2korinte Ma 5

1 Ago, i da ne kwarra go, kadɗa i zok ge suwar, gur mbe no vḛne ya, i da ne zok ne digi zi ya, na ge Dok ne sḭ na ne na tok zi, zok ge ɗiŋnedin ge ne sḭ ne tok ge naa dasana ma ne to. 2 Se no i sun ta, i da ne ene gḛ go i ka̰ i zok ge ne digi zi ya i ta, 3 ɗeŋgo ago a ɓol i swala to, amma ne kaŋ i ta. 4 Ago i ge gale ne gur mbe no zi, i sun ta, i ka za̰ yál. Ago i ɓyare fage duur mbe uzi to, amma i ɓyare kan ge ɗogle na pal, ne da pe kaŋ ge ndwara na uɗi ge suya. 5 A Dok sḛ nṵsi i ne na pe ne, na ge ne hon i wak tuli ma ge O̰yom ne.

6 Ne no pe ɗe, i wan i dulwak ɗaɗak, i da ne kwarra tyatyat go, tek ge i gale ne duur mbe no zi, i káál ne Bageyal. 7 Ago, i mbo ya hon fareba zi, a be ndilla ne ndwara to. 8 I wan i dulwak, mbi ɓyare ya̰ duur mbe no, mbi ba mbo kat Bageyal ta ya. 9 Ɓyareya ge i ne, a go i ke na sḛ tuli, ko i ka duur mbe no zi, ko ya̰ na. 10 Ago i pet i mbo mḛ tandal sarya ge Kris ne ndwara se, ne da pe ndu ge daage na ɓo potɗa na kaŋ ge na ne ke duur mbe no zi pal, ko kwaɗa go, ko sone go.

Temel ge ɓan naa ba̰a̰n ne

11 Ne jo̰ sya Bageyal vo i kwa na kwa ɗe, i ɓyare e naa nama vḭ i fare. Ge Dok ndwara se, i benna kwaya̰l go waŋ, mbi dwat go aŋ ta uwale, i benna. 12 I ne pool gwan njaŋge ta maktub viya̰ hon aŋ to, amma i hon aŋ viya̰ ge aŋ uware ta ne i pe, ne da pe, aŋ ba gwan ne naa ge ne uware ta ne kaŋ ge ne kwa ne ndwara ma ta be kaŋ ge ne dulwak zi ma ta to ma fare janna. 13 Ago kadɗa i daal, da ne Dok pe, kadɗa i ŋgaraŋ, da ne aŋ pe. 14 Laar wanna ge Kris ne waɗe i pal, swaga dwatɗa go, ndu ɗu su ne naa pe pet, ago naa pet a su su. 15 Uwale, na sḛ su ne naa pe pet, ne da pe, nama ge ne ndwara ma, nama ka ne ndwara ne ta pe to, amma ne bage ne su, ne ta̰ ne siya se ne nama pe. 16 Ne pe no ɗe, se no, i gwan ndil ndu dimma ne duur go go to, ko ne jo̰ i kwa Kris duur go puy ɗe, ne se no, i gwan kwa na mbe go to. 17 Go no ɗe, Kadɗa ndu ya Kris zi, a dolla ge giya̰l ne, kaŋ ge sabar ma kale ya go, a kaŋ ge giya̰l ma gá ne. 18 Kaŋ mbe ma no pet a da ne Dok ta ya, na ge ne ɓa̰ nee dagre ne na ne Kris ta, ho̰ nee temel ge ɓan naa dagre ne na no. 19 Ago ne Kris ta, Dok ɓa̰ naa ge ne dunya zi ma pet ba̰a̰n dagre ne na, be ge dwat ne nama sone ma to. A go no, ho̰ nee fare ge ɓan naa ba̰a̰n no.

20 Nee naa ge ke temel Kris byalam go ma ne, a dimma ne Dok moɗege aŋ da ne i ta go. I kaɗe aŋ dḭl ge Kris ne zi, ɓa̰ me ba̰a̰n ne Dok. 21 Na ge ne ke sone to bat, Dok saŋge na sone ne nee pe, ne da pe, ne na ta, nee saŋge naa ge dosol ma Dok ndwara se.