Bulus suwal Korinte go
18
1 Go̰r go, Bulus ɗage ne suwal Atena go, mbo suwal Korinte ya. 2 Set Yuda a̰me, na dḭl Akila, na sḛ ndu ge suwal Pontus ne. A ne na gwale Briskila ja jyat ne suwal Italiya go gale. Ne da pe Klodiyus ho̰ wak go Yuda ma ɗage ne suwal Roma go uzi. A ne nama gá katɗa dagre. 3 Ne jo̰ a ka ke temel ge ɗu ge pe, gá katɗa ne nama, a gá ke temel dagre. Ago a ka nṵsi ba̰r ge lar gur ma. 4 Dam ɗigliya ge daage go ka mbo Sinagog zi, ka e Yuda ma ne Grek ma vin na fare go na fareba.5 Swaga ge Silas ma ne Timotawus ne ya̰ ne Makedoniya ya ɗe, Bulus gá ne fare ge Dok ne pe waageya ɗeŋgo, ka ŋgay Yuda ma go Jeso Kris ne. 6 Ne jo̰ Yuda ma ɗage gage na ne fare, a ka sal na me, Bulus gasage na ba̰r ma, jan nama go: «Aŋ swama ka aŋ pal, mbi naji, ne ga ne zḛ no, mbi gá saŋge mbi ndwara pehir ge ɗogle ma ta.» 7 Ɗage ne swaga mbe go, mbo kat Titus na ge a ne tol na Justus diŋ ya, na sḛ ndu ge sya Dok vo ne, na yàl ya Sinagog ziyar go gwa. 8 Go no puy ɗe, Krisbus ga̰l ge Sinagog ne hon fareba Bageyal ta poseya ne na yàl mwaɗak. Naa gḛ ne suwal Korinte go ge a ne za̰ Bulus ma a hon fareba, a ke nama baptisma me.
9 Ɗaal zi, Bageyal jan Bulus fare daalam zi go: «Sya vo to, ka jan naa fare, ɗame to! 10 Ago mbi dagre ne mo, ndu a̰me ge ke mo fare to, ne da pe mbi da ne naa ne suwal mbe diŋ.» 11 Gá kat ne nama ɗiŋ del ɗu ne saba myanaŋgal, ka hate nama fare ge Dok ne.
12 Swaga ge Galiyon ne ka bage ne ka dol na ndwara suwal Akaya pal ɗe, Yuda ma ɗage digi wak dagre ɗu Bulus pal, a zwal na mbo swaga sarya se ya, 13 a jan go: «Ndu mbe no e naa uware Dok viya̰ ge ɗogle go, be eya ge Musa ne pal to.» 14 Swaga ge Bulus ne ka ɓyare her fare janna, Galiyon jan Yuda ma go: «Yuda ma, te na ka ya̰l a̰me, ko fare ge sone a̰me, mbi te ya za̰ aŋ kwaɗa, ne na viya̰ go. 15 Amma kadɗa aŋ gage ta ge fare ma pal, ko dḭl ma pal, ko ne eya ge aŋ ne ma pal ɗe, a aŋ fare ne. Mbi vin kat bage kun aŋ sarya to.» 16 Teme nama mbo swaga sarya ya. 17 Nama sḛ ma pet, a wan Sosten ga̰l ge Sinagog ne, a fol na swaga sarya go, amma Galiyon da̰a̰me ne nama pe to.
Bulus gwan mbo suwal Antiyokus
18 Bulus gwan ke kaal swak Korinte. Ne go̰r go, ya̰ ná vya ma, her fak mbo suwal Siriya poseya ne Briskila ma ne Akila. Ne jo̰ na gá dḛ ke wak tuli Dok ndwara se ɗe, sot na pala uzi suwal Keŋkriya go. 19 A det ya Efesus go, ya̰ na kaam ma, mbo wat Sinagog zi, a ne Yuda ma ka wan ta fare ma pe. 20 A kaɗe na go na ka gale ne bama swak, amma na sḛ kuri. 21 Swaga ge ne ɗage ya̰ nama, jan nama go: «Kadɗa Dok vinna, mbi mbo gwan’a aŋ ta.» Ne Efesus go, her fak mbo. 22 Swaga ge ne ka̰ na koo Sezare go, (mbo Ursalima) mbo san ɓase ge Dok ne ma wak, ɗage mbo Antiyokus ya. 23 Gá katɗa go swak, ɗage gwan mbo suwal Galatiya, ne Frigiya, ka sirsi naa ge ame hateya ma hon fareba zi.
Apollos ge suwal Efesus ma ne Korinte go
24 Yuda a̰me na dḭl Apollos, a ndu ge suwal Alezandrewus ne, na sḛ ndu ge ka̰l jan fare kwaɗa ne, kwa maktub kwaɗa me, mbo ya suwal Efesus go. 25 A hate na Viya̰ ge Bageyal ne, ne jo̰ ka da ne sḛ fogor, ka wan fare ge Jeso ne pe, ne hate naa na ne na viya̰ go tetem, amma na sḛ kwa baptisma ge Yohanna ne ɗeŋgo. 26 Mbo Sinagog zi, ɗage jan fare ndaar kaka. Swaga ge Briskila ma ne Akila ne za̰ na, a wan na ya bama ta, a hare na viya̰ ge Dok ne pe zum gagaraw. 27 Ne jo̰ ka ɓyare go na kale mbo Akaya ya ɗe, ná vya ma vin na, a njaŋge maktub hon naa ge ame hateya ge ne suwal mbe go ma, nama ame na kwaɗa. Swaga ge ne dé ya suwal mbe go, mbar nama ge ne ho̰ fareba kwa a̰se ge Dok ne zi ma gḛ ge be to. 28 Ago ne pool gḛ ka ɓeŋge Yuda ma naa ndwara go pet, ne da pe ka ŋgay nama ne fare njaŋgeya ma ta go Jeso Kris ne.