Danyel 12

Dam ge kḭḭmi ma ne dam ge tanna

1 Dam mbe ma zi ya, maleka ma ga̰l Mikayel, na ge ne ɗaŋge mo naa ma pe mbo ɗage ya. Dam mbe mbo kat dam ge kḭḭmi, ne dunya pe dolla ya day ɗiŋ mbo dam mbe ma zi ya, kḭḭmi hir ge go mbe be kat ɗu to. Ago, dam mbe ma zi ya, naa ge mo ne ma pet ge nama dḭl ne njaŋge ne maktub zi ma mbo má. 2 Naa gḛ ge a ne fí dam ne taal siya se ma mbo kore digi, naa a̰me ma ne ndwara ge ɗiŋnedin pe, naa a̰me ma ne saaso, ne senna ge ɗiŋnedin pe me. 3 Naa ge zwama ma mbo ka serra cicim ne kaŋ ge ne digi ma go, nama ge ne mbo gene naa ja gḛ ge dosol zi ma mbo ka serra dimma ne guwa̰r ma go ɗaɗak ne ɗiŋnedin.

4 Mo Danyel, koy fare mbe ma no ɗimil jyan, bḛ maktub mbe fare ma pe zum to ɗiŋ mbo dam pe aya go. Naa gḛ a mbo isi na, nama kwarra mbo don zḛ.

Dam pe aya woy woy

5 Mbi Danyel, daalam ge mbi ne mbe zi, mbi kwa naa azi ne mḛya maŋgaɗam wak go, ge ɗu mam le may ya, ge azi mam le may go me. 6 A̰me ɗu ne nama buwal zi jan ndu ge ne ka̰ ba̰r ge siŋli na ta, na ge ne mḛ ne maŋgaɗam pul go go: «Kaŋ ajab mbe ma pe mbo á ma swaga go ɗaa?» 7 Ndu ge ne ka̰ ba̰r ge siŋli, ge ne mḛ ne maŋgaɗam pul go mbe abe na tok ma digi jwak, mbi za̰ na janna go: «Mbi guni tene ne dḭl ge Bage ne ka ne ndwara ɗiŋnedin ne zi, kaŋ mbe ma no a mbo ke del ataa ne nus. Nama wak mbo wi swaga ge naa ge mbegeya ma pool ne mbo á rerege go.»

8 Mbi ka za̰ fare mbe ma, amma mbi wan nama pe to. Mbi ele go: «Mbi Bageyal, fare mbe ma wak aya gyana ɗaa?» 9 Gwan ne mbi janna go: «Danyel, mbo, ago fare mbe ma woy woy ɗiŋ dam pe aya go ɓya. 10 Naa gḛ a mbo ɗyage nama, a hat kwaya̰l harcal, dimma ne naa ne ɗyage fool kaal ol zi go. Naa ge sone ma mbo ka zam zḛ sone kerra ge bama ne zi, a mbo ɓol viya̰ wan fare mbe ma pe to, amma naa ge zwama ma a mbo wan nama pe. 11 Ne swaga ge a ne tele tuwaleya ge dam ne dam be kerra to ma ne ɗurra ge a ne ɗù kḭḭm ge seŋgre kakatak digi go, dam mbo kale dam dubu ɗu para kikis azi para wara lamaɗo. 12 Wak busu mbo kat ndu ge ne mbo wan tene ya ɗiŋ det dam dubu ɗu para kikis ataa para tapolɗu para anuwa̰y ya pal. 13 Amma, mo Danyel wa̰ tene ɗiŋ mbo mo dam pe aya go, mo mbo ɓol ɗigliya, mo mbo ɗage digi ame mo joo dam pe aya go.»