Fare sḭ ma ge Lemuyel ne
31
1 Fare janna ge gan Lemuyel ne, a yuwaleya ge na ná ne ho̰ na nama ne.2 Mbi vya, mbi vya ge tolla!
Mbi vya ge mbi ne ɓyare na!
3 Á mo pool naa zaab ta to,
yá̰ tene nama ge ne ban gan ma pe to.
4 Gan Lemuyel, be ke kwaɗa ge gan njot oyo̰r-jiya̰l to,
ko ga̰l ma ke jiya̰l pe to.
5 Kadɗa a fere ya, a vyale be ge kun sarya eya pal,
a kun naa ge a̰se ma fare buwal ne na viya̰ go to.
6 Ho̰ me jiya̰l naa ge ne ɓyare suya ma,
ko oyo̰r jiya̰l naa ge ne kḭḭmi zi ma.
7 Nama njó, nama vyale nama a̰se uzi,
nama gwan dwat nama yál njotɗa pal to.
8 Hage mo wak ɗaŋge naa ge wak ɗamal ma pe,
ɗaŋge naa ge taŋgay ma pe.
9 Hage mo wak, kṵ sarya dosol pal,
ɗaŋge ndu ge a̰se ma ne ndu ge woɗegeya pe.
Gwale ge ne mbya gwale
10 Gwale ge hormo, a wuɗi ɓol na ne ɗaa?
Na sḛ siŋli gḛ waɗe njal sergeleŋ ma.
11 Na obe e na saareya na pal,
kar na kaŋ ma uzi to.
12 Dam ma mwaɗak, ke na kwaɗa,
ke na kaŋ a̰me ge sone to.
13 Na sḛ ɓol tene tame susu ma ne ɓoso lin ma ya ne,
ke temel ne na tok zi da ne laar saal.
14 Na sḛ dimma ne fak ga̰l ge suk go,
mbo abe na kaŋzam da ne swaga kaal ya.
15 Kun digi cya̰wak vḛ ke kaŋzam ne na yàl pe,
hon na kale ma nama temel ma.
16 Saare na pala zi, yat swaga gaaso,
ne kaŋ ge ne ɓó ne na temel ma ta, gar gaaso oyo̰r.
17 Vwal na pul temel ta,
kat tok baŋ to.
18 Kwa go na kaŋ ma zam zḛ kwaɗa,
na ɗuli piri ɗaal to.
19 Wan na tok uwara ol ba̰r ta,
na tok vya ma ka paare ba̰r me.
20 Hon naa ge woɗegeya ma kaŋ,
ka ɓyan na tok pe naa ge a̰se ma ta me.
21 Sya iyalam vo ne na yàl pe to,
ago naa ge ne na yadiŋ ma mwaɗak, a da ne ba̰r kakap.
22 Tit na kaŋ lar ta ma,
kan ba̰r ɓoso lina ge káál sasaw ma na ta.
23 Ge koteya ge naa ga̰l ma ne go, na obe da ne hormo,
swaga ge ne kat naa ga̰l ge suwal ne ma buwal zi.
24 Tit ba̰r ma yat uzi naa ge suk ma tok go,
ka tit bit ma yatɗa naa ge ne kale ma tok go.
25 Na sḛ ka̰ pool ma ne hormo ya na ta,
swaga ge ne ndil na ndwara ge zḛ ge, man man.
26 Hage na wak jan fare da ne zwama,
na fare janna ma a yuwaleya ne.
27 Dol na ndwara kaŋ ge ne ke ne na yadiŋ ma pal pet,
kat tok baŋ to.
28 Na vya ma ka mbo ya dore na,
na obe ka uware na me.
29 Vya kale ma gḛ a da ne hormo,
amma mo waɗe nama waɗe pet.
30 Laar wanna lase naa lase, kale ke kaal to,
gwale ge ne sya Bage ɗiŋnedin vo,
no a gwale ge ne mbya a uware na ne.
31 Pó me na na temel ge ne ke pal,
naa uware na kaŋ kerra ma suwal viya̰ wak pala go.