Laar wanna ge Dok ne, ne wak za̰ya to ge Israyela ne
11
1 Swaga ge Israyela ne ka bool,mbi laar wa̰ na.
Mbi tó mbi vya ne suwal Masar ya zum.
2 A ka tol nama ya,
amma a abe ta ne nama ta uzi ya no,
a gá mbo tyare tuwaleya hon Baal ma no,
a gá mbo ɗusi dukan hon kaŋ sḭḭm ge cerra ma no.
3 A mbi, mbi hate Efrayim viya̰ mborra ne,
mbi kote na mbi ko̰o̰l zi ne,
amma be kwa go mbi dó mbi ndwara na pal ne to.
4 Mbi kotme tene ɗame nama dimma ne naa ne ɗame vya go,
ge laar wanna zi.
Mbi ka kubi na mbi ka̰l go, dimma ne ná ne kote vya kare go,
mbi ka hon na kaŋzam me.
5 A mbo gwan mbo suwal Masar to,
a suwal Asiriya mbo ke muluk nama pal ne,
Ne da pe, a kuri be ge gwan’a mbi ta.
6 Pore mbo kat na suwal ma go pet,
mbo gul na gulum ga̰l ma se,
mbo burmi nama uzi,
ne nama dwatɗa ge sone ma pe.
7 Mbi ɓase ma saŋge mbi ya bama go̰r,
a tol nama go, nama ndi bage ge ne digi zi ya puy ɗe,
amma ndu a̰me ge her nama pala digi to.
8 Efrayim, mbi ke ne mo gyana ɗaa?
Israyela, mbi ɓya̰ mo uzi ya’a?
Mbi ke mo dimma ne suwal Adma ma ne Seboyim go’a?
Mbi da ne iigiya ne mbi zi,
dwatɗa e mbi sḛ ya tinna.
9 Mbi mbo kat mbi laar ol pal baba to,
mbi mbo gwan’a burmi Efrayim uzi to,
ago mbi Dok ne, mbi be ndu dasana ne to.
ge aŋ buwal zi mbi Dok ge mbegeya ne,
mbi mbo gwan’a aŋ pal ne laar ol to.
10 A mbo ka kare Bage ɗiŋnedin pe.
Dimma ne sonne go, mbo ka pyanna.
Swaga ge ne mbo ɗageya ka pyanna,
na vya ma mbo gwan sya ya ne vo ne siya ya.
11 Ne suwal Masar ya, a mbo gwan sya ya ne vo
dimma ne njoole ne ɗage go,
a mbo gwan ne suwal Asiriya ya dimma ne maale go.
Mbi mbo gwan ne nama ya kat nama suwal go,
ka̰l ge Bage ɗiŋnedin ne.