Bage ɗiŋnedin, mo te dó i uzi kyaɗa ɗaa
44
1 Ne naa ge mbal kaŋ ma ga̰l pe: Fare saareya ge kore vya ma ne.
2 O Dok, i za̰ da ne i togor ma,
i bá ma wa̰ i kaŋ ge mo ne ke zaman ge bama ne go,
dam ge zaŋgal ma zi ya ma.
3 Mo yá̰ pehir ge ɗogle ma uzi, mo ɗū nama suwal mbe go no,
mo ke pehir ge ɗogle ma yál, mo ho̰ mo ɓase ma swaga katɗa no.
4 A be ne nama kasagar ma ta ɗo, a ame suwal no to,
a be ne pool ge nama ne ta ɗo, a ɓó halla no to,
amma da ne pool ne ndaar ge mo, ne kwa a̰se ge mo ne ta,
ago mo laar wa̰ nama wan.
5 O Dok, mo mbi gan ne!
A mo ho̰ Yakub halla ne!
6 Da ne mo ta, i e i naa ge ho̰l ma tit ne go̰r no,
ne dḭl ge mo ne ta, i twacwage nama ge ne ɗage ho̰l i pal ma no.
7 Ago mbi be e mbi jobreya mbi kajamle ma pal to,
a be mbi kasagar ho̰ mbi halla ne to.
8 A mo e i hal i naa ge ho̰l ma ne,
mo ká̰ saaso nama ge ne kwane i ma pal no.
9 Dam ne dam i mbal kaŋ uware Dok,
i siya̰le mo dḭl ɗaɗak. Ɗigliya
10 Go no puy ɗe, mo dó i uzi, mo ka̰ saaso i pal,
mo gá ya be mbal pore dagre ne i asagar ma.
11 Mo e i ya syat i pe so i naa ge ho̰l ma ndwara zḛ,
i gá ya kaŋ paal ge i naa ge ne kwane i ma ne.
12 Mo sot i ya dimma ne gii ge a ne gene na mbo vyanna go,
mo ɓarse i ya se pehir ge ɗogle ma buwal zi.
13 Mo yá mo ɓase ma uzi be ɓol mam,
mo be ɓol a̰me ne nama yé ta to.
14 Mo saŋge i ya kaŋ sáso ge i naa ge gulum pala ma ta,
kaŋ cotɗa ne kaŋ maam ge naa ge ne ve i se ma ta.
15 Mo e i ya pehir ge ɗogle ma ga ke fare sḭ ne i,
naa gá ya pisigi pala i pe go.
16 Dam ma mwaɗak mbi gá ya kaŋ sáso,
mbi gá ya katɗa saaso zi cugum,
17 ge ndu ge ne cot swaga ma ne ndu ge ne sal swaga tok go,
ge ndu ge ho̰l ma ne ndu ge ne ɓyare gele tene ndwara se.
18 Swaga ge kaŋ mbe ma no pet a ne dé ya i pal no puy ɗe,
i be vyale ne mo to,
i be saŋge mo wak tuli i go̰r to me.
19 I be gwan ne go̰r to,
i be sele uzi ne mo koo pul go to.
20 Mo ró i uzi ge babur pul ge ha̰na ma ne go,
mo e i wat swaga tṵ ge ɗeɗek zi.
21 Te go i vyale Dok ge i ne dḭl,
te go i tyare i tok kaɗe dok ge ɗogle ma,
22 mo Dok, mo te ya kwa,
ne jo̰ mo kwa kaŋ ge ɗimil ge ne naa dulwak zi ma kwa.
23 Da ne mo pe, naa hun i no dam ne dam,
a ndil i no dimma ne gii ge a ne gene na swaga vyanna go go no.
24 kore digi! Bageyal, mo te fí dam gyana ɗaa?
Kore digi! Saŋge i mo go̰r dedet to!
25 Mo te cigi mo ndwara uzi ne i ta gyana ɗaa?
Mo te vyale i yál ma ne i tiiɗiya ma gyana ɗaa?
26 Ago i gá ya burmiya suwar zi,
i pul ma gá ya kubiya suwar zi.
27 Ɗage digi, mbá i!
Zu i ne kwa a̰se ge mo ne pe!