Fare gwanna ge fare eleya ge sanna ne pal
7
1 Ge fare ge aŋ ne njaŋge pal, ke ya kwaɗa ndu son na abe tene uzi ne gwale ta. 2 Amma, ne o̰y pe, ndu son ge daage na ka ne na gwale, ndu gwale ge daage na ka ne na obe me. 3 Kaŋ ge obe ne mbya ke na gwale, na ke na, gwale na ke ne na obe go no me. 4 Ndu gwale ne pool ne na duur pal to, a na obe. Go no me, ndu son ne pool ne na duur pal to, a na gwale. 5 Na kaage ndu a̰me na kuri na kon to, kadɗa kuriya ya go, na ka za̰ ta zi, swak baŋ, ne da pe aŋ ba hon ta ne kaɗeya pe. Ne go̰r go aŋ ba gwan’a ɓan dagre, na kaage Saytan ɓo viya̰ kugi aŋ ne wan ta to ge aŋ ne pe to. 6 Swaga jan aŋ fare mbe no go, mbi hon aŋ dwatɗa baŋ, mbi ke aŋ pool to. 7 Mbi ɓyare go naa sonmo ka dimma ne mbi go. Amma ndu ge daage da ne na bobo ge na ne ne na pala ne Dok ta, ndu a̰me ɓol ge no, ge may ɓol ge may me.8 Ne nama ge ne ka yàl to ma pe, ne kumur ma pe me, mbi jan go, na ke ya kwaɗa nama ka dimma ne mbi go. 9 Amma kadɗa a day wan ta to, nama ka yàl, a golgo nama ka yàl, ge nama ka ɗaabeya ne ene ge duur ne.
10 Amma ne nama ge ne ka yàl ma pe, a be mbi hon wak ne to, a Bageyal: Na kaage ndu gwale na ya̰ na obe to bat. 11 Kadɗa na ya̰ na obe ya, na gwan kat yàl to. Katɗa to, nama ne na obe nṵsi ta buwal. Na kaage ndu son na ya̰ na gwale to bat.
12 Ne nama ge ne gá ma, a be Bageyal to, a mbi jya̰ ne: Kadɗa ná vya ge son a̰me da ne gwale ge ne ho̰ fareba to, kadɗa gwale mbe vinna kat ne na, na ya̰ na to bat. 13 Kadɗa gwale da ne obe ge ne ho̰ fareba to, kadɗa na obe vinna kat ne na, na saa tene ne na to bat. 14 Ago obe ge ne ho̰ fareba to a mbegeya ne na gwale pe, gwale ge ne ho̰ fareba to a mbegeya ne na obe pe. Te go to, aŋ vya ma harcal to, ne se no a mbegeya. 15 Amma kadɗa bage ne ho̰ fareba to ɓyare saa tene, na saa tene. Ná vya ge son ko ná vya ge gwale a be vwalla ne no mbe pe to. Ago Dok tó aŋ ya da ne katɗa halas pe. 16 Gwale, mo kwa da ne da go mo mbo má mo obe ɗaa? Obe, mo kwa da ne da go mo mbo má mo gwale ɗaa?
17 Ɗeŋgo, ndu ge daage na ke mborra ge varra ge Bageyal ne va na pal, dimma ne Dok ne tó na ya go. Ge swaga koteya ge ɓase ge Dok ne ma zi pet, mbi hon wak mbe go no. 18 A tó ndu a̰me ya ba̰y vyanna zi’a? Na woy na ba̰y vyanna to. A tó ndu a̰me ya ba̰y vyanna to zi’a? Na gwan vya̰ ba̰y to. 19 Ba̰y vyanna be a̰me pe ne to, ba̰y vyanna to a be a̰me pe ne to me. Kaŋ ge ne mbya kerra a koy wak honna ge Dok ne. 20 Ndu ge daage na ka dimma ne a ne tó na ya go. 21 Swaga ge a ne tó mo ya, mo ka mo̰r’a? Sṵ tene to. Ko ne jo̰ mo da ne pool ge hat suli puy ɗe, ke mo temel zo. 22 Ago mo̰r ge a ne tó na ya Bageyal zi, a suli Bageyal zi. Go no me, ndu ge suli ge a ne tó na ya, a mo̰r ge Kris ne. 23 A zu aŋ da yé gḛ, saŋge me mo̰r ge naa dasana ma ne to. 24 Ná vya ma, ndu ge daage na ka Dok ndwara se dimma ne a ne tó na ya go.
Ne naa ge ne ka yàl to ma pe
25 Ne dore ma ne kale ma pe, mbi be ɓol wak honna da ne Bageyal ta to, amma a mbi hon mbi dwatɗa ne, mbi ge ne kwa a̰se ge Bageyal ne zi, ne saŋge ndu ge naa ne mbya vin na fare.
26 No a kaŋ ge mbi ne ndil na kwaɗa ne, ne haŋle ge ma̰ mbe ma no pe, a kwaɗa go ndu na ka yál to. 27 Mo san gwale ya go’a? Gwan yan na to. Mo be san gwale to’a? Ɓyare gwale to. 28 Amma kadɗa mo ka yàl, mo be ke sone to. Kadɗa vya kale ko vya dore kat yàl ya, be ke sone to. Amma nama ge ne kat yàl ma a mbo ɓol tiiɗiya duur zi, da ne pe mbi ɓyare foge aŋ no.
29 Ná vya ma, za̰ me fare ge mbi ne jan no: Ago swaga terse go, ne gá ne zḛ no, nama ge ne gwale ma, nama ndi ta dimma ne nama ne be kat yàl to go, 30 nama ge a ne fyal ma, dimma ne bama fyal to go, nama ge a ne ke tuli ma, dimma ne bama ke tuli to go, nama ge ne yat ma, dimma ne bama ne a̰me to go, 31 nama ge ne za̰ dunya tuli ma, dimma ne bama ne za̰ tuli a̰me to go. Ago dunya ge ma̰ mbe no mbo kale uzi. 32 Amma mbi ɓyare go aŋ iigi ta ne fare a̰me pe to. Ndu ge ne ka yàl to iigi tene da ne temel ge Bageyal ne pe, ɓyare ke Bageyal sḛ tuli. 33 Amma ndu ge ne ka yàl iigi tene da ne fare ge dunya ne pe, ɓyare go na ke gyana ɗo na ba ke na gwale sḛ tuli de. 34 Na sḛ a̰re a̰re. Ago gwale ge ne ka yàl to, ko vya kale, iigi tene da ne temel ge Bageyal ne pe, ne da pe na mbegeya duur zi ne O̰yom zi me. Amma gwale ge ne obe iigi tene da ne fare ge dunya ne pe, ɓyare go na ke gyana ɗo, na ba ke na obe sḛ tuli de.
35 Mbi jan aŋ fare mbe ma no da ne kwaɗa ge aŋ ne pe, mbi hul be faɗe ne aŋ pe to, amma a ndwara go aŋ ke fare ge ne na viya̰ go, aŋ wa̰ ta temel ge Bageyal ne zi ne dulwak ɗu.
36 Kadɗa vya dore da ne ene gḛ na kondore ta, kat ge be ge day wan tene to, ne jo̰ nama kondore kerra mbe gale zam zḛ, nama ka yàl dimma ne na ne ɓyare go, be ke sone to. 37 Amma kadɗa vya dore mbe vin tene ya na dulwak zi, be ge ndu a̰me e dṵṵl na pal ne zum ya to, kadɗa na vḭ tene go na kat yàl, na da ne pool wan tene, ke kwaɗa. 38 Go no, ndu ge ne kat yàl ne na kondore ke kwaɗa, amma ndu ge ne kat yàl ne na kondore to ke kwaɗa waɗeya.