Ezekel 40

DOK ŊGAY EZEKEL NA ZOK GE GIYA̰L

40-48

Daalam ge zok ge giya̰l ne

1 Del wara azi para anuwa̰y go̰r paal ge i ne go, na del pe eya go, dam wol ge saba ne go, del wol para anda go̰r detɗa ge suwal Ursalima ne go, dam mbe go juju, pool ge Bage ɗiŋnedin ne wan mbi, gene mbi mbo ya go. 2 Daalam zi, Dok gene mbi mbo suwal Israyela ya, e mbi njal ge haal cat pala digi, na le ge mbii ge go, swaga a̰me kat dimma ne suwal go. 3 Gene mbi ya go, mbi kwa ndu a̰me mḛya zok wak go, na dir kat dimma ne fool ŋgirma go. Kat ne taal ge ɓoso lin ne na tok zi, ne kereŋ ŋgay kaŋ me. 4 Ndu mbe jan mbi go: «Mo ndu dasana, ndi ne mo ndwara, za̰ ne mo togor. E mo haŋgal ge kaŋ ge mbi ma̰ ŋgay mo ya ma pal pet, ago a gene mo ya go go da ne kwar kaŋ mbe ma pe. Waage Israyela vya ma kaŋ ge mo ne kwa ma pe pet.»

5 Ndi, mbi kwa gulum ver zok zi. Ndu mbe wan kereŋ ŋgay kaŋ na tok go, na twala ka tok pyaso ŋgayya myanaŋgal, ago tok pyaso ŋgayya ge daage ka da ne tok pul fiyal ɗu ɗu bama wak go. Ŋgay gulum mbe fiyal ma ne na haal, ɓol go nama da ne kereŋ mbe ɗu ɗu. 6 Mbo ya viya̰ wak ge ne saŋge ndwara le ge ham go, ka da ne koo ge ndeya ma, ndé ya digi, ŋgay na ɗugul mbo se, ka kereŋ ɗu. 7 Zok vya ma ka viya̰ wak ge wat zi ya mbe go, nama twala ka kereŋ ɗu ɗu, nama fiyal kereŋ ɗu ɗu me. Gulum ge ne ka nama buwal zi fiyal ka tok pyaso ŋgayya anunuwa̰y. Bula wak ge mbo wat zok ge mbegeya zi ka me, na twala kereŋ ɗu. 8 Ŋgay bula wak me: 9 na twala tok pyaso ŋgayya tiimal, na gulum ma sinna digi fiyal tok pyaso ŋgayya azizi. Bula wak ka yapul le ge zi ge go. 10 Zok vya ge ne viya̰ wak le ge ham ge go mbe ma ka ataa le ge ɗu go, ataa le ge may go me, a ka mbyat ta mwaɗak. Gulum ge ne ka nama buwal zi ma ka mbyat ta me. 11 Ŋgay fiyal ge zok wak ne, ɓol tok pyaso wol, na haal tok pyaso ŋgayya wol para ataa me. 12 Buwal a̰me gá ge zok vya ma ne viya̰ wak buwal zi, nama fiyal ma ka tok pyaso ŋgayya ɗu ɗu, zok vya mbe ma twala ka tok pyaso ŋgayya mya-myanaŋgal. 13 ndu mbe ŋgay ne zok vya a̰me go̰r ya mbo zok vya ge ne na kon ndwara zi ŋga go̰r ya, ɓol tok pyaso ŋgayya wara azi para anuwa̰y. 14 Ŋgay bula wak me, ɓol tok pyaso ŋgayya wara azi. Yapul ve bula wak mbe zi ver. 15 Ne viya̰ wak zum ɗiŋ mbo bula wak zi, na ŋgayya mbo tok pyaso wara anuwa̰y. 16 Zok vya mbe ma ka da ne fenetre zorra ma bama zok kal ma ta, le ge zi ge go. Fenetre mbe ma ka ge zok mbe ma ta, ge gulum ge ne nama buwal zi mbe ma ta, bula wak gulum ma ta me. Gulum ge viya̰ wak ne ka petɗa ne tumur gaar. 17 Ndu mbe wat ne mbi yapul diŋ ya, yapul mbe ka titɗa ne njal, verra zi ne zok ma tapolɗu. 18 Njal ma ka titɗa viya̰ wak go. Yapul ge zi ge ka haal waɗe ge zum ge. 19 Ŋgay ne gulum ge zum ge wak le ge zi ge go ɗiŋ mbo ya gulum ge pul zi ge wak go, ɓol tok pyaso ŋgayya kis. No a le ge ham ne. Le ge kuu ge go ɗe, 20 ŋgay viya̰ wak ge kuu ge haal ma ne na fiyal, na ge yapul ge zum ge ne. 21 Zok vya ma ka ataa le ge ɗu go, ataa le ge may go me, na bula wak ma ne na gulum ma ka dimma ne ge viya̰ wak ge ham ge ne go. Na twala ka tok pyaso ŋgayya wara anuwa̰y, na fiyal tok pyaso ŋgayya wara azi para anuwa̰y me. 22 Nama fenetre ma, ne nama bula wak ma, ne nama gulum petɗa ne tumur gaar ma, ka dimma ne ge viya̰ wak ge ham ge ne go. A ka mbo ya bula wak zi da ne koo ge ndeya digi ma ɓyalar. 23 Gulum ge zi ge ka da ne viya̰ wak, ka viya̰ wak ge kuu ge ndwara go ŋga dimma ne viya̰ wak ge ham ge go. Ŋgay ne viya̰ wak ge zum ge go mbo ge zi ge ya, ɓol tok pyaso ŋgayya kis. 24 Gene mbi le ge mbii ya, mbi kwa viya̰ a̰me le mbii. Ŋgay na gulum ma, ne na bula wak ma, nama ŋgayya ka dimma ne viya̰ wak ge may ma go. 25 Viya̰ wak mbe ma, ne bula wak mbe ma ka da ne fenetre ma koŋleya se dimma ne viya̰ wak ge may ma go. Na twala ka tok pyaso ŋgayya wara anuwa̰y, na fiyal tok pyaso ŋgayya wara azi para anuwa̰y me. 26 A ndé bula wak mbe zi ya da ne koo ge ndeya digi ma ɓyalar. A pé tumur gaar ma ge na gulum ma ta. 27 Yapul ge zi ge ka da ne viya̰ wak saŋgeya ndwara le mbii. Ne viya̰ wak ge zum ge go mbo viya̰ wak ge zi ge go, na twala ka tok pyaso ŋgayya kis. 28 Gene mbi yapul ge zi ya ne viya̰ wak ge mbii ge, ŋgay viya̰ wak mbe, ka dimma ne ge may ma go. 29 Na zok vya ma, ne gulum ge ne nama buwal zi ma, ne na bula wak ma ka dimma ne ge may ma go. Fenetre ma ka bula wak ma go verra se. Na twala ka tok pyaso ŋgayya wara anuwa̰y, na fiyal tok pyaso ŋgayya wara azi para anuwa̰y me. 30 Bula wak a̰me ka na ziyar go, na twala ka tok pyaso ŋgayya wara azi para anuwa̰y, na fiyal tok pyaso ŋgayya anuwa̰y me. 31 Bula wak mbe ndwara saŋge ya yapul zum. Na pul ge zi ge go, a pé tumur gaar ma na ta digi. A ndé mbo na zi ya da ne koo ge ndeya ma tiimal. 32 Ndu mbe wat ne mbi ne viya̰ wak le ge ham ge ya mbo ya yapul ge zi ge go. Ŋgay viya̰ wak mbe, ɓol go na dimma ne viya̰ wak ge may ma go. 33 Na zok vya ma, ne gulum ge ne nama buwal zi ma, ne na bula wak ma, ka dimma ne ge may ma go. Viya̰ wak mbe ma, ne bula wak mbe ma ka da ne fenetre ma koŋleya se dimma ne viya̰ wak ge may ma go. Na twala ka tok pyaso ŋgayya wara anuwa̰y, na fiyal tok pyaso ŋgayya wara azi para anuwa̰y me. 34 Bula wak mbe ndwara saŋge ya yapul zum. Na pul ge zi ge go, a pé tumur gaar ma na ta digi. A ndé mbo na zi ya da ne koo ge ndeya ma tiimal. 35 Ndu mbe wat ne mbi ne viya̰ wak le ge kuu ge ya, ŋgay viya̰ wak mbe, ɓol go na dimma ne viya̰ wak ge may ma go. 36 Ka da ne na zok vya ma, ne na gulum ge ne nama buwal zi ma, ne na bula wak, ne fenetre ma koŋleya se me. Na twala ka tok pyaso ŋgayya wara anuwa̰y, na fiyal tok pyaso ŋgayya wara azi para anuwa̰y me. 37 Bula wak mbe ndwara saŋge ya yapul zum. Na pul ge zi ge go, a pé tumur gaar ma na ta digi. A ndé mbo na zi ya da ne koo ge ndeya ma tiimal. 38 Zok a̰me wak ka saŋgeya ya bula wak ge kuu ge go, a ka usi kavaar ge a ne tyare nama ne tuwaleya ge tilla uzi pe ma swaga mbe go. 39 Ge zok wak ya dab, tabul ma ya go azi, le ge ɗu go, azi le ge may go me. A ka vyan kavaar ge ne tuwaleya ge tilla uzi pe ma, ne kavaar ge ne tuwaleya ge poreya ne pe ma nama pal. 40 Ge le ge zum ge go, le ge ne hé mbo viya̰ wak ge kuu ge ya go, tabul ma ya go, azi le ge ɗu go, azi le ge may go me. 41 Tabul ma ka tiimal ne vyan kavaar ma nama pal pe. Anda viya̰ wak le ge ɗu go, anda le ge may go me. 42 Ne tuwaleya ge tilla uzi pe, a e tabul ma anda, nama ge a ne ke nama ne njal ge cerra ma. Nama twala ma ka tok pyaso ŋgayya ɗu ne nus, nama fiyal ma tok pyaso ŋgayya ɗu ne nus, nama haal ma tok pyaso ŋgayya ɗu me. A ka kan kaŋ temel ma ne vyan kavaar ge ne tuwaleya ge tilla uzi pe ma, ne tuwaleya ge may ma pe nama pal. 43 A á nama ziyar koŋleya se, fiyal ne tok pul go ga. A ka kan duur ge tuwaleya ne ma nama pal. 44 Ge viya̰ wak ge zi ge le zum ya, zok ge naa ge mbal kaŋ ma ne ka yapul ge zi ge go. Ge ɗu ka le ge viya̰ wak ge kuu ge go, na ndwara saŋge le mbii, ge may le ge viya̰ wak ge mbii ge go, na ndwara saŋge le kuu. 45 Ndu mbe jan mbi go: «Zok ge na ndwara ne saŋge le mbii mbe no, a naa ge ke tuwaleya ge ne ke temel ge zok ge mbegeya ne ma ne ne. 46 Zok ge na ndwara ne saŋge le kuu mbe no, a naa ge ke tuwaleya ge ne ke temel ge twal tuwaleya ne ma ne ne. Ne Levi vya ma buwal zi, a Sadok vya ma mbo ya Bage ɗiŋnedin ndwara se ke na temel ma ne.» 47 Ndu mbe ŋgay yapul mbe, ɓol na twala tok pyaso ŋgayya kis, na fiyal tok pyaso ŋgayya kis me. Twal tuwaleya ka zok ge mbegeya ndwara zum. 48 Wat ne mbi zok ge mbegeya bula wak zi ya, ŋgay na gulum ma, ɓol tok pyaso ŋgayya anuwa̰y le ge ɗu ge go, anuwa̰y le ge may go me. Na zok wak fiyal ka tok pyaso ŋgayya wol para anda, na zok kal ge ne na ziyar go ma fiyal ka tok pyaso ŋgayya atataa. 49 Bula wak mbe twala ka tok pyaso ŋgayya wara azi, na fiyal tok pyaso ŋgayya wol para azi me. A ndé mbo na zi ya da ne koo ge ndeya ma wol. Zok wak keŋ ma go jwak, a sḭ uwara zok pul ma ya go.