MAKTUB GE
ANABI MALACI
NE
1
1 Fare ge Bage ɗiŋnedin ne jya̰ Israyela vya ma ne Malaci wak zi.Bage ɗiŋnedin tá Israyela vya ma
2 A mbi Bage ɗiŋnedin jan ne: «Mbi laar wa̰ aŋ wan. Aŋ me, aŋ ele mbi go: ‹A ma kaŋ ŋgay ne go, mo laar wa̰ i wan ɗaa?› Esawu te be Yakub ná vya ne to’a? Mbi ele aŋ. Mbi laar wa̰ Yakub, 3 mbi kwane Esawu no. Mbi burmi nama suwal ge ne swaga njal go ma ya uzi, nama joo pala ma ga ya ha̰na ma swaga kadɗa. 4 Kadɗa go Edom ma jan go: ‹A burmi i suwal ma burmi puy ɗe, i mbo gwan sin nama digi›. Amma Bage ɗiŋnedin, Bage naa ge mbal pore ma ne jan go: A mbo ka sin digi, mbi mbo ka kat ne gulla pe me. A mbo tol nama go ‹suwal ge laar pisil, pehir ge Bage ɗiŋnedin ne mḛre nama ɗaɗak›. 5 Aŋ ge Israyela vya ma, aŋ ndwara fa̰ ma mbo kwar kaŋ mbe ma no pet, aŋ mbo jan go: ‹Bage ɗiŋnedin ŋgay pool ge na ne ge ɓaŋlaŋ diŋ warbe ge suwal Israyela go̰r zum ya›.»
Mḛreya ne tuwaleya kerra ge ne na viya̰ go to ma pe
6 Bage ɗiŋnedin, Bage naa ge mbal pore ma ne jan naa ge ke tuwaleya ma go: «Vya hon na bá hormo, dore hon na bageyal hormo me. kadɗa mbi aŋ bá ne ɗe, a ma hormo pe ge aŋ ne hon mbi ne ɗaa? Kadɗa mbi aŋ Bageyal ne ɗe, aŋ hon mbi hormo to da ne da pe ɗaa? Aŋ jan go: ‹I sen mo da ne ma kaŋ ma ta ɗaa?› 7 Ago, aŋ tyare ne mbi twal tuwaleya pal kaŋzam ge seŋgre ma, aŋ ka gwan janna go: ‹I sen mo da ne ma kaŋ ɗaa?› Twal tuwaleya ge Bage ɗiŋnedin ne na hamba to. 8 Swaga ge aŋ ne tyare kavaar ge ndwara ɓaal ma, ge giɗi ma, ne ge moy ma hon mbi, te be ya̰l ne to’a? Aŋ gale tyare nama hon aŋ naa ge ne dó bama ndwara ne aŋ suwal ma pal gale, nama sḛ da ne pool ke tuli, ko a ame aŋ ne laar saal ɗaa? Mbi Bage ɗiŋnedin, Bage naa ge mbal pore ma ne, mbi ele aŋ gale. 9 Se no ɗe, kaɗe me mbi Dok ge aŋ ne, mbi ma̰ kwa aŋ a̰se. Aŋ dwat go mbi da ne pool ame aŋ ne laar saal swaga ge aŋ ne ke kaŋ mbe no go ɗaa? Mbi Bage ɗiŋnedin, Bage naa ge mbal pore ma ne, mbi ele aŋ gale. 10 A golgo ndu a̰me ɗu ne aŋ buwal zi na mbo dibi mbi zok wak ma digi, ne da pe, aŋ mbo dun ol ge mbi twal tuwaleya pal baŋ yak to. Mbi za̰ tuli ne aŋ ta to, Bage ɗiŋnedin, Bage naa ge mbal pore ma ne jan ne. Kaŋ ge aŋ ne tyare nama ne aŋ tok zi ma, mbi ame nama to.
11 Ne cya̰wak ɗiŋ mbo gasamal mbi dḭl ɓol uwareya ge ɓaŋlaŋ ne pehir ma ta pet. Ge swaga ge daage ge go pet, naa mbo ka til dukan ne tuwaleya ge harcal ma hon mbi. Ago mbi dḭl mbo kat ɓaŋlaŋ pehir ge ɗogle ma buwal zi, Bage ɗiŋnedin, Bage naa ge mbal pore ma ne jan ne. 12 Amma aŋ ɗe, aŋ sen mbi swaga ge aŋ ne jan go: ‹Twal tuwaleya ge Bageyal ne seŋgre, na kaŋzam ge ne hon, na mbarra to›. 13 Aŋ jan go uwale: ‹A kaŋ lwage naa ne baŋ›. Aŋ sen mbi sen baŋ, Bage ɗiŋnedin, Bage naa ge mbal pore ma ne jan ne. A gene ya kavaar ge sella ma, ge giɗi ma, ge moy ma tyare hon mbi. Mbi ele aŋ, aŋ dwat go, mbi da ne pool ame nama ɗaa? 14 Wak vḛneya na ka ndu ge syala pal, na ge ne kavaar son na kavaar ma buwal zi, ge ne ke wak tuli go na tyare na hon Bageyal, gwan wan kavaar ge do̰yya tyareya. Ago mbi gan ga̰l ne, pehir ge ɗogle ma pet a sya mbi dḭl vo, Bage ɗiŋnedin jan ne.»