Roma Ma 2

1 Mo poreya to, mo ge ne kun sarya, ko mo ka wuɗi. Ago swaga kun sarya naa pal go, mo kun sarya tene pal, ne da pe mo me, mo ke mbe go no ca me. 2 Ago nee da ne kwarra tyatyat go sarya ge Dok ne kun naa ge ne ke kaŋ ge go mbe ma pal, kun na fareba pal. 3 Mo ge ne kun sarya naa ge ne ke kaŋ ge go mbe ma no pal, mo sḛ ka kerra me, mo dwat go, mo mbo ɓur ne sarya ge Dok ne go uzi ɗaa? 4 Ko mo sen na kwaɗa ge ɓaŋlaŋ, ne wan tene, ne wan tene deŋgel ge na ne ɗaa? Mo kwa go kwaɗa ge Dok ne zwal mo mbo ya haseya go to’a? 5 Ne pala ndaar ge mo ne, ne dulwak togreya ge mo ne, mo toge ya pore mo pal ge dam pore go, na ge ne mbo dyan ya dam kun sarya ge Dok ne go, 6 ge mbo pot ndu ge daage mbyatɗa temel kerra ge na ne pal. 7 Nama ge ne á ta ke kwaɗa, ne ɓyare hormo, ne doreya ne duur ge be hubiya, mbo hon nama ndwara ge ɗiŋnedin. 8 Amma nama ge a ne gage ta ne na ma, ge a ne gwan ne bama pala fareba pe se to ma, ge a ne ke mborra fare ge dosol to ma pal ma, mbo ŋgay nama na pore juliliya. 9 Yál njotɗa, ne iigiya mbo ɓol ndu ge daage pet ge ne ke sone, Yuda ma zḛ ɓya, ba ga Grek ma. 10 Hormo, ne doreya, ne halas ne ndu ge daage pet ge ne ke kwaɗa pe, Yuda ma zḛ ɓya, ba ga Grek ma. 11 Ago vareya ne Dok ta to.

12 Nama ge ne ke sone be ge kwa eya ge Musa ne to ma, a mbo su be ge a kun nama sarya eya ge Musa ne pal, amma nama ge a ne kwa eya a ke sone no ma, a mbo kun nama sarya eya pal. 13 A be nama ge ne za̰ eya ma kat dosol Dok ndwara se ne to, amma a nama ge ne ke mborra eya pal ma mbo kat dosol ne. 14 Swaga ge pehir ge ɗogle ge a ne eya to ma ne ke kaŋ ma ne bama pala eya pal, naa ge ne eya to mbe ma no, nama sḛ ma eya ne bama pala, 15 a ŋgay go kerra eya pal njaŋge njaŋge ne bama dulwak zi. Nama haŋgal ma ŋgay go no me, poseya ne nama dwatɗa ge a ne kaŋge nama, a ka ɗaŋge nama pe me. 16 Nama pe mbo ben zum dam kun sarya ge Dok ne go. Ne fare ge kwaɗa ge mbi ne ta, Dok mbo kun sarya kaŋ ɗimil ge naa dasana ma ne pal ne Jeso Kris ta.

Pala gwanna se to ge Israyela vya ma ne

17 Mo ge ne tol tene Yuda, mo ka deŋge tene eya zi, mo ka uware tene Dok zi, 18 mo ge ne kwa na laar ɓyareya, ge eya ma ne hate mo tal kaŋ ge kwaɗa, 19 mo ge ne uware tene go mo bage wan ɓaal ma uwara ne, kwaya̰l ge naa ge ne tṵ zi ma ne, 20 bage yuwale naa ge ne kwarra to ma, bage hate naa jabso, ne da pe, eya zi, mo da ne viya̰ ge ɓol kwarra ma ne fareba. 21 Mo ɗe, mo ge ne hate naa, amma mo hate tene. Mo ge ne jan naa go nama sé kaŋ to, mo ka sella. 22 mo ge ne jan go ndu fi ne na kon gwale to, mo sḛ ka fi ne mo kaam ma gwale ma. Mo ge ne sen kaŋ sḭḭm ma, mo ka gwan mbo sel kaŋ ge ne nama zok ma zi ma. 23 Mo ge ne uware tene eya zi, swaga yele eya mbe ma pala go no, mo sen Dok. 24 Da ne pe no, a njaŋge no go: «Ne aŋ pe pehir ge ɗogle ma sal Dok no.»

25 Ago ba̰y vyanna da hamba, kadɗa mo ke mborra eya pal, amma kadɗa mo yele eya pala, mo ba̰y vyanna mbe saŋge ba̰y vyanna to. 26 Kadɗa ndu ge ne vya̰ ba̰y to ke mborra eya pal, na ba̰y vyanna to mbe waɗe ba̰y vyanna waɗe to ɗaa? 27 Ndu ge ne vya̰ ba̰y to duur go ge ne ke mborra eya pal, mbo kun mo ge ne vya̰ ba̰y, ge ne njaŋgeya ma ne mo tok go, ge ne ke mborra eya pal to sarya to’a? 28 Ago Yuda ge fareba a be na ge a ne kwa na ne ndwara no to, ba̰y vyanna ge fareba a be na ge ne kwa ne duur ta no to. 29 Amma Yuda ge fareba a na ge ne ɗimil zi, ba̰y vyanna a na ge dulwak ne, ge O̰yom zi, a be njaŋgeya ma pal to. No a ndu ge ne ɓol uwareya ne, be ne naa dasana ma ta to, amma ne Dok ta.