Ezekel 20

Sḭḭm kerra ge Israyela vya ma ne

1 Del ge ɓyalar go̰r ge paal ne go, dam wol ge saba ge anuwa̰y ne go, naa ga̰l ma mbut ne Israyela vya ma buwal zi, a mbo ya hale fare pe Bage ɗiŋnedin ta. A kat mbi ndwara se. 2 Bage ɗiŋnedin jan mbi go: 3 «Mo ndu dasana, jya̰ Israyela vya ma ga̰l ma go, Bageyal Bage ɗiŋnedin jan go: Aŋ mbo ya ndwara hale fare pe mbi ta ɗaa? Ne jo̰ mbi da ne ndwara, mbi mbo ya̰ tene go aŋ hale fare pe ne mbi ta to bat, ka̰l ge Bageyal Bage ɗiŋnedin ne. 4 Mo ndu dasana, mo ɓyare kun sarya nama pal ɗaa? E nama kwa kaŋ ge seŋgre kakatak ma ge nama bá ma ne ke. 5 Jya̰ nama go: Bageyal Bage ɗiŋnedin jan go: Dam ge mbi ne tá Israyela go, mbi tyare mbi tok digi guni tene ne pehir ge Yakub ne pe, mbi dya̰ tene nama ta suwal Masar ya. Mbi tyare mbi tok digi guni tene ne nama pe janna go: ‹Mbi Bage ɗiŋnedin, mbi aŋ Dok ne.› 6 Dam mbe go, mbi tyare mbi tok digi guni tene ne nama go, mbi mbo abe nama ne suwal Masar diŋ ya zum, ndwara gene nama mbo suwal ge mbi ne ndi na swaga ma ne nama pe go. A suwal ge pam ma ne daaram ne so ne go vit ne, na siŋli waɗe suwal ma pet. 7 Mbi jya̰ nama go: Ndu ge daage na abe tene uzi ne kaŋ ge seŋgre ge ne berme naa ndwara mbe ma no ta uzi, na kaage nama há ta yaɗat to ne kaŋ sḭḭm ge Masar ma ne to, mbi Bage ɗiŋnedin Dok ge nama ne ne. 8 Amma a kuri mbi wak, a be ɓyare za̰ mbi to. Ndu ge daage be abe tene uzi ne kaŋ ge seŋgre ge ne berme naa ndwara mbe ma ta uzi to, a be ya̰ kaŋ sḭḭm ge Masar ma ne uzi to. A go no, Mbi jya̰ no go, mbi mbo sot pore juliliya ge mbi ne ya nama pal, mbi mbo á mbi laar ol nama ta suwal Masar go. 9 Go no puy ɗe, ne dḭl ge mbi ne pe, mbi be ɓyare go, mbi gá kaŋ senna ge pehir ge ɗogle ge a ne ka ne nama buwal zi ma ta to. A go no, nama ndwara go, mbi dya̰ tene nama ta no ndwara abe nama ne suwal Masar diŋ ya zum. 10 Mbi abe nama ne suwal Masar diŋ ya zum, mbi gene nama mbo ful pul zi ya no. 11 Mbi ho̰ nama mbi eya ma ne mbi wak yuwaleya ma. Mbi e nama kwarra no go, ndu ge ne ke mborra nama pal, mbo kat ne ndwara ne nama ta. 12 Uwale, mbi ho̰ nama mbi dam ɗigliya ma no, na ka kaŋ ŋgayya i ne nama buwal zi, ne da pe nama kwa go, mbi Bage ɗiŋnedin mbi mbege nama ne. 13 Amma Israyela vya ma kuri mbi wak ful pul zi, a be ke mborra mbi eya ma pal to, a dó mbi wak yuwaleya ma uzi, nama ge ndu ge ne ke mborra nama pal, kat ne ndwara ne nama ta. A ndi mbi dam ɗigliya kaŋ senna. A go no, mbi jya̰ no go, mbi mbo sot pore juliliya ge mbi ne ya nama pal ful pul zi, ndwara pur nama pe uzi. 14 Go no puy ɗe, ne dḭl ge mbi ne pe, mbi be ɓyare go, mbi gá kaŋ senna ge pehir ge ɗogle, ge a ne kwa mbi abe nama ne suwal Masar diŋ ya zum ma ta to. 15 Uwale, ge ful pul zi, mbi tyare mbi tok digi guni tene go, mbi gwan gene nama mbo suwal ge mbi ne ke wak tuli hon nama ya to bat. A suwal ge pam ma ne daaram ne so ne go vit ne, na siŋli waɗe suwal ma pet. 16 Ago, a dó mbi wak yuwale ma uzi, a be ke mborra mbi eya ma pal to, a ndi mbi dam ɗigliya ma kaŋ senna, ne da pe, nama dulwak ma ka bama kaŋ sḭḭm ma pal. 17 Mbi ka ne dulwak ge kwa a̰se gḛ ne nama pe, mbi be ɓyare burmi nama uzi to, mbi be ɓyare pur nama pe uzi ful pul zi to.

18 Mbi jya̰ nama vya ma ful pul zi go: Mbo me eya ge aŋ bá ma ne pal to, koy me nama wak yuwaleya ma to, há me ta seŋgre ne nama kaŋ sḭḭm ma to me. 19 Mbi Bage ɗiŋnedin Dok ge aŋ ne ne. Mbo me mbi eya ma pal, koy me mbi wak yuwaleya ma, ke me mborra nama pal. 20 Mbege me mbi dam ɗigliya ma, a kaŋ ŋgayya nee ne aŋ buwal zi ne, go no aŋ mbo kwa go, mbi Bage ɗiŋnedin Dok ge aŋ ne ne. 21 Go no puy ɗe, vya ma be ke mborra mbi eya ma pal to, a be koy mbi wak yuwaleya ma to. A be ke mborra nama pal to, nama ge ndu ge ne ke mborra nama pal, kat da ne ndwara ne nama ta. Amma a ndi mbi dam ɗigliya ma kaŋ senna. Mbi jya̰ go, mbi mbo sot mbi pore juliliya ya nama pal, mbi mbo pur nama pe uzi laar ol ge mbi ne zi ful pul zi. 22 Go no puy ɗe, ne dḭl ge mbi ne pe, mbi ka̰ mbi tok digi, mbi be ɓyare go, mbi gá kaŋ senna ge pehir ge ɗogle, ge a ne kwa mbi abe nama ne suwal Masar diŋ ya zum ma ta to. 23 Uwale, mbi tyare mbi tok digi guni tene ful pul zi ne nama pe go, mbi mbo ɓarse nama se pehir ge ɗogle ma buwal zi, mbi mbo dasare nama se suwal ma go. 24 Ne da pe, a be ke mborra mbi wak yuwaleya ma pal to, a dó mbi eya ma uzi, a ndi mbi dam ɗigliya ma kaŋ senna, a ya̰ ta bole kaŋ sḭḭm ge bama bá ma ne ma pe. 25 Uwale, mbi ho̰ nama eya ge kwaɗa to ma, ne wak yuwaleya ge ne é naa kat ne ndwara to ma. 26 Mbi ya̰ nama hat ta yaɗat to ne bama tuwaleya ma, swaga ge a ne ka tyare bama vya ge pul soy ma go. Ne da pe, nama burmi ta pe uzi, go no, a ba kwa go mbi Bage ɗiŋnedin ne.

27 Ne no pe, mo ndu dasana, jya̰ Israyela vya ma go, Bageyal Bage ɗiŋnedin jan go: Aŋ bá ma sá mbi uwale ne bama kaŋ kerra ge sone ma. 28 Mbi gene nama mbo suwal ge mbi ne tyare mbi tok digi guni tene hon nama na ya. Swaga ge a ka njal ge haal ma, ne uwara ge rubiya ma, a gá mbo tyare bama tuwaleya swaga mbe ma go, ne tyare bama bobo ge ne é naa tiiɗiya ma swaga mbe ma go, ne til bama dukan ma swaga mbe ma go, ne tyare bama oyo̰r jiya̰l ma swaga mbe ma go me. 29 Mbi jya̰ nama go: ‹Aŋ te mbo ma swaga sḭḭm ma go go ɗaa?› Ne swaga mbe ya day ɗiŋ ma̰ no, a tol swaga mbe ma swaga sḭḭm ma.

30 Ne no pe, jya̰ Israyela vya ma go, Bageyal Bage ɗiŋnedin jan go: Aŋ hat ta yaɗat to dimma ne aŋ bá ma ne ka kerra go, aŋ bole nama kaŋ ge seŋgre ma kerra. 31 Swaga ge aŋ ne gene aŋ bobo ma ya, swaga ge aŋ ne tyare aŋ vya ma tilla uzi, aŋ hat ta yaɗat to ne aŋ kaŋ sḭḭm ma pet ɗiŋ ma̰ no. O Israyela vya ma, mbi da ne pool ya̰ tene aŋ hale fare pe ne mbi ta ɗaa? Ne jo̰ mbi da ne ndwara, ka̰l ge Bageyal Bage ɗiŋnedin ne, mbi mbo ya̰ tene aŋ hale fare pe ne mbi ta to bat. 32 Aŋ jan go: ‹I mbo gá uware uwara ma ne njal dimma ne pehir ge ɗogle ma go, ko ne vuwal pe ge suwal ge may ma ne ma go.› Fare ge ne so ya aŋ pala zi mbe ma no, a mbo ke to bat. 33 Ne jo̰ mbi da ne ndwara, ka̰l ge Bageyal Bage ɗiŋnedin ne, mbi mbo ke muluk aŋ pal, da ne pool ge mbi ne, ne mbi pore juliliya me. 34 Mbi mbo e aŋ wat ne ɓase ma buwal zi ya zum, mbi mbo kote aŋ ne suwal ge mbi ne ɓarse aŋ nama go ma ya digi, ne pool ge mbi ne, ne mbi pore juliliya me. 35 Mbi mbo gene aŋ ful pul zi, uzi ya kaal ne ɓase ma, ndwara ne ndwara, mbi mbo kun sarya aŋ pal swaga mbe go. 36 Dimma ne mbi ne kṵ sarya aŋ bá ma pal ful pul ge suwal Masar ne zi go, mbi mbo kun sarya aŋ pal go no me, ka̰l ge Bageyal Bage ɗiŋnedin ne. 37 Mbi mbo e aŋ kale mbi calaŋ pe se, mbi mbo e aŋ gwan ne aŋ pala mbi wak tuli pe se. 38 Mbi mbo ndage naa ge kuri wak ma ne naa ge be za̰ wak to ma ne aŋ buwal zi uzi, mbi mbo abe nama ne suwal ge a ne ka mbay ne go ya zum, amma a mbo wat suwal ge Israyela ne diŋ to bat. Go no, aŋ mbo kwa go mbi Bage ɗiŋnedin ne.

39 Aŋ ge Israyela vya ma, Bageyal Bage ɗiŋnedin jan go: Ndu ge daage na mbo ke na kaŋ sḭḭm ma temel mo̰r. Ne go̰r go, aŋ mbo kwa go aŋ mbo za̰ mbi to gale! Go no, aŋ mbo gwan hat mbi dḭl ge mbegeya seŋgre ne aŋ bobo ma, ko ne aŋ kaŋ sḭḭm ma to bat. 40 Ago Israyela vya ma mwaɗak, nama ge ne suwal Israyela go ma mwaɗak, a mbo uware mbi ge mbi njal ge mbegeya pala digi, njal ge Israyela ne ge haal digi, ka̰l ge Bageyal Bage ɗiŋnedin ne. Swaga mbe go, mbi mbo vin nama, mbi mbo ame nama kaŋ wak siyal ma, ne nama bobo ma, ne nama kaŋ ge a ne mbegeya ma. 41 Swaga ge mbi ne mbo abe aŋ ja ne pehir ge ɗogle ma buwal zi ya zum, mbi kote aŋ ne suwal ge mbi ne ɓarse nama go ma ya digi, mbi mbo ame aŋ tuwaleya ge hurra tuli ma. Ne aŋ ta mbi mbo ŋgay pehir ge ɗogle ma go mbi Dok ge mbegeya ne. 42 Go no, swaga ge mbi ne mbo gene aŋ ja suwal Israyela go, suwal ge mbi ne tyare mbi tok digi guni tene go mbi mbo hon aŋ bá ma na go, aŋ mbo kwa go, mbi Bage ɗiŋnedin ne. 43 Ya go, aŋ mbo dwat ne aŋ mborra, ne aŋ kaŋ kerra ge ne ka hat aŋ seŋgre ma pet, aŋ mbo ndil ta kaŋ senna, ne sone ge daage pet ge aŋ ne ke ma pe. 44 Israyela vya ma, mbi mbo ke ne aŋ be ne aŋ mborra ge sone ma, ko ne aŋ kaŋ kerra ge seŋgre ma pal to, amma ne mbi dḭl pe, go no, aŋ mbo kwa go mbi Bage ɗiŋnedin ne, ka̰l ge Bageyal Bage ɗiŋnedin ne.»