Ezekel ke kaŋ ŋgayya ma azi
12
1 Bage ɗiŋnedin jan mbi go: 2 «Mo ndu dasana, mo ya naa ge be za̰ wak to ma buwal zi. A da ne ndwara ma, amma a kwa a̰me to, a da ne togor ma, amma a za̰ a̰me to, ago a naa ge za̰ wak to ma ne. 3 Mo ndu dasana, Nṵsi kaŋ ge ne mbya mo sya baale ne nama, sya baale gyala pala ɗar nama ndwara go. Ɗage ne mo swaga go mbo swaga ge ɗogle nama ndwara go, tamekyala a mbo kwa go bama naa ge be za̰ wak to ma ne. 4 Abe mo kaŋ ge ne mbya mo sya baale ne nama ya zum gyala pala ɗar nama ndwara go, mo sḛ, ɗage gasamal nama ndwara go mbo zum dimma ne naa ne sya baale go. 5 Nama ndwara go uwale, zú gulum ndwala, mo wat zum na go. 6 Nama ndwara go uwale, é mo kaŋ ma mo ka̰l pal, wá zum tṵ zi. Lá mo ndwara zi, na kaage mo ndi suwal to. Ago mbi ke mo kaŋ ŋgayya ne Israyela vya ma pe.» 7 Mbi ke dimma ne na ne ho̰ mbi wak go. Mbi abe mbi kaŋ ge ne mbya mbi sya baale ne nama zum gyala pala ɗar. Gasamal, mbi zut gulum ndwala ne mbi tok, tṵ zi, mbi abe mbi kaŋ ma mbi ka̰l pal, mbi wat zum nama ndwara go.8 Cya̰wak, Bage ɗiŋnedin jan mbi go: 9 «Mo ndu dasana, Israyela vya ma, naa ge be za̰ wak to mbe ma, a te be ele mo go, mo ke da go ɗaa to’a? 10 Jya̰ nama go, Bageyal Bage ɗiŋnedin jan go: ‹Kaŋ ŋgayya be no da ne ga̰l ge ne Ursalima diŋ ma pe, ne Israyela vya ma ge ne ka ne suwal go ma pe pet me›. 11 Jya̰ nama go: Mbi kaŋ ŋgayya ne ne aŋ pe. Dimma ne mbi ne ke go, a mbo ke ne aŋ go no me. A mbo pál aŋ mbo mo̰r zi. 12 Ga̰l ge ne aŋ buwal zi mbo abe na kaŋ ma na ka̰l pal, mbo wat zum tṵ zi. A mbo al gulum ndwala, mbo wat ne na go mbo zum, mbo lar na ndwara zi, ne da pe, na kaage na ndwara fa̰ na ndi suwal to. 13 Mbi mbo hul mbi boy na ndwara zḛ, mbi mbo wan na. Mbi mbo gene na mbo Babilon, Kaldeya ma suwal ya. Amma mbo su suwal mbe ya, be ge na ndwara fa̰ kwa na. 14 Na naa ge ne na ziyar go ma pet, ne na naa ge koy na ma, ne na asagar ma pet, mbi mbo ɓarse nama se teteŋ, mbi mbo pwat mbi kasagar nama pe go. 15 Swaga ge mbi ne mbo ɓarse nama ya pehir ge ɗogle ma buwal zi, suwal ma go, a mbo kwa go mbi Bage ɗiŋnedin ne. 16 Mbi mbo ya̰ naa a̰me ma mbut ne nama buwal zi ɓurra ne pore zi, ne kyamal zi, ne mbogom zi, ne da pe, nama wa̰ pehir ge ɗogle ma, nama ge a ne mbo mbo ya nama buwal zi ya ma bama kaŋ ge seŋgre kakatak ge bama ne ke ma pe pet, go no, a mbo kwa go mbi Bage ɗiŋnedin ne.»
17 Bage ɗiŋnedin jan mbi go: 18 «Mo ndu dasana, zá mo kaŋzam ne vo, njó mo mam ne ndatɗa rarag, ne iigiya. 19 Jya̰ naa ge suwal diŋ ma go: Bageyal Bage ɗiŋnedin jan naa ge ne Ursalima diŋ, ge ne gá ne suwal Israyela go ma go: A mbo zam bama kaŋzam ma ne iigiya, a mbo njot bama mam ma ne vo, ago nama suwal mbo burmi uzi, ne da pe, naa ge ne suwal mbe go ma ŋguy na ya ne fare kerra ge pool ma. 20 Suwal ge naa ne kat ne nama diŋ ma mbo burmi uzi, suwal mbo gá babur viŋ. Go no, aŋ mbo kwa go mbi Bage ɗiŋnedin ne.»
Fare ge Bage ɗiŋnedin ne wak mbo wi
21 Bage ɗiŋnedin jan mbi go: 22 «Mo ndu dasana, kyaɗa aŋ ba ka ke fare sḭ mbe no ne suwal Israyela pe go: ‹Dam ma kale ya go, daalam a̰me wak ge wiya to› 23 Jya̰ nama: Bageyal Bage ɗiŋnedin jan go: Mbi mbo gul fare sḭ mbe uzi, ndu mbo gwan ke fare sḭ mbe no suwal Israyela go to bat. Jya̰ nama go: Dam ma mbo ya go, daalam ge daage pet wak mbo wi. 24 Ago daalam ge hale, ko fare waageya ge boge naa mbo gwan kat Israyela vya ma buwal zi to bat. 25 Mbi Bage ɗiŋnedin, fare ge mbi ne jan na wak wi wi ŋgat, gá viya̰ zi to bat. Naa ge be za̰ wak ma, aŋ dam ma zi, fare ge mbi ne jya̰ na wak mbo wi, ka̰l ge Bageyal Bage ɗiŋnedin ne.»
26 Bage ɗiŋnedin jan mbi go: 27 «Mo ndu dasana, za̰ fare ge Israyela vya ma ne jan: ‹Daalam ge ndu mbe ne ɓol a be fare ge ke ma̰ ma ne to, a kaŋ ge ne mbo ke dḛ ya kaal ma ne.› 28 Ne no pe, jya̰ nama go: Bageyal Bage ɗiŋnedin jan go: Mbi fare a̰me wak gá viya̰ zi to bat, mbi fare ge mbi ne jya̰ ma pet nama wak mbo wi, ka̰l ge Bageyal Bage ɗiŋnedin ne.»