“Nimi sembe tam karebi agha lobange sembaheng kom,” aro ambatsiogha
7
Yesusti nen tipto yubu ambarelamsiogti,
“Allahri tam karebi agha a'unag tam pipsileag aro,
a'undi ora nimi sembe tam karebi agha lobange aro seneraglamseng kom.
2 A'undi ora nimi sembe tam karebi agha seneragto ulapmunne sunsunum uro,
Allahri a'un sembe babe tam karebatsilul.
A'undi nimiag saeri sumbi agha tatsimunne sunsunum uro Allahri babe saeri sumbi agha a'un babe tatsilul.
3 Sa'a sembe ankaeri haingag kal sikin ua ulamlange,
‘Imnun,’
aro elamlam aghana,
andi haingag kal la'asi optenabangkelne ilil dalamlam kom?
4 Andi haingag kal la'asi optenabangkel aghana,
welaro andi ankaeag,
‘Kal sikin andi haingag wangkekelne toro la'imbitkenun,’
aro lelamlam?
5 Anna,
‘Wali sembanukang,’
aro uropne wamlam!
Andam nimiri haingag samen kal la'asi optenabangkelne toro la'inip tamen taneogna,
andi ankaeri haingag kal sikin ua ulamlange tibin wali uro ipmendi,
toro la'iniloplulam.
6 Mema Allahringe,
‘Kamdi telul,’
aro kam whingag tatseng kom.
Kam nhonag tatmunba,
a'unag samoro si sapsinep.
Kamna alikinag agha toroba mutiara pham ua urobag toro tobogaheng kom.
Phamag toro toboghatmunba,
pensalag yan ingisaplopnep,”
aro ambatsiog.
Allahag moloro ina siramag kaunguro erop nimi sembe ambatsiogha
7 Nen yubu lelamogti,
“A'undi Allahag mololapmunba tatsilul.
Elapmundi iplulom.
Ina siramag kaunguro yoplapmunba,
a'un sembe ina kubatsilul.
8 Nimi etneri mololamle tanena,
saeri toplul.
Nimi etneri el tolamle tanena,
haingdi iplul.
Nimi etneri ina siramag kaunguro yoplamle tanena,
el sembe ina kup talul.
9 Sunumnana undo.
A'un nimiri me nhondi mololamleri,
‘Naiyong,
kwaneng roti nhon tatnemenba tenun,’
sele tanena,
a'un nimi nhondi anmeag kirik tatnep te?
10 Me enekori,
‘Ikan sop tatnemenba tenun,’
aro molbaleba,
paghae el saeag pimnep te?
11 A'un mog so'oag nimi wanaag yo urop nimi aghana,
a'un maboag,
‘Walinge agha tatsisebe,’
aro ulamlom.
Undop pagha tanena,
a'un nimi etneri A'uni Imagne ponekoag mololapmun tanena,
el Imag wamlange ponekori,
‘Name,’
aro phelekto tarelamsileri,
walingeog tatsilul.
12 Ane sembe sa'a-sa'a ulapmunne abeneko pere a'undi,
‘Nimiri nanag walia uaneheng,’
senelamlomne sunsunum uro a'undina,
nimi orangeag walia ulamsululom.
Musari arukahiog yubuap,
Allah yubu silimu tiptop nangdi mome toro pibek yubuap ni abeneko yubu tam nhon nenekoag ni kaupto wamlaba ambatsin,”
seog.
“Ina ologne toman wa'ilulom,” aro ambatsiogha
13 Yesusti nen tipto ambarelamsiogti,
“Loba nenep tangtobag pinep ina aneko sabo uropti,
wa'inep ina siram anekona nubu uro pa'arop ina wamlaba,
nimi maikno ina aneko toman wa'alamang.
Ane sembe to'op ina siram toman wa'ilulom.
14 Olog ina siram to'op ina aneko kamag uro unag pinep ina wamla.
Ina aneko toman ot nimi ologhari ibikti wa'aukang,”
seog.
Kal wana walingeap malingeap sembe yubu likipto sunumna ambatsiogha
15 Yesusti nen tipto ambarelamsiogti,
“Nimi nhon-nhondi,
‘Allah yubu silimu tiptop nimi wamapti ambarelamsiap,’
aro orolenange ambatsinep.
Sin kemero ka'esinagna,
pham domba wana walinge saog urop nimi sembanep aghana,
sindi wanaag seneragtop nena,
pai kam yonge saog uro wamang.
Sin nimi taneko sembe yae togtangto wamlulom.
16 Nimiri kal wana mauropne kembi agha,
‘Wela saog kal wamla,’
aro el tanep saog uro,
nimiri ul piropne agha lag talenge a'undi kembiag agha,
‘Wela saogne wamla,’
aro el talulom.
Nimi nhondi kal ara wana to,
anggur wana to,
‘Tagto tenun,’
aro ulamnari,
werengkel alog kalag agha tagto tenep kom.
17 Ane saog uro kal wali uro pongorop kal niri kal wana walinge agha maurop.
Apna kal iklerero pongorop kaldi wana malinge agha maurop.
18 Kal wali uro pongorop kaldi kal wana malinge maubanep kom.
Apna kal iklerero pongorop kaldi wana walinge maubanep kom.
19 Kal wana walinge maurop kom kal sisa neneko ni khaepto aukag tobogto tamnepneog wamla.
20 Ane saog uro sin orolena lerop nimi tanekori ul piropne agha lag talenge a'undi kemelapmundi,
‘Wela saogne wamla,’
aro el talulom.
21 Nimi maiknori na yoplamneikti,
‘Nai,
nu Saelbamsilamne,’
sukang aghana,
sin yoplamneik nimi ni taneko Imagne ponekori saelba ulamsil nimi tanep ina wa'ina wamukang kom.
Ot sin nimiri Nani Imagneri seneropne ul pirop nimi agha eldi saelba ulamsil nimi taukang.
22 Ik komobanebag sum eneko nimi maiknori nanag yubu lelamikti,
‘Nai,
nu Saelbamsilamne!
Nuri ulamuburi,
an siag agha Allahri yubu silimu tipto ambarelamsiburi,
an siag agha phia nimi kulomag uropne yaglamsiburi,
an siag agha memne mikibari uanepne ulamubu kom te?’
sukang.
23 Aghana nari sinag samoro yubu lelamneri,
‘A'unna na ekon nimi nari ilihirop kom nimi wamlom.
A'un irikna ingisaplorop nimi wene na wamnaag anea pululom,’
aro lag phoro senun,”
seog.
Wana hekto ae soropneap limituk uro ae soropneap sembe ambatsiogha
24 Yesusti nen tipto ambarelamsiogti,
“Nimi etneri nari ambatsirop yubu ene ka'elamleri,
salero ul palamle tanena,
nimi eneko nimi wana hektopneri kirik alibag aeog pubu ikto ae soropne saog wamla.
25 So'o punag walil wa'ina yangan kirik anekoag aeog pubu ikto solamla ane sembe,
mag telamnari,
mag wenero ilipto yalamnari,
khaori aeag siplamnaba,
ae kirik alibag sorop ae aneko tupnep kom.
26 Aghana nimi etneri nari ambatsirop yubu ene ka'elobi agha salero ul palamle kom tanena,
nimi eneko nimi limitukneri kirik a'angkea alibag ae soropne saog wamla.
27 Kirik a'angkea alibag ae soamlaba,
mag telamnari,
mag wenero ilipto yalamnari,
khaori aeag siplamnaba,
ae eneko tupnep.
Ae tupnepne neneko ya'ag mali uro kwerek tangto yabinep,”
aro Yesusti ambatsiog.
28-29 Yesusti wene aro ni yubu eneko ambatsiogpa,
sin longoro ka'elamek nimi tanekori el talamekti,
“Yaghe,
el mo el uropne wamlari,
mikipneag agha amoro ambarelamsil.
Musari yubu amohirop nangdi undo mikipneag agha nunag amoro ambarelamsiang kom,”
senelamekti lo'om seek.