2korinte Ma 8

Nṵsiya ne bobo kerra pe

1 Ná vya ma, i ŋgay aŋ kwaɗa ge Dok ne ke ne ɓase ge Dok ne ma ge ne suwal Makedoniya go ma. 2 Ge yál njotɗa ma zi, ne pe herra ma zi, ne jo̰ a ka a̰se gḛ puy ɗe, a ka ne laar saal gḛ swaga hon bama bobo ma go. 3 Mbi jan go, a ho̰ pool ge bama ne pal, ko waɗeya, laar ɓyareya ge bama ne zi. 4 A kaɗe i ne á ta go, i wa i tok temel ge mbar naa ge mbegeya ma ne mbe zi. 5 a ke waɗe dwatɗa ge i ne pal. A ho̰ ta Bageyal gale ɓya, a ɗage hon ta i no laar ɓyareya ge Dok ne pal. 6 Da ne pe no, i kaɗe Titus no go, dimma ne na ne e na pe ya go, na wi temel ge siŋli mbe no kerra wak aŋ ta me. 7 Ne jo̰ aŋ da ne kaŋ ma pet zuliya ceɗed: hon fareba, ne fare janna ɗalla, ne fare kwarra, ne har ta kaŋ ma zi pet, ne laar wanna ge aŋ ne ne i pe, ho̰ me ta ne bobo mbe pe kerra go no me.

8 Mbi jan no ndwara ke aŋ pool to, amma ndwara ŋgay aŋ honna ge naa ge may ma ne hon ta. Mbi hon aŋ viya̰ ge aŋ ŋgay laar wanna ge fareba ge aŋ ne. 9 Ago aŋ kwa laar wanna ge nee Bageyal Jeso Kris ne kwa, na ge ne ka gan, saŋge tene a̰se ne aŋ pe no, ne da pe, ne a̰se ge na ne ta aŋ saŋge gan.

10 Mbi hon aŋ dwatɗa ge mbi ne fare mbe pal. Ago a kwaɗa ne aŋ pe, ne jo̰ ne dana domol day a aŋ sḛ ma e pe ke fare mbe ne, aŋ be ke na ke ɗeŋgo to, aŋ da ne sḛ tuli ge ke na. 11 Ne se no, wi me aŋ temel mbe wak, ne da pe sḛ tuli ge aŋ ne ge ne kerra pe mbe na ka mbyatɗa ne pool ge aŋ ne. 12 Ago kadɗa sḛ tuli ya go, amma Dok vin na da ne kaŋ ge mo ne na to pe to, amma ne kaŋ ge mo ne na.

13 A be go aŋ dé woɗegeya zi ɗo, naa ge may ma ba ga za̰ tuli to, amma ago aŋ ka mbyatɗa leɗet 14 Ne se no ɗe, aŋ kaŋ ge ne waɗe gḛ ma aŋ ho̰ nama na ndwara wi woɗegeya ge nama ne wak, ne da pe nama ne ge ne waɗe gḛ ma me a mbo hon aŋ na ndwara wi woɗegeya ge aŋ ne wak me, go no aŋ ba kat mbyatɗa leɗet, 15 dimma ne a ne njaŋge go: «Bage ne kaŋ ma gḛ, na kaŋ ma waɗeya pal to, bage ne kaŋ ŋgeɗo, be woɗege ne a̰me to.»

Titus ma ne na kaam ge temel ma

16 Uwareya hon Dok na ge ne é sḛ fogor mbe no Titus dulwak zi ne aŋ pe. 17 Ago na sḛ vḭ tolla ge i ne, sḛ fogor ge na ne zi, gwan vin tene no go na mbo aŋ ta ya. 18 I teme ná vya ge ɓase ge Dok ne ma mwaɗak ne uware na ne temel ge na ne ke ne fare ge kwaɗa pe poseya ne na. 19 A no ɗeŋgo to, ɓase ge Dok ne ma tá na, ne da pe a ɗame i temel kerra ge laar wanna mbe zi, na ge a ne ho̰ i na ne uwareya ge nee Bageyal ne pe, ne sḛ tuli ge i ne pe me.

20 I ɓyare go naa o i pe ne kaŋ syalla ge gḛ ge a ne ho̰ na ne i tok kerra mbe no pe to. 21 Dwatɗa ge i ne a ke kaŋ ge kwaɗa, a be Bageyal ndwara se ɗeŋgo to, amma naa dasana ma ndwara se pet me.

22 Poseya ne nama, i teme i ná vya a̰me, na ge i ne kugi har tene ge na ne ndwara gḛ gḛ, swaga ma go pet i ne ɓo go na gwan har tene waɗeya kaŋ ma zi pet, ne saareya ge na ne ge ɓaŋlaŋ ne aŋ pe. 23 Kadɗa ne Titus ɗe, na sḛ mbi kon ne, a mbi kon ge temel aŋ ta ne. Kadɗa ne i ná vya ma ɗe, a naa ge temeya ge ɓase ge Dok ne ma ne ma ne, naa ge ne ke temel ne Kris dḭl pe uwareya ma ne. 24 Ŋgay me nama laar wanna ɓase ge Dok ne ma ta pet, ne da pe ɓase ge Dok ne ma kwa go aŋ da ne laar wanna, nama kwa go i uware ta ne aŋ baŋ to.