Kwa a̰se ge Bage ɗiŋnedin ne á to
118
1 Uware me Bage ɗiŋnedin, na sḛ kwaɗa,ago kwa a̰se ge na ne a ɗiŋnedin!
2 Israyela vya ma, jya̰ me go:
ago kwa a̰se ge na ne a ɗiŋnedin!
3 Vuwal pe ge Aaron ne, jya̰ me go:
ago kwa a̰se ge na ne a ɗiŋnedin!
4 Naa ge ne sya Bage ɗiŋnedin vo ma, jya̰ me go:
ago kwa a̰se ge na ne a ɗiŋnedin!
5 Yál njotɗa ge mbi ne zi, mbi tó Bage ɗiŋnedin,
na sḛ gwa̰ ne mbi vinna, ya̰ mbi digi suli no.
6 Bage ɗiŋnedin da ne mbi pe, mbi sya a̰me vo to.
Ndu dasana ke ne mbi da ɗaa?
7 Bage ɗiŋnedin a bage sya mbi ko̰r ne,
mbi gá kyat mbi naa ge ho̰l ma kyat.
8 Golgo ndu woy tene Bage ɗiŋnedin zi,
ge é na jobreya naa dasana ma pal!
9 Golgo ndu woy tene Bage ɗiŋnedin zi,
ge é na jobreya naa ge tok pool ma pal!
10 Pehir ge ɗogle ma pet, a ve mbi zi,
ne dḭl ge Bage ɗiŋnedin ne, mbi pú nama uzi pet.
11 A terse mbi verra ya zi,
ne dḭl ge Bage ɗiŋnedin ne, mbi pú nama uzi pet.
12 A ve mbi zi dimma ne daaram go,
dimma ne kore ne kabre ol go, a piri uzi,
ne dḭl ge Bage ɗiŋnedin ne, mbi pú nama uzi pet.
13 A ɓya̰ mbi ndwara dol mbi se,
Bage ɗiŋnedin sya mbi ko̰r no.
14 Bage ɗiŋnedin a mbi pool ne,
na sḛ bage má mbi ne.
15 Ge gur ge naa ge dosol ma ne zi,
puwale me puwaleya ge ne laar saal go:
«Tok matoson ge Bage ɗiŋnedin ne ke kaŋ ya go!
16 Tok matoson ge Bage ɗiŋnedin ne a herra digi!
Tok matoson ge Bage ɗiŋnedin ne ke kaŋ ya go!»
17 Mbi su to, mbi mbo kat ne ndwara,
mbi mbo wan kaŋ ge Bage ɗiŋnedin ne ke ma pe.
18 Bage ɗiŋnedin mḛre mbi,
amma be ya̰ mbi suya to.
19 Hage me mbi zok wak ge naa ge dosol ma ne,
mbi wá zi mbo uware Bage ɗiŋnedin!
20 Ndi, zok wak ge Bage ɗiŋnedin ne no,
naa ge dosol ma wat zi da ne na!
21 Mbi uware mo, ne da pe, mo gwa̰ ne mbi vinna,
a mo má mbi ne!
22 Njal ge naa ge sin zok ma ne dó na uzi
gwan ja keŋ go, na ge zok dṵṵl ne ka ne na pal.
23 No, mbo da ne Bage ɗiŋnedin ta ya.
a kaŋ ajab nee ndwara zi taa!
24 Ndi, dam ge Bage ɗiŋnedin ne ke na no:
Nee sḛ ma ke tuli, nee ke laar saal!
25 O Bage ɗiŋnedin, má i nde!
O Bage ɗiŋnedin, ho̰ i halla nde!
26 Uwareya ka na ge ne mbo ya dḭl ge Bage ɗiŋnedin ne zi pal!
Ne zok ge Bage ɗiŋnedin ne zi ya, i uware aŋ!
27 Bage ɗiŋnedin a Dok ne ɗu kikit,
a na zen kwaya̰l nee pal ne!
Wá me ɓase ma buwal zi ne gaar ma aŋ tok go,
mbo me ɗiŋ twal kḭḭm tuwaleya ma ta ya!
28 Mo mbi Dok ne, mbi uware mo!
Dok ge mbi ne, mbi mbo ka dore mo!
29 Uware me Bage ɗiŋnedin, na sḛ kwaɗa,
ago kwa a̰se ge na ne a ɗiŋnedin!