Yuda ma ne pehir ge ɗogle ma da ne Bageyal ge ɗu
10
1 Ná vya ma, ɓyareya ge mbi ne ne dulwak, ne kaɗeya ge mbi ne Dok ta ne nama pe, ago nama má. 2 Fareba, mbi jan go a da ne ene ge ke temel ge Dok ne, amma be kwarra to zi. 3 Ago, ne jo̰ a be wan viya̰ ge Dok ne hat naa dosol pe to, a ɓyare viya̰ ge hat ta dosol ne bama pala, go no a be gwan ne bama pala viya̰ ge Dok ne ge hat naa dosol pe se to. 4 Ago Kris wi eya wak, ne da pe, ndu ge daage pet ge ne hon fareba ya na há dosol Dok ndwara se.5 Ago Musa njaŋge ge fare ge hat dosol ne eya ta pal go: «Ndu ge ne ke mborra na pal mbo kat ne ndwara ne na ta.» 6 Ndi, fare janna ge hat dosol ne hon fareba ta ne no: «Kaage mo jan mo dulwak zi go: A wuɗi mbo ndé digi zi ya ne ɗaa? Ndwara go, e Kris kan na koo ne digi zi ya se. 7 Ko, a wuɗi mbo ndé táál ge siya ma ne se ya ne ɗaa? Ndwara go gwan ne Kris ne naa ge siya ma buwal zi ya digi.» 8 Jya̰ gyana ɗaa? «Fare janna ya mo ta gwa, mo wak zi, mo dulwak zi.» No a fare ge hon fareba ne, ne i ne waage na ne. 9 Kadɗa mo jan ya ne mo wak zi go Jeso a Bageyal ne, mo hon fareba ne mo dulwak zi ya go Dok ta̰ na ne naa ge siya ma buwal zi me, mo mbo má. 10 Ago ndu hon fareba da ne na dulwak zi ya, ba det ya kat dosol, ndu jan fare da ne na wak zi, ba det ya máya go. 11 Age maktub jan go: «Ndu ge daage pet ge ne hon fareba na ta, saaso mbo ke na to bat.» 12 Go no, vareya ne Yuda ma ne Grek ma buwal zi to. Nama sḛ ma pet a da ne Bageyal ge ɗu, na ge ne hon ndu ge daage pet ge ne kaɗe na kaŋ kwaɗa ma. 13 «Ago ndu ge daage pet ge ne mbo tol dḭl ge Bageyal ne ya mbo má.» 14 A tol na ma̰ gyana, kadɗa a be hon fareba na ta to! A hon fareba na ta ma̰ gyana, kadɗa a be za̰ na fare to! A za̰ na fare ma̰ gyana, kadɗa ndu be waage nama na ne to! 15 A waage nama na ma̰ gyana, kadɗa a be teme nama teme to! Dimma ne a ne njaŋge go: «A ma kaŋ siŋli ne, koo pul ma ge ne waage fare ge kwaɗa!» 16 Amma naa pet a be gwan ne bama pala fare ge kwaɗa pe se to. A go no Isaya jya̰ no go: «Bageyal, a wuɗi ho̰ fareba i fare oyya pal ne ɗaa?» 17 Go no, hon fareba da ne za̰ya ta, fare za̰ya mbe, a fare ge Kris ne.
18 Amma mbi ele aŋ: Yuda ma be za̰ fare mbe to’a? Fareba, a za̰ na! Maktub jan go:
«Nama ka̰l dé swaga ma go pet,
nama fare janna mbo ɗiŋ dunya pe ndegɗe.»
19 Mbi gwan ele aŋ uwale: Israyela ma be wan pe to’a? Ne zḛ ya Musa jya̰ go:
«Mbi mbo twa̰se aŋ yil digi ne pehir ge ne mbya a̰me pe ma to,
mbi mbo é aŋ ɓol tiiɗiya ge pehir ge dale ma ta.»
20 Isaya mbo ɗiŋ jan go:
«Naa ge ne ɓyare mbi pe to ma ɓo mbi,
mbi dya̰ tene ge naa ge ne ele fare pe ne mbi ta to ma ta.»
21 Amma ne Israyela ma pe, jya̰ go:
«Dam ne dam mbi ka kaɗe mbi tok
ge naa ge pala ndaar ge be za̰ wak to ma pe go.»