Daalam 13

Kavaar ma azi

1 Mbi kwa kavaar a̰me ndé ne maŋgaɗam ga̰l yuwam se ya digi, ka da ne kḭḭm ma wol ne pala ma ɓyalar me. Na kḭḭm mbe ma ka da ne balme ma wol, sáso sal Dok ma ka njaŋgeya na pala ma digi me. 2 Kavaar ge mbi ne kwa na mbe di da ra̰y go, na koo dimma ne yoŋyoŋ koo ma go, na wak kat dimma ne sonne wak go. Dragon hon kavaar mbe na pool, ne na hool gan ne pool gḛ ge be to. 3 Kavaar mbe pala ge ɗu ka dimma ne na ne ɓo jwaŋ siya go, amma na jwaŋ mbe zon. Suwar pet ke ajab, a kare kavaar mbe pe. 4 A ka uware dragon ne na ne ho̰ kavaar mbe pool pe, a ka uware kavaar mbe go: «A wuɗi mbya ne kavaar mbe go ne ɗaa? A wuɗi mbya ke pore ne na ne ɗaa?»

5 A hon na wak jan fare asar ne sal Dok me, a hon na pool ge ke fare ɗiŋ saba wara anda para azi. 6 Hage na wak sal Dok, ne sal Dok dḭl, ne na zok ge mbegeya, ne naa ge nama swaga katɗa ne digi zi ya ma. 7 A hon na viya̰ na mba pore ne naa ge mbegeya ma, na há nama me. A hon na pool hir ma pet, ne pehir ma pet, ne wak farra ma pet, ne suwal ma pet pal. 8 Naa ge ne suwar pal ma pet a mbo uware na, nama ge nama dḭl ma ne njaŋge ne maktub ge ndwara ge tame vya ge ne vya̰ vyan ne zi to ne pe dolla ge dunya ne ya day ma.

9 Ndu ge ne togor ge za̰ya, na za̰. 10 Ndu ge ne paal pe, a mbo pál na, ndu ge ne suya pe, a mbo hun na ne kasagar. A swaga ge wan ta ne hon fareba ge naa ge mbegeya ma ne ne.

11 Mbi kwa kavaar a̰me ge ɗogle zut ne suwar se ya digi, ka da ne kḭḭm ma azi dimma ne tame vya kḭḭm ma go, amma ka jan fare dimma ne dragon go. 12 Ka ke temel ne pool ma pet ge kavaar ge zḛ ge ne, ge na ndwara se. Ka e suwar ma ne naa ge ne suwar pal ma pet uware kavaar ge zḛ ge ge ne ɓo jwaŋ ge siya, ge na jwaŋ ne zo̰ mbe. 13 Ka ke kaŋ ŋgayya ge ɓaŋlaŋ ma, ɗiŋ ka e ol fage ne digi zi ya suwar pal naa ndwara go pet. 14 Ka ya̰me naa ge ne suwar pal ma ne na kaŋ ŋgayya ge a ne ho̰ na viya̰ kerra kavaar ge zḛ ge ndwara go ma. Ka jan naa ge ne suwar pal ma nama ke kḭḭm ne kavaar ge kasagar ne ho̰ na jwaŋ, ge ne gwa̰ ya kat ne ndwara mbe pe. 15 A hon na pool ge na ho̰ kavaar mbe kḭḭm ma o̰yom, ge e na farra, ko ne hun naa ge ne uware na ge kḭḭm mbe to ma uzi. 16 E naa pet, ga̰l ne jyale, gan ma ne a̰se ma, mo̰r ma ne vya twala ma, nama ɓo logom ne pool nama tok matoson ma go ko nama sḭ́ḭ́l ma go. 17 Ndu a̰me ne pool ge yat kaŋ ko e kaŋ yatɗa uzi to, kadɗa na ne logom be to, ko ne dḭl ge kavaar mbe ne, ko ne isiya ge na dḭl ne to. 18 A swaga ge ndu kat zwama ne. Ndu ge ne ɗalla na wa̰ isiya ge kavaar ne mbe pe, ago a isiya ge ndu dasana ne ne: na isiya a kikis myanaŋgal para wara myanaŋgal para myanaŋgal.