Jonas 4

Dok hate Jonas kwar a̰se ge na ne

1 Fare mbe zá̰ Jonas sḛ tuli to bat, ɓol tiiɗiya ge be to. 2 Na sḛ kaɗe Bage ɗiŋnedin, jan na go: «O! Bage ɗiŋnedin, te be fare ge mbi ne ka janna swaga ge mbi gale ne mbi suwal ya mbe ne to’a? Da ne pe no, mbi ha tene sya mbo Tarsisa ya no. Mbi kwa kwa tyatyat go, mo Dok ge kwaɗa ne, Bage kwa naa a̰se ne, mo dṵṵl pore kerra zi, mo wiya ne siŋli kerra, ne bage ne saŋge ya se ne dwatɗa ge ke ndu sone go. 3 Ne se no, O Bage ɗiŋnedin, mbi kaɗe mo, he mbi o̰yom, a golgo mbi su, ge mbi kat ne ndwara.»

4 Bage ɗiŋnedin gwan ne na janna go: «A kwaɗa ge mo ke laar hotɗa ɗaa?» 5 Jonas wat ne suwal Ninive diŋ ya zum, mbo kat suwal pala ham ya. Ɗur gur, kat na zi ndwara da̰re kaŋ ge ma̰ ne mbo kerra suwal Ninive diŋ.

6 Swaga mbe go, Bage ɗiŋnedin Dok é geɗeɗe pyar ya digi, don ga̰l, ndwara hon soŋgoy Jonas pal, ne é na haŋgal se ne na dwatɗa ge sone ma go me. Jonas laar ke saal ge be to ne geɗeɗe mbe pe. 7 Amma dam ge kwap ge go, cya̰wak pala swaga ne ɓaya ya uzi go, Dok teme wagal ya zam geɗeɗe mbe, geɗeɗe mbe fya̰ uzi. 8 Swaga ge gyala ne ndwa, Dok é saam ge ol kwalla ne le ham ya, gul geɗeɗe mbe se, Jonas gá gyala go war, ka ɓyare njiya. Jonas tol siya na pal, jan go: «A golgo mbi su, ge mbi kat ne ndwara.»

9 Dok jan na go: «A kwaɗa ge mo ke laar pisil ne geɗeɗe mbe no pe ɗaa?» Jonas gwan ne na janna go: «A kwaɗa ge mbi vḛne mbi laar, diŋ mbi tol siya mbi pal.» 10 Bage ɗiŋnedin jan na go: «Mo, mo da ne dulwak kwar a̰se ne geɗeɗe mbe no pe, na ge mo ne njó yál ne na pe to, ko ge mo ne ɗḭ na ne to pet, amma ɗage ne suwar se ya donna ɗaal ɗu kolol, ge ɗaal ge ɗu pul zi me fya̰ uzi no. 11 Mbi ɗe, ne suwal ga̰l Ninive pe, mbi ba kat ne dulwak kwar a̰se to ne’a? Na ge naa dasana ma ne diŋ dudubu kis para wara azi, ge a ne kwar varse kwaɗa ma ne sone buwal to, poseya ne kavaar ma gḛ ge be isiya me.»