MAKTUB GE
ATAA
GE
YOHANNA NE
Wak sanna
1
1 A mbi ndu ga̰l ge temel, mbi njaŋge maktub hon mo mbi ndu ge laar wanna Gayus, mo ge mbi laar ne wa̰ mo fareba zi nea.2 Ndu ge laar wanna, mbi ɓyare go mo sḛ ka tuli kaŋ ma zi pet, mo duur ka tuli mo ta, dimma ne mo o̰yom ne mo zi tuli go me.
Gayus mbo ya fareba zi
3 Mbi da ne laar saal gḛ ge be to, ne da pe, swaga ge ná vya ma ne mbo ya i ta, a jya̰ i go, mo ya fareba zi, dimma ne mo ne mbo ne fareba zi go. 4 Mbi da ne laar saal gḛ ge be to swaga ge mbi ne za̰ go mbi vya ma mbo ya fareba zi.
5 Ndu ge laar wanna, mo ke kaŋ ma ne ná vya ma pe hon fareba zi, ko ne gwasal ma pe. 6 Nama sḛ ma a jan fare ge mo laar wanna ne ya swaga koteya ge ɓase ge Dok ne ma ne zi. Ke nama kaŋ ge kwaɗa dimma ne Dok ne ɓyare go ne nama gwasal mborra pe. 7 Ago a ka̰ ta viya̰ go da ne dḭl ge (Bageyal) ne pe, a be ne ame a̰me ne naa ge dunya ma tok go to. 8 Nee ɗe, nee mbya ame naa ge go mbe ma no, ne da pe nee ba kat kaam ge temel ma ge fareba.
Dyotref ma ne Demetriyus
9 Mbi njaŋge fare a̰me hon ɓase ge Dok ne ma. Amma Dyotref, na ge ne ɓyare kat naa ndwara zḛ, be ame i to. 10 Ne da pe no ɗe, swaga ge mbi ne mbo mbo ja, mbi mbo fut na kaŋ ge ne ke ma pe zum. Jan fare ge sone ma i pal. A be no ɗeŋgo mbyat na ne to, amma gwan ame ná vya ma to iya uwale, naa ge ne ɓyare ame naa ma ka tele nama, ka yan nama ne ɓase ge Dok ne ma buwal zi uzi.
11 Ndu ge laar wanna, bole kaŋ kerra ge sone to, amma ge kwaɗa. Ndu ge ne ke kaŋ ge kwaɗa a ge Dok ne ne, ndu ge ne ke kaŋ ge sone kwa Dok to.
12 Naa pet a jan fare ge kwaɗa Demetriyus pal, fareba sḛ ne na pala ke na sayda ne. I sḛ ma me, i jan fare ge kwaɗa na pal, mo kwa kwa go fare ge i ne jan a fareba.
Wak sanna ge go̰r dab