Ursalima vya ge a ne dó na uzi ne
16
1 Bage ɗiŋnedin jan mbi go: 2 «Mo ndu dasana, e Ursalima kwa na kaŋ kerra ge seŋgre kakatak ma. 3 Jya̰ Ursalima go, Bageyal Bage ɗiŋnedin jan go: Mo suwal dolla Kanan, mo bá Amoriya ne, mo ná Hittitiya ne. 4 Dam ge mo ne tó go, ndu ge kun mo hḭl be kat to, ndu ge son mo uzi puy be kat to, ko ndu ge gyat yuwam mo ta puy be kat to, ko ndu ge lar mo ne ba̰r koko puy be kat to. 5 Ndu a̰me ge kwa mo a̰se ɗo ba ke mo kaŋ a̰me mbe no pe ɗu to. Ne jo̰ a ndi mo kaŋ senna, a dó mo uzi ful zi ya, dam ge mo ne tó go. 6 Mbi kale mo ziyar go, mbi kwa mo ne vurmi tene ne mo swama zi no. Swaga ge mo ne ka mo swama zi, mbi jya̰ mo no go: ‹Ka ne ndwara!› Ge mo swama mbe zi, mbi jya̰ mo go: ‹Ka ne ndwara!› 7 Mbi é mo donna digi dimma ne uwara ge ful zi ge go, mo do̰ digi, mo ɗage ndeya no, mo há kale ge be to no, mo pam ma ɗage ndwarra no, mo susu ma ɗage pyarra no me. Amma mo ka swala. 8 Swaga ge mbi ne gwan kale mo ziyar go, mbi ndi mo, mbi kwa go mo mbyatɗa gwale. Mbi ka̰ mbi ba̰r wak mo pal, mbi lá mo pe no. Mbi guni tene ne mo pe, mbi ke wak tuli ne mo no, ka̰l ge Bageyal Bage ɗiŋnedin ne. Ago mo gá ge mbi ne. 9 Mbi so̰ mo, mbi usi swama ne mo ta uzi, mbi naŋge mo num no. 10 Mbi ka̰ ba̰r dabcar mo ta, mbi pá tyarko ge siŋli mo koo zi no, mbi twá mo pul ne ba̰r ɓoso lin no, mbi lá mo ne ba̰r tame susu ge siŋli no me. 11 Mbi pare mo ne kaŋ ke kale ma, mbi pá fool ma mo tok zi no, mbi ka̰ bahir mo ka̰l zi no, 12 mbi pá kyaɗa mo vo̰r zi no, mbi pá mo kaŋ togor wak ma no, mbi é kadmul ge serra mo pala digi no me. 13 Mo kaŋ kale ma ka dinar ma ne fool kaal ma, mo ba̰r ma ka ɓoso lin ge siŋli, ba̰r tame susu, ne ba̰r ge dabcar ma. Mo ka zam swáma ge peɗem ma, ne daaram ma, ne num ma. A go no, mo há kale ge be to no, mo dé ya kat gan gwale no. 14 Mo dḭl dasare pehir ge ɗogle ma buwal zi, ne kale ge mo ne pe. Ago mo ka kale ge be to. Ne da pe mbi pare mo ne kaŋ ge siŋli go, ka̰l ge Bageyal Bage ɗiŋnedin ne.15 Amma mo ya̰ tene kale ge mo ne pe, ne pateya ge mo ne pe, mo gá ke kaya ne naa ge ne kale ne viya̰ go ma pet, mo gá nama kaŋ. 16 Mo abe ba̰r mo ge ndabcar mbitimbiti ge mo ne ke nama ne mo pe ma, mo lá nama mo swaga sḭḭm ma pala digi no, mo gá fi ne tene nama go no. Kaŋ hir ge go mbe no be ke ɗu to, mbo gwan ke to me. 17 Mo abe mo kaŋ kale ge ne ke ne dinar ma ne fool kaal ge mbi ne ho̰ mo nama, mo ɗeere kḭḭm a̰me dimma ne ndu son go ne mo sḛ pe no, mo gá ke kaya ne na no. 18 Mo abe mo ba̰r ge dabcar ma, mo lá nama ne nama no, mo tyare nama mbi num ma ne mbi dukan. 19 Mo tyare nama mbi kaŋzam ge mbi ne ho̰ mo ma, mbi swáma peɗem ma, ne mbi num ma, ne mbi daaram ge mbi ne ka wal mo ne nama, mo tyare nama dimma ne kaŋ ge hur tuli go hon nama. No a kaŋ ge mo ne ke ne. Ka̰l ge Bageyal Bage ɗiŋnedin ne. 20 Mo abe mo vya ge sonmo ma ne ge gwale ma ge mo ne tó nama hon mbi ma, mo tyare nama hon nama no. Mo ndi kaya kerra ge mo ŋgeɗo baŋ ɗaa? 21 Mo vya̰ mbi vya ma, mo tyare nama hon nama no. 22 Mo kaŋ kerra ge seŋgre kakatak mbe ma no zi pet, ne mo kaya kerra zi me, mo be dwat ne dam ma ge mo ne ka jyale to, swaga ge mo ne ka warra suli, mo swama zi go.
23 Go̰r ge mo ne ke kaŋ ge sone mbe ma no pet, ndi mo ne gá ya a̰seya no. Woo ge mo ne! Ka̰l ge Bageyal Bage ɗiŋnedin ne. 24 Mo ka̰ tandal ne mo pe, mo tó swaga ma ge mo buwal pe ma go pet. 25 Ge viya̰ wak ga̰l ma go pet, mo tó swaga ma ne mo pe, mo ha kale ge mo ne seŋgre, mo zḛ́ tene hon naa ge ne kale ne viya̰ go ma pet, mo ka dwage kaya kerra ge mo ne zi. 26 Mo gá ke kaya ne Masar ma, mo naa ge gulum pala ma, nama ge sḛ duur ga̰l ma, mo ka dwage kaya kerra ge mo ne zi ndwara e mbi laar hotɗa. 27 Ndi, mbi ŋgay mo mbi pool, mbi kun mo kaŋzam wak ya uzi, mbi ɓyan mo ya mo naa ge ho̰l ma, Filistiya ma tok go, nama ge a ne za̰ yál ne aŋ kaŋ kerra ge sone mbe ma pe. 28 Ne jo̰ mo be ɓol ndu ge mbyat mo to, mo gwa̰ mbo ke kaya ne Asiriya ma no, go no puy ɗe, a be gwan mbyat to. 29 Mo gwa̰ mbo dwage kaya kerra ne Kaldeya ma, naa ge ke tujar ma, go no puy ɗe, a be gwan mbyat mo to. 30 A ma voɗom ge go ne ɗaa! Ka̰l ge Bageyal Bage ɗiŋnedin ne. Swaga ke kaŋ mbe ma no go pet, ŋgay go mo naa ge ke kaya ma ná ne. 31 Swaga ge mo ne ka kan tandal ge mo viya̰ wak pala ma go, swaga ge mo ne ka tor swaga ge mo buwal pe ma go, mo be ka ke dimma ne naa ge kaya ma go to, mo ka sen bware ge a ne ka hon mo ma sen. 32 Gwale kaya, ge ne ka ne na obe pe to, hon tene naa ge ɗogle ma. 33 Naa ge kaya ma pet a pot nama pot, amma a mo sḛ, mo pot naa ge mo laar ne wa̰ nama ma ne. Mo hon nama bobo ma ndwara go nama mbo ne swaga ma ya pet mo ta, ɓan ne mo. 34 Kaya kerra ge mo ne zi, mo ke kaŋ ge naa zaab ge may ma ne ke na pe to. A be ka ɓyare mo pe dimma ne naa ne ɓyare gwale ge kaya pe go to, a be ka pot mo bware to, amma a mo sḛ ka pot naa bware ne. Ago mo é kaŋ ge naa ne ke na er.
35 Gwale kaya, za̰ fare janna ge Bage ɗiŋnedin ne. 36 Bageyal Bage ɗiŋnedin jan go: Ne jo̰ mo ya̰ tene swala, mo bḛ tene mo naa ge laar wanna ma ne mo kaŋ sḭḭm ge seŋgre kakatak ma ndwara zi kaya ge mo ne zi, mo mbo ɗiŋ mbo kan mo vya ma swama se tyareya hon nama. 37 Ne no pe, mbi mbo kote mo kondore ge mo ne dé nama ndwara zi ma ya mwaɗak, nama ge mo laar ne wa̰ nama ma, ne nama ge mo ne kwane nama ma. Mbi mbo kote nama ne swaga ma ya pet mo pal, mbi mbo ya̰ mo swala nama ndwara go, a mbo kwa mo swala. 38 Mbi mbo kun sarya sarya kunna ge naa ge kaya ma ne naa ge hun siya ma ne mo pal. pore juliliya ne yil ge mbi ne zi, mbi mbo hun mo uzi. 39 Mbi mbo ɓyan mo nama tok go, a mbo burmi mo tandal ma ne mo swaga ge torra ma se. A mbo fage mo ba̰r ma ne mo ta uzi, a mbo abe mo kaŋ kale ma, a ya̰ mo swala koldoŋ. 40 A mbo abe ɓase ma ya mo pal, a mbo mbal mo ne njal, a mbo kacage mo se ne bama kasagar ma, 41 a mbo til mo zok ma, a mbo kun sarya mo pal naa zaab gḛ ndwara go. Mbi mbo ndage kaya ne mo pala zi uzi, mo mbo gwan pot naa bware mbo ya fí ne mo to bat. 42 Mbi mbo á mbi laar ol mo ta. Swaga ge mbi yil kerra ne mo pe ne á ya, mbi mbo saŋge ya se, mbi mbo gá katɗa halas, mbi laar mbo gwan hot to bat. 43 Ne jo̰ mo be dwat ne dam ma ge mo ne ka jyale to, mo e mbi laar hotɗa mo kaŋ kerra mbe ma no zi pet. Ndi, mbi mbo gwan ne mo kaŋ kerra mbe ma no pet mo pal, ka̰l ge Bageyal Bage ɗiŋnedin ne. Mo te be gwan ke kaŋ ge seŋgre mbe ma ne ge kaŋ ge seŋgre kakatak mbe ma pal ne to’a?
44 Ndi, naa ge ke fare sḭ ma mbo gá ke fare sḭ mo pal janna go: ‹Vya kare na ná koo pula!› 45 Mo mo ná vya ge tolla ne fareba, mo ná sḛ́ na obe ma ne na vya ma. Mo mo ná vya ge gwale ma ná vya ne, a sḛ́ bama obe ma ne bama vya ma. Aŋ ná Hittitiya ne, aŋ bá Amoriya ne me. 46 Mo ná vya ge gwale ge ga̰l, a Samariya, a ne na vya ma ka ya mo tok magul pal. Mo ná vya ge jyale Sodom, a ne na vya ma ka ya mo tok matoson pal. 47 Mo be bole nama koo pul, ne nama kaŋ ge seŋgre kakatak ma kerra ɗeŋgo to, kaŋ kerra ge mo ne ma zi, mo ke kaŋ ge seŋgre waɗe ge nama ne pet. 48 Ne jo̰ mbi da ne ndwara, ka̰l ge Bageyal Bage ɗiŋnedin ne, mo ná vya Sodom ma ne na vya ma be ke kaŋ ge aŋ ne mo vya ma ne ke na pe to. 49 Ndi ya̰l ge mo ná vya Sodom ma ne na vya ma ne ke no: A ka Pala ga̰l, kaŋzam baŋneya nama ta bindik, katɗa halas be ge dwat ne a̰me to, amma a be ka dwat ne a̰se ma ne naa ge woɗegeya ma to. 50 A gá jegreya, a gá ke kaŋ ge seŋgre kakatak ma mbi ndwara se no. Swaga kwa no, mbi cigi nama uzi no. 51 Sone ge Samariya ne ke be mbyat ne sone ge mo ne ke le dig to. Mo ke kaŋ ge seŋgre kakatak ma gḛ waɗe ge nama ne. Ne kaŋ ge seŋgre kakatak ge mo ne ke ma zi mwaɗak, mo ná vya ge gwale ma dosol waɗe mo. 52 Mo ɗe, ḭ saaso ge mo ne, mo ge mo ne bḛ́ mo ná vya ge gwale ma. Sone kerra ge mo ne zi, mo ke kaŋ ge seŋgre ma gḛ waɗe ge nama ne, nama sḛ ma dosol waɗe mo. Mo ɗe, saaso na ke mo, ḭ saaso ge mo, ne jo̰ mo é mo ná vya ge gwale ma ya hat dosol. 53 Mbi mbo gwan ne Sodom ma ne na vya ma ne paal zi ya, mbi mbo gwan ne Samariya ma ne na vya ma ne paal zi ya me, mbi mbo gwan ne mo ne paal zi ya nama buwal zi me. 54 Go no, mo mbo in saaso ge mo ne, ne kaŋ ge mo ne ke ma pe pet, saaso mbo wan mo, nama laar mbo iyal. 55 Mo ná vya Sodom ma ne na vya ma mbo gwan’a bama byalam ge zaŋgal go, Samariya ma ne na vya ma mbo gwan’a bama byalam ge zaŋgal go me, aŋ ne mo vya ma me, aŋ mbo gwan’a aŋ byalam ge zaŋgal go. 56 Dam ge mo ne ka jegreya go, mo ka cot mo ná vya Sodom cot, 57 mo sone pe gale ne be dyan zum. A swaga ge Aram ma ne na vya ma, poseya ne naa ge ne bama ziyar go ma pet, ne Filistiya ma vya ma, ge swaga ma go pet, a mbo ka cot mo. 58 Mo mbo in dṵṵl ge mo sone ma ne kaŋ ge seŋgre kakatak ge mo ne ke ma ne, ka̰l ge Bage ɗiŋnedin ne.
59 Ago Bageyal Bage ɗiŋnedin jan ne: Mbi mbo ke ne mo dimma ne mo ne ke go. Ne jo̰ mo ndi za̰ ta ge nee ne kaŋ senna, mo vḛne wak tuli no. 60 Mbi mbo dwat ne mbi wak tuli ge mbi ne ke ne mo dam ma ge mo ne ka jyale go. Mbi mbo gwan ke wak tuli ge ɗiŋnedin ne mo. 61 Mo mbo dwat ne mo kaŋ kerra ma, saaso mbo wan mo swaga ge mo ne mbo ame mo ná vya ge ga̰l ma ne ge jyale ja mo ta go. Mbi mbo hon mo nama dimma ne mo vya ge gwale ma go, amma a mbo wat mo wak tuli zi to bat. 62 Mbi mbo ke wak tuli ne mo, go no, mo mbo kwa go mbi Bage ɗiŋnedin ne. 63 Swaga mbe go no, mo mbo dwat ne fare ge ne ke mo ma, saaso mbo wan mo, mo mbo gwan hage mo wak digi jan fare to saaso tok go. Mbi pore mo kaŋ ge mo ne ke ma ya uzi pet. Ka̰l ge Bageyal Bage ɗiŋnedin ne.»