Fare sḭ ge gwale kumur ma ne bage kun sarya ne
18
1 Jeso ke nama fare ne sḭ ndwara ŋgay nama go nama ka ke kaɗeya ɗaɗak be ge nama sḛ ma iyal tiliŋ to. 2 Jan go: «Bage kun sarya a̰me ka suwal a̰me go, na sḛ sya Dok vo to, sya naa dasana ma ndwara vo to me. 3 Gwale kumur a̰me ge ne ka suwal mbe diŋ, ka mbo ya na ta janna go: ‹Kṵ i ne mbi ndu ge huur fare buwal nde.› 4 Kuri dam ma kaal. Ne go̰r go, jan tene go: ‹Ko ne jo̰ mbi sya Dok vo to, mbi sya naa dasana ma ndwara vo to puy ɗe, 5 ne da̰a̰meya ge kumur mbe ne da̰a̰me mbi pe, a ŋgat mbi kun na sarya. Na kaage na gwa̰ ya ɓa mbi pala to›.» 6 Bageyal jan go: «Za̰ me fare janna ge bage kun sarya ge dosol to ne jya̰! 7 Dok mbo gá be ge kun na naa ge talla ge ne tol na ɗaal ne gyala ma sarya ɗaa? Mbo ke dṵṵl nama fare pal ɗaa? 8 Mbi jan aŋ, mbo kun nama sarya avun cap. Amma swaga ge Vya ge ndu ne mbo gwan ja, mbo ɓol hon fareba suwar pal ɗaa?»Fare sḭ ge Farisi ma ne bage tyare kaŋ ne
9 Gwan ke fare sḭ mbe no ne naa ge ne ndil ta go bama dosol Dok ndwara se, ge a ne sen naa ge may ma me. 10 Jan go: «Naa azi a mbo zok ge mbegeya zi ke kaɗeya. Ge ɗu Farisi ne, ge may bage tyare kaŋ ne me. 11 Farisi mbe mḛ digi, ka kaɗe go: ‹O Dok, mbi gwan ne mo gugu ne mbi ne ka dimma ne naa ge may ma go to, nama ge syala ma, ge dosol to ma, ge ke kaya ma, ko dimma ne bage tyare kaŋ mbe no go to. 12 Mbi wan asiyam ndwara azi dumas ge ɗu pul zi, mbi hon mbi kaŋ ge mbi ne ɓol ma wak pet ɗu ne wol zi.› 13 Bage tyare kaŋ mḛ uzi ya, ka ɓyare go na hé na ndwara digi to, amma ka njet na ko̰l janna go: ‹O Dok, kwa mbi ge ke sone mbe no a̰se.› 14 Mbi jan aŋ, ndu mbe no gwa̰ na diŋ ya benna waɗe ge may. Ago ndu ge daage pet ge ne hé na pala digi, a mbo gwan ne na pala se, ndu ge ne gwan ne na pala se, a mbo he na pal digi.»
Jeso é naa jabso wak busu
15 A gene na naa jabso ge kare ma ya, ne da pe na e na tok nama pal. Swaga ge naa ge ame hateya ma ne kwa no, a ka mḛre nama. 16 Amma Jeso tol nama ya na ta, jan go: «Ya̰ me naa jabso nama mbo ya mbi ta, tele me nama to, ago muluk ge Dok ne da ne naa ge ne nama go ma pe. 17 Fareba, mbi jan aŋ, ndu ge daage pet ge ne mbo ame muluk ge Dok ne ya dimma ne vya jyale go to, mbo wat na zi to bat.»
Ndu ge gan ma ne Jeso
18 Ga̰l a̰me ele na Jeso go: «Bage hateya ge kwaɗa, mbi ke gyana ɗo, mbi ba zam ndwara ge ɗiŋnedin joo ɗaa?» 19 Jeso jan na go: «Mo te tol mbi bage kwaɗa gyana ɗaa? Ndu a̰me ge kwaɗa to, a Dok ɗu kikit. 20 Mo kwa wak honna ma kwa: Mo gale hun siya baca, mo gale ke zina ɓaca, mo gale ke sayda ge hale mo kon pal ɓaca, mo ho̰ mo bá ma ne mo ná hormo.» 21 Ga̰l mbe gwan ne na janna go: «Kaŋ mbe ma no pet, mbi ke mborra nama pal da ne mbi bool ya day.» 22 Swaga ge Jeso ne za̰ na, jan na go: «Kaŋ woɗege mo ya go ɗu. Yá mo kaŋ ma uzi mwaɗak, mo var naa ge a̰se ma nama, mo mbo ɓol kaŋ kwaɗa ma digi zi ya, mbo ya, kare mbi pe ya.» 23 Swaga ge ne za̰ fare mbe no, na duur su leɗet, ne da pe ka da ne kaŋ ɓolla ma gḛ ge be to. 24 Swaga ge Jeso ne kwa na duur suya leɗet ɗe, jan go: «A haŋle ge be to ge ndu ge ne kaŋ ɓolla ma gḛ wat muluk ge Dok ne zi. 25 A fogor ge jambal wat libra ndwala ge ndu ge ne kaŋ ɓolla wat muluk ge Dok ne zi.» 26 Naa ge a ne za̰ na ma, jan go: «A wuɗi day máya ne ɗaa?» 27 Na sḛ jan go: «Ne Naa dasana ma ta, day to. Amma kaŋ ma pet a day day ne Dok ta.» 28 Bitrus jan go: «Ndi, i ya̰ i kaŋ ma, i kare mo pe no.» 29 Na sḛ jan nama go: «Fareba mbi jan aŋ, ndu ge ne mbo ya̰ na yàl ya, ko na gwale, ko na ná vya ma, ko na bá ma, ko na vya ma, ne muluk ge Dok ne pe, 30 dam mbe ma no zi mbo ɓol kaŋ ma gḛ waɗeya, dam ge ne mbo ya ma zi mbo gwan ɓol ndwara ge ɗiŋnedin me.»
Jeso gwan waage na siya ne na tanna ge ndwara ataa
31 Abe ge wol para azi ma ya uzi, jan nama go: «Ndi, nee mbo ne go mbo Ursalima, kaŋ ma ge anabi ma ne njaŋge Vya ge ndu ne pal ma pet, nama wak mbo wi. 32 Ago a mbo ɓyan na pehir ge ɗogle ma tok go, a mbo cot ta ne na, a mbo ke na yál, a mbo sen waktwara na ta, 33 swaga ge a ne mbo fol na ya ne ɓol, a mbo hun na, dam ge ataa go, mbo tan digi.» 34 A wan fare mbe pe to. Fare mbe ka woyya nama ta, a be wan na fare ge ne jya̰ mbe ma pe to.
Jeso zon ɓaal
35 Swaga ge ne ya̰ ya Jeriko ta gwa, ɓaal a̰me ne katɗa viya̰ kiya̰r go kaɗe kaŋ. 36 Swaga ge ne za̰ ɓase ma ko̰r kaleya, ele swaga go na ma kaŋ ke ne de. 37 A jan na go na Jeso ge suwal Nazaret ne kale ne. 38 Na sḛ oy digi go: «Jeso, Dawda vya, kwa mbi a̰se!» 39 Naa ge a ne ka mbo Jeso ndwara zḛ ma a ka mḛre na go na zane, amma na sḛ ka gwan oyya digi ndaar go: «Dawda vya, kwa mbi a̰se!» 40 Jeso mḛ se, hon wak go, a mbo ne na ya na ta. Swaga ge ɓaal ne mbo ya na ta, Jeso ele na go: 41 «Mo ɓyare go mbi ke ne mo da ɗaa?» Jan go: «Bageyal, mbi gwan kwa swaga.» 42 Jeso jan na go: «Kwa swaga, hon fareba ge mo ne má mo go.» 43 Se se no, na ndwara tyan, gá kare Jeso pe, ka uware Dok. Swaga ge ɓase ma ne kwa no, a ɗage uware Dok me.