Bulus jan go a gene na gan ga̰l ge Roma ma ne ndwara se ya
25
1 Swaga ge Festus ne mbo ya, ke dam ataa, ɗage ne Sezare mbo Ursalima. 2 Naa ge ke tuwaleya ma ga̰l ma ne Yuda ma naa ga̰l ma mbo ya na ta kaŋge Bulus. A kaɗe na go, 3 na kwa bama a̰se, na gwa̰ ne Bulus ya Ursalima go. A ka ɓyare go bama huli na viya̰ zi hunna. 4 Festus gwan ne nama janna go Bulus swaga ke daŋgay ya Sezare ya go, na sḛ puy na gwan gwan dam mbe ma no pul zi. 5 Jan nama uwale go, kadɗa naa a̰me ma ge mbyatɗa ma ya go nama mbo Sezare dagre ne na, kadɗa fare a̰me ge ndu mbe ne ke ge sone ya go, nama mbo kaŋge na ya go. 6 Swaga ge ne ke dam tiimal ko wol go nama ta, gwan mbo Sezare. Dam ge kwap ge go juju, mbo kat na hool sarya pal, hon wak go a mbo ne Bulus ya. 7 Swaga ge ne mbo ya, Yuda ge ne mbo ne Ursalima ya ma ver na se, a ka e fare ge dṵṵl neneg ma, ne fare ge haŋle ma na pal, amma a mbyat ge ŋgay go nama fare ge fareba ma ne to. 8 Amma Bulus ben tene go: «Mbi be ke sone a̰me to, ko eya ge Yuda ma ne pal, ko zok ge mbegeya ta, ko gan ga̰l Kaysar ta to.»9 Ne ɓyare ke Yuda ma sḛ tuli pe, Festus ele Bulus go: «Mo ɓyare mbo Ursalima, a ba mbo ke mo sarya mbi ndwara go ɗaa?» 10 Bulus gwan ne na janna go: «Mbi ya swaga sarya ge Kaysar ne ndwara se, a kun mbi sarya swaga mbe no go. Mo sḛ puy, mo da ne na kwarra, mbi be ke Yuda ma sone a̰me to. 11 Kadɗa mbi ke ya̰l a̰me, ko mbi ke fare a̰me ge sone ge ne mbyat go a hṵ mbi ya go, mbi ne pool kuri siya to. Amma kadɗa fare ge naa mbe ma ne e mbi pal no a be fare ge fareba ne to ɗe, ndu a̰me ne pool ge ɓyan mbi nama tok go to. Mbi ɓyare go a gene mbi mbo Kaysar ndwara se ya.» 12 Swaga ge Festus ma ne na naa ge yuwaleya ma ne jya̰ ta fare, jan go: «Mo ɓyare ne go mbo Kaysar ndwara se ya, mo gá mbo ɓol Kaysar.»
Bulus gan Agrippa ma ne Berniki ndwara se
13 Dam ma kwaɗa lwak go̰r go, gan Agrippa ma ne na ná vya Berniki mbo ya suwal Sezare go san Festus wak. 14 Ne jo̰ a ke dam ma kaal swak Festus ta, Festus é nama fare ge Bulus ne, jan nama go: «Felise ya̰ ndu a̰me daŋgay zi, 15 swaga ge mbi ne mbo Ursalima ya, naa ge ke tuwaleya ma ga̰l ma ne Yuda ma naa ga̰l ma a mbo ya kaŋge ndu mbe mbi ta, a ɓyare go mbi kṵ sarya na pal. 16 Mbi gwa̰ ne nama janna go, ne hada ge Roma ma ne ta, a ne pool ɓyan ndu ge na naa ge a ne e fare na pal ma tok go be ge a za̰ na ɗaŋge tene pe nama ndwara se to to. 17 Swaga ge a ne mbo ya go go, mbi be ke dṵṵl to, dam ge kwap ge go juju, mbi ka hool sarya pal, mbi ho̰ wak no go a gene ndu mbe ya. 18 Swaga ge na naa ge a ne kaŋge na ma ne mbo ya mbi ndwara se, a be wan na ne fare a̰me ge sone ge mbi ne ka dwat na pal to. 19 A ka ɗaŋgre ta fare ge bama Dok kerra ne pal ɗeŋgo, ne fare ge ndu a̰me ge a ne tol na Jeso ne pal, na ge ne su, amma Bulus jan go na de ne ndwara. 20 Amma mbi ɗe, ne jo̰ ka raseya, mbi be wan fare ge mbi kerra pe to ɗe, mbi ele na no go na ɓyare mbo Ursalima, a ba mbo kun na sarya fare mbe pal de. 21 Ne jo̰ Bulus ɓyare go a mbo ne na fare mbe nṵsiya gan ga̰l ndwara se ya ɗe, mbi ho̰ wak no go a koy na daŋgay zi ɗiŋ, mbi ɓó viya̰ teme na mbo Kaysar ndwara se ya.» 22 Agrippa jan Festus go: «Mbi ɓyare za̰ ndu mbe wàt me.» Festus jan na go: «Mo kwap za̰ na!»
23 Dam ge kwap ge go, a ɗame Agrippa ma ne Berniki ya titim wat zok sarya zi, poseya ne asagar ma ga̰l ma ne naa ga̰l ge suwal ne ma. Wak honna ge Festus ne pal, a gene Bulus ya. 24 Festus jan go: «Gan Agrippa, poseya ne aŋ ge ne i ta ma no pet. Ndi me ndu mbe no, Yuda ma pet a mbo ya kaŋge na mbi ta, ge Ursalima ya go, ko suwal diŋ go. A ka oyya go ndu mbe be mbyat kat ne ndwara to. 25 Mbi ɗe, mbi be ɓol fare a̰me ge na sḛ ne ke ge ne mbya gene na siya zi to. Amma na sḛ ɓyare go a mbo ne na fare gan ga̰l ndwara se ya. A go no, mbi vḭ tene no go mbi teme na mbo na ndwara se ya. 26 Ne jo̰ mbi be ɓol fare a̰me go tem ge njaŋgeya na pal hon gan ga̰l to ɗe, mbi mbo ne na ya aŋ ndwara se no, ge mo ge gan Agrippa ndwara se no, ne da pe, go̰r fare pe haleya go, mbi ba ɓol fare a̰me ge njaŋgeya. 27 Ago, ne mbi ta, ne na viya̰ go to, ge a teme ndu ge daŋgay mbo Roma be ge a wan fare ge a ne kaŋge na pe zum to.»