Yeng sembaogpa, imbaogti ae inipna no'opne taogpa kwelekaog.