Bitrus wan naa ge ne Ursalima go ma fare pe
11
1 Naa ge temeya ma ne ná vya ma ge ne Yahudiya go ma za̰ go pehir ge ɗogle ma ame fare ge Dok ne ya go me. 2 Swaga ge Bitrus ne gwa̰ ya Ursalima go, naa ge vyan ba̰y a ɗage gool na pal, 3 a jan na go: «Mo te wá naa ge be vyan ba̰y to ma diŋ gyana, mo ba zam kaŋzam ne nama ɗaa?» 4 Bitrus é pe wan nama fare pe zum gagaraw, jan nama go: 5 «Mbi ka ke kaɗeya suwal Yafa diŋ, mbi ɓo daalam no, ndi kwa kaŋ fiyal dimma ne ba̰r go wanna keŋ ma go anda, surbiya ne pḭr digi ya se, ɗiŋ det ya mbi ta. 6 Swaga ge mbi ne ndi na tyatyat, mbi kwa kavaar ge ne kḛ ne suwar zi, ne kavaar ge ful zi ge ma, ne kaŋ ge ne sar ne bama pul ma, ne njoole ma. 7 Mbi za̰ ka̰l a̰me ka jan mbi go: ‹Bitrus, ɗage digi, vya̰, mo zam!› 8 Mbi gwa̰ ne janna no go: ‹To, Bageyal, kaŋ ge seŋgre a̰me, ko ge yaɗat to be wat mbi wak zi dam ɗu to bat.› 9 Ka̰l mbe gwan jan mbi ne digi zi ya ge ndwara azi no go: ‹Kaŋ ge Dok ne há na yaɗat, kaage mo jan go na seŋgre to!› 10 Kaŋ mbe ke go no ɗiŋ ndwara ataa, ɗage gwan digi ya no. 11 Ndi, swaga mbe go juju, naa ataa mbo ya mḛya yàl ge i ne ka ne na diŋ wak go no, a teme nama da ne suwal Sezare ya mbi ta. 12 O̰yom jya̰ mbi no go, mbi mbo poseya ne nama be ge tumriya. Ná vya ge myanaŋgal mbe ma no a ɗame mbi ne, i ne nama wá yàl mbe dagre. 13 Na sḛ wá i fare pe, pe gyana maleka ne dya̰ tene nà ta, na diŋ, ne jya̰ go: ‹Teme ndu mbo tol Siman ge a ne tol na Bitrus ne suwal Yafa ya, 14 na sḛ ma̰ jan aŋ ne mo yàl mwaɗak fare ge máya ne.› 15 Ndi, mbi gale ne swaga wan nama fare pe go, O̰yom harcal sugi nama pal no, dimma ne dḛ ne sugi nee pal pe eya go go. 16 A go no mbi dwa ne fare ge Bageyal ne no, ge ne jya̰ go: ‹Yohanna ke baptisma mam se, amma aŋ, a mbo ke aŋ baptisma ne O̰yom ge mbegeya.› 17 Kadɗa Dok ho̰ nama bobo dimma ca ne ho̰ nee go, ne nee ne ho̰ fareba Bageyal Jeso Kris ta pe ɗe, mbi wuɗi ne ɗo, mbi ba gage tene ne Dok ɗaa?» 18 Swaga ge a ne za̰ fare mbe ma no, a zane wak ɗamal, a gá uware Dok, a ka jan go: «Dok ho̰ naa ge pe ɗogle haseya ge go nama dé ya ndwara zi me!»Ɓase ge Dok ne ma ge ne suwal Antiyokus go
19 Nama ge a ne ɓarse se ge swaga wak nonna ge siya ge Estefanus ne go ma a det ɗiŋ mbo suwal Fenisi, ne suwal Chipre, ne suwal Antiyokus ya. Amma a ka jan fare ge Dok ne Yuda ma ta ɗeŋgo. 20 Naa a̰me ma ne nama buwal zi a ka naa ge suwal Chipre ma ne suwal Siren ma, swaga ge a ne dé ya Antiyokus go, a jan Yuda ge ne far wak grek ma fare ge Bageyal Jeso ne. 21 Pool ge Bageyal ne kat poseya ne nama, ne pe no, naa gḛ a hon fareba a saŋge ya Bageyal ta. 22 Fare mbe det ya ɓase ge Dok ne ma ge ne Ursalima go ma togor zi, a teme Barnabas mbo suwal Antiyokus. 23 Swaga ne mbo ya, ne kwa kwaɗa ge Dok ne ke ne nama, ke laar saal, moɗege nama pet, nama ka mborra Bageyal zi ne dulwak ɗu. 24 Ago na sḛ ka ndu ge dulwak kwaɗa, wiya ne O̰yom harcal, ne dulwak hon fareba me. Naa gḛ a saŋge ya Bageyal ta. 25 Barnabas ɗage mbo suwal Tarsis, mbo ɓyare Sawul pe ya. 26 Swaga ge ne ɓo na, mbo ne na ya Antiyokus go. A ke del ne na duul jyan swaga hate ɓase ge Dok ne ma go. A Antiyokus go ge a ne e pe tol naa ge ame hateya ma «Naa ge Kris ne ma».
27 Dam mbe ma pul zi, anabi ma ɗage ne Ursalima ya mbo ya Antiyokus go. 28 A̰me ɗu ne nama buwal zi, na dḭl Agabus, ɗage digi mḛya, ne O̰yom ta waage go baktar mbo det suwar pal pet. Baktar mbe dé zaman ge gan Klodiyus ne zi. 29 Naa ge ame hateya ma vin ta go bama teme bobo mbyatɗa ge ndu ne pal hon ná vya ge ne ka ne Yahudiya go. 30 A ker mbe go. A teme kaŋ hon naa ga̰l ma ge Barnabas ma ne Sawul tok go.