MAKTUB GE AZI
(42—72)
Dimma ne nii ge mam njuwal ne wan na go
42
1 Ne naa ge mbal kaŋ ma ga̰l pe: Fare saareya ge Kore vya ma ne.
2 Dimma ne nii ge mam njuwal ne wan na ne ɓyare mam pe go,
O Dok, mbi ɓyare mo pe go no me.
3 Mbi da ne ene ge Dok ne, ge Dok ge ndwara ne,
Ma del mbi dḛ ba mbo na zok zi, na ndwara se ya ɗaa?
4 Ɗaal ne gyala mbi gá njot mbi miim,
Naa gá ele mbi wak dam ne dam go: «Mo Dok mbe ya da ɗaa?»
5 Amma mbi dwat da ne swaga ge mbi ne ka mbo zok ge Dok ne zi ɓase ma pala zḛ,
puwaleya ma zi, ne uwareya ma zi, ne vḛso kerra zi.
6 Mbi duur te iyal gyana tiliŋ ɗaa?
Mbi te iigi tene gyana ɗaa?
A golgo mbi kan mbi saareya Dok pal.
Mbi mbo gwan uware na, ne na máya pe.
7 O Dok ge mbi ne, ge mbi sḛ iya tiliŋ ɗe,
mbi mbo ka dwat ne mo ne suwal ge ne maŋgaɗam Urdun wak ne ya,
ne njal Hermon pala digi ya, ne njal Miseyar ya me.
8 Mo e mam so̰o̰l pul tunna,
sḭḭl ma ka inna ya ta pe,
a ka sululi ya mbi pal,
a somɗe mbi ya se ya.
9 Gyala, ya̰ Bage ɗiŋnedin na ŋgay mbi kwa a̰se ge na ne,
ɗaal, mbi mbo ka mbal kaŋ uware na,
ne kaɗe Dok ge ne é mbi kat ne ndwara.
10 Mbi mbo jan Dok, njal ge mbi ne go:
«Mo te vyale mbi gyana ɗaa?
Mo te ya̰ mbi mborra kḭḭmi zi,
mbi naa ge ho̰l ma ba ka ke mbi yál go gyana ɗaa?»
11 Mbi sḛ su ya leɗet,
mbi naa ge ho̰l ma sal mbi dam ne dam go:
«Mo Dok mbe ya da ɗaa?»
12 Mbi duur te iyal gyana tiliŋ ɗaa?
Mbi te iigi tene gyana ɗaa?
A golgo mbi kan mbi saareya Dok pal.
Mbi mbo gwan uware na, a mbi bage máya ne, a mbi Dok ne!