Bulus mbo Ursalima
21
1 Swaga ge i ne varse ne nama, i her fak kale cat mbo suwal Kos, dam ge kwap ge go, i det ya suwal Rode go, ne na go, i kale mbo suwal Patara. 2 Swaga ge i ne ɓo fak a̰me ge ne har mbo suwal Fenisi, i ndé na go no. 3 Swaga ge i ne dé ya suwal Chipre ndwara go ŋga, i kale mam pul zum ya no cat ndwara kale mbo suwal Siriya, ne da pe a abe kaŋ ma ne fak go uzi suwal Tir go. 4 Swaga ge i ne ɓo naa ge ame hateya ma, i gá katɗa nama ta no ɗiŋ dam ɓyalar. O̰yom ɓyan nama, a jan Bulus go na mbo Ursalima to. 5 Swaga ge i ne nama dam ge katɗa ne á ɗe, a ne bama gwale ma, ne bama vya ma, a ɗame i ya suwal go̰r zum, i ne nama gur i koo ma mam wak go, i ke kaɗeya. 6 Swaga ge i ne nama ne sa̰ ta wak, i ndé fak go, nama sḛ ma gwan di me. 7 I á swaga mborra ge i ne ne fak swaga i ne ɗage ne suwal Tir ya mbo ya suwal Tolemayis go. Swaga ge i ne sa̰ ná vya ma wak, i gá katɗa ne nama dam ɗu ne na duul. 8 Dam ge kwap ge go, i ɗage, i det ya suwal Sezare go, i mbo Filibus, bage oy fare ge kwaɗa, na ge ne ka naa ge ɓyalar ma buwal zi diŋ ya. i gá kat na go. 9 Ka da ne vya kale ma anda, ge a ne ka waage fare ge Dok. 10 Ne jo̰ i ke dam ma kaal swak swaga mbe go, anabi a̰me mbo ne suwal Yahudiya ya, na dḭl Agabus. 11 Swaga ge ne mbo ya set i, abe bit ge Bulus ne, vwal na koo ma ne na tok ma, jan go: «O̰yom ge harcal jan ne: Bage bit mbe no, Yuda ma mbo vwal na go mbe no Ursalima go, a mbo ɓyan na pehir ge ɗogle ma tok go.» 12 Swaga ge i ne za̰ fare mbe ma no, i ne naa ge suwal mbe ma, i kaɗe na ne á ta go na mbo Ursalima to. 13 Na sḛ gwan ne i janna go: «Aŋ te fyal gyana ɗaa? Aŋ te iyal mbi sḛ gyana ɗaa? Ago mbi, mbi jejew ne vwalla pe ɗeŋgo to, amma ne suya ne dḭl ge Bageyal Jeso ne pe Ursalima diŋ.» 14 Ne jo̰ i be day hal na ne fare to ɗe, i gwan gwarge ta na ta to, i jan go: «Ya̰ laar ɓyareya ge Bageyal ne na ke!»15 Go̰r dam mbe ma no go, i nṵsi ta ndwara mbo Ursalima. 16 Naa ge ame hateya a̰me ma ge ne suwal Sezare go ma, a ɗame ya, a mbo ne i mbo eya dwamma ge Nason, ndu ge suwal Chipre ne diŋ, na sḛ ka naa ge a ne ho̰ fareba ge zḛ ge ma buwal zi.
Bulus mbo ɓol Yakub
17 Swaga ge i ne dé ya Ursalima diŋ, ná vya ma ame i ne laar saal. 18 Dam ge kwap ge go, i ne Bulus ma mbo ɓol Yakub, naa ga̰l ma kote ja na ta mwaɗak. 19 Swaga ge ne sa̰ nama wak, wan nama kaŋ ma ge Dok ne ke pehir ge ɗogle ma buwal zi ɗu ne ɗu ne na temel kerra ta. 20 Swaga ge a ne za̰ fare mbe ma, a uware Dok, a jan na go: «Ná vya, mo kwa ya go’a! Yuda ma buwal zi, naa dubu dubu ma a hon fareba go, nama sḛ ma pet a da ne yil gḛ ne eya ge Musa ne pe, 21 a za̰ janna mo pal go, hateya ge mo ne ma zi, mo e Yuda ge ne pehir ge ɗogle ma buwal zi ma sen eya ge Musa ne ma, mo jan nama go, nama vya̰ nama vya ma ba̰y to, nama gwan ke mborra hada ma pal to. 22 Nee ke gyana ɗaa? A fareba, a ma̰ za̰ go mo mbo ja. 23 Ke kaŋ ge i ne jan mo no. Naa ya go anda ge a ne ke wak tuli, 24 abe nama mo pe go, há tene yaɗat poseya ne nama, hé dṵṵl ge nama kaŋ potɗa ne mo pal, ne da pe nama só nama pala ma. Go no, naa pet a ma̰ kwa go fare ge bama ne za̰ na janna mo pal ma nama fare ge hale ma ne, amma mo ɗe, mo ke mborra ya eya ma pal. 25 Kadɗa ne pehir ge ɗogle ma ge a ne ho̰ fareba ma ɗe, i njaŋge nama i dwatɗa ma, ago nama za kaŋ ge a ne tyare nama hon kaŋ sḭḭm ma to, ko swama, ko kaŋ ge ne su wak tumul ma, nama abe ta uzi ne kaya kerra go me.»
26 Dam ge kwap ge go, Bulus abe naa mbe ma, a ne nama hat ta yaɗat, a mbo zok ge mbegeya zi ndwara mbo waage naa dam ge bama hat ta yaɗat ne aya, ge bama ba gá tyare tuwaleya ne ndu ge daage pe.
Wanna ge Bulus ne zok ge mbegeya zi
27 Dam ge ɓyalar mbe ma wak aya go, Yuda ge ne ɗage ne suwal Asiya ya ma, swaga ge a ne kwa na zok ge mbegeya zi, a suti ɓase ma na pal, a wan na. 28 A ka oyya go: «Israyela ma, sya me i ko̰r! Ndu mbe ge ne hate naa swaga ge daage go ke ho̰l ne nee ɓase ma, ne eya ma, ne swaga mbe no ne go no! Ndi ko Grek ma puy, gene nama ja zok ge mbegeya, go no, hat swaga ge harcal mbe ya seŋgre.» 29 Ago zaŋgal, a kwa nama ne Trofimus, ndu ge suwal Efesus ne suwal diŋ, a ka dwat go Bulus gene na mbo zok ge mbegeya zi. 30 Suwal iigi digi gilu, naa ka sya ne swaga ma ya pet, a wan Bulus, a zwal na ne zok ge mbegeya zi ya zum, a dibi zok wak ma ya digi. 31 Ne jo̰ a ka ɓyare go bama hun na hun, ko̰r det ge asagar ge Roma ma ne ma ga̰l ta ya go Ursalima iigi ya digi gilu. 32 Se se no, na sḛ abe asagar ma ne bama ga̰l ma na pe go, a syat so mbo ɓase ma ta ya. Swaga ge a ne kwa asagar ma ga̰l ne asagar ma na pe go ɗe, a ya̰ Bulus be folla. 33 Asagar ma ga̰l mbe mbo ya, wan na, hon wak go a ka̰ na zul ma azi. Ele swaga go, na wuɗi ne de, na ke da de me. 34 Naa a̰me ma ka oy hini, ge may ma ka oy hini me. Ko̰r mbe zi, ne jo̰ be ɓol fare pe ge jwap to ɗe, hon wak go a mbo dol Bulus daŋgay zi. 35 Swaga ge Bulus ne dé ya zok wak ge ndeya wat zi go, asagar ma gá in na in ne yál ge a ne ke na pe. 36 Go no puy ɗe, ɓase ma ka puwaleya na pe go go: «Hṵ me na uzi!»
Bulus kaɗe go a ya̰ na jan fare
37 Swaga ge a ne ɗage wat ne Bulus daŋgay zi, Bulus ele asagar ma ga̰l go na da ne pool hon na viya̰ jan fare de. Na sḛ ele na go: «Mo kwa wak grek kwa’a? 38 Mo te be Masar mbe ge ne abe naa na pe go dudubu anda, a ne nama sya mbo ful pul zi ya dam mbe ma no pul zi mbe ne to’a?» 39 Bulus jan go: «Mbi Yuda ne, mbi ndu ge suwal Tarsis ge ne Kilikiya go ne, mbi vya suwal ge suwal ga̰l ge naa ne kwa na ne ne, mbi kaɗe mo, ya̰ mbi jya̰ ɓase ma fare.» 40 Asagar ma ga̰l hon na viya̰. Bulus mḛ viya̰ wak haal digi, kar ɓase ma na tok, naa zane kirip. Her fare jan nama ne wak ibriniya go: