Ndu dasana dam ma sore
39
1 Ne naa ge mbal kaŋ ma ga̰l pe: Ge Yedutuna ne. Kaŋ mballa ge Dawda ne.
2 Mbi jya̰ tene go: «Mbi mbo koy mbi wak,
na kaage mbi ke sone to.
Mbi mbo kan arjam mbi wak zi
swaga ge ndu ge sone ne kat mbi ta go.»
3 Mbi zane, mbi ka wak ɗamal,
mbi tele tene be ge jan fare ge kwaɗa,
go no puy ɗe, yál ge mbi ne ka gwan don zḛ.
4 Mbi ka ɓol iigiya mbi zi,
mbi dulwak abe til mbi dimma ne ol go,
a go no mbi ɗage sot fare janna no:
5 O Bage ɗiŋnedin, ŋgay mbi mbi dam pe aya.
Dam ma ge mbi ne mbya kerra suwar pal gyana ga ɗaa?
Go no mbi ba kwar taŋgay ge mbi ne.
6 Ndi, dam ge mo ne ho̰ mbi ma fiyal dimma ne tok pul go baŋ.
Dam ge mbi ne ma mo ndwara se a be a̰me pe ne to,
ndu dasana ge ne ndwara no, a saam ne baŋ. Ɗigliya.
7 Ndu dasana mbo, ka gwan’a dimma ne gḭḭl go,
iigi tene baŋ yak!
Kote kaŋ gan ma, amma kwa ndu ge ne mbo abe nama to.
8 O Bageyal, mbi ká̰ mbi saareya ma wuɗi pal ɗaa?
Mbi kan mbi saareya ma mo pal!
9 Zu mbi ne mbi sone ma go pet!
Ya̰ naa ge bernde ma man mbi to!
10 Mbi kat wak ɗamal, mbi hage mbi wak jan fare to,
ne da pe, a mo sḛ, mo ke kaŋ mbe ne.
11 Abe mo yál ne mbi ta uzi,
mbi su ya go mo tok go, ne yál ge mo ne ke mbi pe.
12 Mo mḛre ndu dasana ne ya̰l ge na sḛ ne ke pe.
Mo zam na kaŋ ge na laar ne wa̰ na ma uzi dimma ne ɗay go.
Ndu dasana saam ne baŋ. Ɗigliya
13 O Bage ɗiŋnedin, za̰ mbi kaɗeya,
só mo togor za̰ mbi fyaso,
ke gisil mbi ta to,
mo ndwara se,
mbi dimma ne ndu ge gwasal go,
ne ndu ge ne ka mbay go,
dimma ne mbi bá ma go.
14 Cigi mo ndwara ne mbi pal uzi,
ne da pe, mbi ba o̰y nde,
go no, mbi ba ɗage mborra ne ndwara dedet gale.