Yohanis i

Yohanis

Horok Lirna La'an

Ri man hi'i horok eniyeni rapolu ‘Ai man Yesus naramyak’, ee ‘Yesus Nin man lernohi man Ai naramyak’ (21:20-24; 13:23; 19:26; 20:2; 21:2-7). Menmolollo ri Kristen rir ri leleher nano nonolu eni me'enile Yohanis.

Yohanis na'aheni nin panaeku hi'i horok eni heheni: Lere onne Yesus nodi Makromod Lalap Nina ke'eke'el an'anha hi'i tanada man ri kan dodo'onnale makun nammori lolo man lernohi pakunohi enihe kalarna, maa tanada onnenihe kar horok mai eni. Enimaa ri man hi'i horok eniyeni, horok tanada eniyenihe leke mi akim naili'il Yesus, leke mi mauroin nahenia Makromod Lalap kikanedi Ai namwali Rai laa ewi-ewi, leke mi mauroin Ai onne Makromod Lalap Anan haenihi. Enla mi na'akeme ma akin naili'il Ai eni, mim lernala or'ori dardari man kan horu (20:30-31).

Lolo panakan 1 rakan 12 ik les tanada man lewlewen wo'ikku man Yesus hi'ie. Tanada eniyeni kukul nahenia namlolo kokkoo Yesus namwali Makromod Lalap Anan.

Lolo horok eni Yesus rapolu Makromod Lalap Anan rew'ira (1:34; 1:49; 3:16-18; 5:23-25; 11:4; 11:27; 20:31).

Lolo horok eni Yesus hari panaeku nammori ma na'onno Ai kemen nodi wanakunu lirna, ‘Ya amwali...’

“Ya amwali hanana'an ma nala or'ori dardari!” (6:35)

“Ya amwali ropropo noho eni wawan!” (8:12)

“Ya'u penia amwali pipi ro'o nina nike.” (10:7, 9)

“Ya'u eni man huri wawa'an.” (10:11, 14)

“Ya amwali or'ori dardari onno!” (11:25)

“Ya'u eni penia amwali kalla.” (14:6)

“Ya'u eni anggur ono ma namlole.” (15:1)

Lolo horok eni Yesus na'ahenia, “Loi honorok wawa'an Ainu'u panaeku ma na'onno eniyeni: lere kar mori Abraham makun, Ya'u aiyedi me'e!” (8:58) Eniyeni kukunohi nahenia Ai namwali Makromod Lalap Anan man aile mamani nano lere dedesne wake'e rakan laa ewi-ewi.

Horok Ihin

1. Man hi'i horok eni hi'i wanakunu dedesne (1:1-18).

2. Yesus hi'i tanada man ma'aruru wake'e la Ainin wanakuku nodi kunukunohi nahenia Ai penia namwali Makromod Lalap Ananne (1:19-12:50).

a. Yesus Nin honowok dedesne lolo noho wawan (1:19-4:54).

b. Yesus Nin hini'i wenewhe lolo kota Yerusalem Alam Renren Warwarna (pnk. 5).

c. Yesus Nin hini'i wenewhe lolo noho Galilea Lere Alam Lalap Paska (pnk. 6).

d. Yesus Nin hini'i wenewhe lolo noho Yudea nin Lere Alam Lalap Heuheu Man Ra'an Romunle Raram (7:1-10:21).

e. Yesus Nin hini'i wenewhe na'urani Lere Alam Lalap Paska (pnk. 11-12).

3. Na'uraniyedi nin makmaki me'e, Yesus loikaru Nin wanakuku la nounaku man horu (pnk. 13-17).

4. Rin kele Yesus resne, la An mori wali'ur (18:1-20:29).

5. Man hi'i horok eni kukunohi horok eni nin panaeku (20:30-31).

6. Yesus nalhari kemen Nin man lernohi pakunohi wo'ikku (pnk. 21).