Matius 12

Sabat sum nimiri uanepne sembe Yesusti o'oro tibin nembaogha

(Markus 2:23-28; Lukas 6:1-5)

Olog wameka, Yahudi nimiri tektek paptop sum Sabat sum taog. Sabat sum eneko Yesus eldi yubu ka'ero neleptop nangap roti sumbaneba gandum merop awe toman palamek. Palamekti kwaneng yo lelem eldi yubu ka'ero neleptop nang tanekori alniro gandum wana tagto tere palamek. 2 Tagto tere palameka Farisi nimiri ipsiekti, Yesusag yubu lelamekti, “Kembahimen! Andi yubu ka'ero neleptop nang taneri gandum wana ane tagto tobangne neneag agha Musari samenag, ‘Sabat sum eneko awe tomnep kom,’ aro mome tobog yubu phibang,” seek.

3 Wene seekpa, Yesusti samoro ambarelamsiogti, “Nunisa nubunge Daud poneko elkaboap kwaneng yo uahiogpa, uaogne sembe mome toro pairopneag agha olog kemelamlom kom te? 4 Allahri Mem Ae enekoag wa'iogpa, kwaneng roti Allah sembe pibekne taneko nimi nhondi Daud ponekoag tarogpa, Daud elkaboapti teek. Aghana kwaneng roti teekne tanekona, Musari samenag mome toro pibogne sunsunum uro, ‘Ot memnang Allah sembe palirop nangdi mo telamukang,’ aro mome toro pibog. 5 Apna memnang Allahri Mem Aeag Allah sembe palirop nangdi Sabat sum eneko ulamangne sembe Musari aruksirop yubu mome toro pibogne olog kemelamlom kom te? Sindina Allah sembe paliropne toman agha, ‘Sabat sum eneko tektek papto wamlulom,’ seogne philamangdi, Allah sembe palilamang. Allahri Mem Aeag yeplamsiangne sembe arukahiog yubu enekori, ‘Malia ulamang,’ aro lebog kom. 6 Ot nari lemnunne ka'eamlulom. Allahri Mem Ae walinge wamla aghana, nen wali phelektopne nhon ane wamla. 7 Ane wamla aghana, Allahri samenag yubu lelamogne sembe seneragna koma wamlom. Allahri yubu lelamogti, ‘Na sembe nimiri pham oro paliro tatnerop nena, “Nari topsene,” senelamna kom. Ot yareag senehinne paliag wamlaba, “Nimiri ul palamseng,” senelamna,’ seog. Yubu kiki ene a'undi wali uro seneraghamnep tanena, sin malia uan kom nimi tanekoag a'undi tam nenero pelengkahisom kom. 8 Nimiri Sabat sum uanepne neneko na mog so'oag nimi tahingeri saelba ulamnari o'obanepne wamna, ane sembe lemna,” aro ambatsiog.

Yesusti sae tara malinge wali nembaogha

(Markus 3:1-6; Lukas 6:6-11)

9 Yesus anekoa laplobi agha lebogti, nimi tanekori Allah yubu lero winirop aeag wa'iog. 10 Wa'iogpa nimi nhon sae tara malinge ae lom anekoag wamog. Ae lomag wamek nimi tanekori, “Yesusag tam pipsebe,” senelamekne agha elag hailamekti, “Musari samenag aruksirop yubu sunsunum uro Sabat sum eneko naiktop nimi hae wali nembahinep to, kom to?” aro haibaek.

11 Wene aro haibaekpa, Yesusti sinag yubu lelamogti, “A'un wamlom nimi agha Sabat sum tektek papto wamnep aghana, a'undi mo'osirop pham domba nhon selenga nubungeag eba timbanep. Selengaag timbaho tanena, a'undi peket sum eneko babe pham domba aneko selenga anekoag agha kiliro lambitnep kom te? 12 Pham domba o'omne kom agha yepnep tanena, nimi agha o'omne ane sembe, Sabat sum nimiri walia ulamsineba Musari aruksirop yubu nenekori iriksirop kom,” seog.

13 Wene seogti nimi sae tara sip mali nimi enekoag, “Sae nginikae,” seog. Wene seogpa, sae nginikaogpa, sae tarange wali wamog saog uro sae malinge neneko babe wali taogpa ibek. 14 Aghana Farisi nimi taneko poloro winirop ae anekoag agha laploa lambaekti, “Yesus obukap,” aro yubu nikne lero palamek.

Allahri wepto poghogne poneko sembe

15 Farisi nimiri Yesusag, “Yoaba uaukap,” aro sindi wanaag seneraglamekne Yesus sam el taogti, anekoa lamba piog. Lamba piogpa, nimi maikno elag neleplamekpa, nimi ni naikna wamsiogne wali nenelamsiog. 16 Wali nenelamsiogti, aruklamsiog nena, “Na Yesus etne wamnange sembe nimiag el nembahiseng kom,” aro wenero ambarelamsiog. 17 “El nembahiseng kom,” aro ambarelamsiog yubu ene, “Allahri samenag ambarelamog yubu sunup talul,” aro lelamog. Allahri samenag ambareamogpa, eldi yubu silimu tiptopne Yesayari mome toro pibog nena,

18 “Nari awe toropne wepto pogsinge ane wamla.

El nari o'ona sembamnange na wana awi ulamnelne wamla.

Nari Yame Walinge elag pimneba,

eldi porog uro tam karepto tininne nimi tala-tala mog so'oag urop nimi sembe ambarelamsilul.

19 El nimiap yubu nenep tangka yubu haum selul kom.

Nimiri ina toman palamikti, eldi yubu lilim ka'ebaukang kom.

20 Luna sanuktopne eldi kokloplul kom.

Auk pog leng-leng aro singkanepne eldi sarangkitlul kom.

Nimi win-win aro ulamsile paghabog, tam ni porog nenero komopto karebatsilul.

21 Porog nembaleba, tala-tala mog so'oag ubu paiamang nimiri, ‘Wali nembahilul,’ aro el siag wana paiamikti wamukang,” aro Allah yubu silimu tiptopneri mome toro pibog.

“Phia yonge sikini Beelzebul mikipne pere agha Yesusti phia yag lanalamsil,” aro nimiri lebeka

(Markus 3:20-30; Lukas 11:14-23; 12:10)

22 Yesus wamogpa, nimi nhon phia yonge kulomag wamogti, yubu lerop komne haing urop nimi nhon Yesusag payaek. Payaekpa Yesusti nimi eneko wali nembaogpa, haing kwelekaogti, yubu lelamog. 23 Wali nembaogpa, haing kwelekaogti, yubu lelamogne sembe nimi ni tanekori lo'om seekti, yubu lelamekti, “Elna samenag nimiri, ‘Daud sisange nhon mangap talul,’ aro yubu salag lebekne poneko te?” alamek.

24 Wene alamekne Farisi nimi tanekori ka'ebahiekti, yubu lelamekti, “Nimi eneri nimi kulomag agha phia yag lanalamsil nena, ot phia sikini nubunge si Beelzebul el mori mikipne Yesusag pibongeag agha phia yag lanalamsil,” alamek. 25 Farisi nimiri wanaag agha wene aro seneraglamekne Yesus el taog. El taogti, sinag yubu lelamogti, “Nimi nubungeri mog so'o nhon saelba ulamsinba, mog so'o anekoag urop nimiri a'ep tangto mal dalamnep. A'ep tangto mal dalamnep tanena, mog so'o nikag ua urop nimi taneko nimi nhonog umag khapto wamnep komdi, ya'ag loba tanep. Ae lom nhon nimi babe, as soro kalurop as nhonog urop nimi babe a'ep tangto sin mamun aisa nenep tangkamna tanena, undo wamnangeag agha nhonne babe khapto wali uro wamnep kom. 26 Ane saog uro phia yonge sikini nubunge Satanas nenekori elkae yag lambaho tanena, eldamne aisa nenep tan agha a'ep tangkamseng. Sin mamun a'ep tangkamseng tanena, Satanasti saelba ulamsil phia taneko welaro mikip uro khapto wamnep? 27 A'undi na sembe lelamlomne, ‘Phia yonge sikini nubunge Beelzebul nenekori mikipneag agha phia yag lanalamsil,’ alamlom. Undop pagha tanena, a'unag nelepsirop nimiri babe phia yag lanalamsiang nena, etneri mikipneag agha phia yag lanalamsiang? Hae sindi ka'elamikpa, a'undi na sembe yubu lelamlomne yubu kiki telekto seneraglamikti, ‘Phia yonge sikini mikipneag agha phia yonge yag lambahinep kom,’ aro tam karebaukang. 28 Aghana nari nimi kulomag agha phia yonge yag lanalamsin nena, Allah Yame mikipne toman agha yag lanalamsin. Nari yubu lelamnange sembe, ‘Sik lepla,’ aro seneraglapmun tanena, a'unna el talapmundi, ‘Wene Allahri yubu sia lero mog so'oag nimi saelba uhiroba nunag lag tal,’ aro el talulom.

29 Apna nari nimi kulomag wamsil phia yag lanalamsinne sembe seneraglamsut. Nimi mikipne ae nhonag wamsoba, nimi etneri babe ae anekoag wa'ina mikipne ponekori aba taluro tomnep kom saog wamla. Ot yog nimi mikip phelektopne wamnari, ae ngainge mikipne poneko salero haing sae kaupna taneogna, ae anekoag wa'ina ae ngainge ponekori aba taluro tomnep.

30 A'undi na sembe yubu lelamlomne wali uro seneragto ulamlulom. Nanag sip tangtop kom nimina, nanag aisa nenenerop. Nimi etneri nimi winihiro nanag sip payingkihirop kom tanena, nimi talup lanahirop. 31 Ane sembe nari a'unag ambarelamsin nena, nimiri malia uropneap, nimiri san tilipto leropneap sembe ni tam wailag tanep. Aghana nimi etneri Allah Yame Walinge san tiliplamle tanena, nimi enekori seneragto leropne sembe tam wailag tanep kom. 32 Nimi etneri na mog so'oag nimi tahinge sembe san tilipto lerop tanena, Allahri tam nene wailag ibongkia tam orog nembanep. Aghana nimi etneri Allah Eldamne Yame Walinge san tilipto lerop tanena, wene wamap sum ene babe, amik Allahri tam karebale sum babe tam wailag nembalul kom,” aro ambatsiog.

Kal yo'oap kal wanaap sembe yubu likipto sunumna ambatsiogha

(Lukas 6:43-45)

33 Yesusti nen tipto ambarelamsiogti, “Kal wana mauropneag agha nimiri kal nhon wela saog kal wamla aro el tanep. Kal wana walinge maurop tanena, kal walinge aro nimiri kemero el tanep. Kal wana lobange maurop tanena, loba kal aro nimiri kemero el tanep. 34-35 Nimiri pamag agha lerop nena, wanaag to'opto seneragnangeag agha yubu lanaro lerop. Wali nimiri walinge aghabog wanaag pairopneag agha walinge lero ulamla. Yo nimiri yonge wanaag pairopneag agha yoaba malinge lero ulamla. Undop pagha tanena, a'un yo urop nimi wamlomne nimi ohirop paghaeri mangaroba saog wamlom. Ane sembe, a'undi walinge lemnepne erarukti, walinge lemnep kom saog wamlom. 36-37 Ot a'unag ambarelamsin nena, Allahri tam karebale sum eneko a'undam nimiri pamdi yubu leropne toman agha kemel pina, ‘A'undi wana porogne agha ulamlom to, malinge ulamlom to,’ aro tam karebatsilul. Ane sembe mog so'oag nimiri salik-malik lerop yubu ni sembe, tam karebanepne ponekoag tibin nembatnepneog wamla,” aro ambatsiog.

Nimiri Yesusag, “Kekneba nhon ualulam,” seekne sembe Yesusti wembahiogha

(Markus 8:11-12; Lukas 11:29-32)

38 Musa yubu amohirop nang etpareap, Farisi nimi etpareap tanekori Yesusag samoro yubu lelamekti, “An yubu amohiropne wamlam. Andi lelamlamne sik tanena, Allah mikibari an pere agha uanepne kekneba nhon uamenba kembaukap,” seek.

39 Wene seek aghana, Yesusti sinag samoro ambarelamsiogti, “Nimi wene ko'o ene likto palamlange Allah wail ibare agha yo sirik nimi wamang. Sindi nanag, ‘Kekneba ualulam,’ aro molbaneang aghana, undo unuanun kom. Ot sin whingag uro yabileba, el nembahinepne kekneba nhonog wamlul nena, Allah yubu silimu tiptopne Yunusag uro yabiogne saog uro sin whingag uro yabileba, sin el nembahinepne kekneba lag talul. 40 Yunus poneko inipnaap yo'obiap ik wilindi ikan nubunge mon lomag wamog saog uro, na mog so'oag nimi tahinge babe inipnaap yo'obiap ik wilindi mog so'o lomag wamnun. 41 Sin Niniwe so'oag wamek nimiri babe Yunusti Allah yubu ambatsiog yubu ka'ebaekti, sindi malia seneragto ulameka lipsiek. Yunusti yubu ka'ebaekpa, wene Yunus phelektopne nubunge nhon wamla aghana, a'un wamlom nimiri ka'elamlom kom. Ane sembe, Allahri ni tam kemero kareplamle sum eneko Allah whingag sekapmunba, Niniwe so'oag wamek nimiri a'un Yahudi nimiag tam pibukang. Tam palilamikti, ‘El nimi nubu sirikne ponekori yubu teba'en sembaek,’ aro a'unag tam pibukang. 42 Sik yubu ka'ebaek saog uro samenag weag mog so'o Syeba nimi sembe yubu sia lerop kel nhon wamog. Kel enekori, ‘Israel nimi sembe yubu sia lenne Salomo kemel pineri, eldi wana hekahinep yubu ka'ebanun,’ aro im so'o tiptobag agha elag yaog. Salomo samenag wana hektopne wamogpa, wene el phelektopne nubunge nhon ane wamla aghana, a'un tane wamlom nimiri ka'elamlom kom. Ane sembe Allahri ni tam kemero kareplamle sum eneko Allah whingag sekapmunba, Syeba nimi sembe yubu sia lerop kel enekori a'un Yahudi nimiag tam piplul. Tam palilamleri, ‘El nimi nubu sirikne ponekori yubu teba'en sembaek,’ aro a'unag tam piplul,” seog.

Phia nimi kulomag samoro wa'al ingkiropne sembe Yesusti ambatsiogha

(Lukas 11:24-26)

43 Yesusti nen tipto ambarelamsiogti, “Phia yonge nhondi nimi kulomag agha lamba pin tanena, phia aneko mektop so'oag pang-yang uro tektek papto wamneba ero pirop. Ero pirop aghana el wamnebag olog imnep kom tanena, 44 eldi sembanep nena, ‘Na nen samoro samen ae wamnoag aneko wa'al pinun,’ senep. Wene aro lemnari, samoro yingkina kemelamnaba, samen laplomna ae aneko lomag yae unne orogti, sembenga wali uro po'oropti, togto kemerop wamneba imnep. 45 Wali togto kemerop wamnaba imnari, phia samne olog yo aghana, nen samoro pina phia saekpare yo sirikne eldi enero poa wa'al ahinep. Poa wa'al ahindi, sin elap nhon nimi eneko kulomag wamnep. Nimi eneko kulomag ua urop tanena, nimi eneko samenag wamnepne olog mali aghana, sin wa'iro ua urop tanena, ya'ag mali sirik tanep. Ane saog uro a'un wene wamlom nimi babe undo wamlom. Kipto tomnohom kom tanena, ya'ag mali sirik tanep,” aro ambatsiog.

Yesus ilinap ilipsaboap sembe lebogha

(Markus 3:31-35; Lukas 8:19-21)

46 Longolamek nimi maikno tanekoag Yesusti anam yubu ambarelamsiogpa, ilinap ilipsabo taptopneap yaekti, “Yesusap haiptaberi, yubu lebukap,” aro asag sekamekti wamek. 47 Sekamekpa nimi taneko nhondi Yesusag ambarelamogti, “Aninap anipsaboap yaangdi, ‘Anap haiptaberi, yubu lebukap,’ aro asag sekamang,” aro ambarog.

48 Wene aro ambarog aghana, ambarog nimi enekoag Yesusti samoro yubu lelamogti, “‘An aninap anipsaboap,’ selam aghana, et nimi naninap naipsaboap wamang?” seog.

49 Wene seogti, eldi yubu ka'ero neleptop nimi taneko kemelamsiogti, sae nginikom agha, “Kembahilulom. Tane wamang nimina, nanin nanipsabo wamang. 50 Wene aro lemnange enena, nimi etneri Nani Imagneri seneropne sunsunum uro ul palamle tanena, nimi eneko sembe nari wanaag, ‘Nanipsae, nanipsa'el, nanin,’ senelamsin,” seog.