Bage ɗiŋnedin, a mo hé mbi pala digi ne
30
1 Kaŋ mballa, kaŋ mballa ne hage zok ge mbegeya wak pe, ge Dawda ne.
2 Bage ɗiŋnedin, mbi dore mo,
ago, mo hé mbi pala digi ne,
mo be ya̰ mbi naa ge ho̰l ma man mbi to.
3 Bage ɗiŋnedin Dok ge mbi ne, mbi tó mo,
mo zo̰ mbi no.
4 O Bage ɗiŋnedin, mo gwa̰ ne mbi ne táál ge siya ma ne se ya digi,
ne tuul se ya, mo gwa̰ ne mbi ya kat ne ndwara ne.
5 Siya̰le me Bage ɗiŋnedin,
aŋ na naa ge ɗeŋger ma!
Uware me na, dwa me mbegeya ge na ne pal.
6 Ago laar ol ge na ne vate uzi avun cap,
amma na kwaɗa kerra a ɗiŋnedin.
Kadɗa fyaso ma ya go gasamal ɗe,
cya̰wak, laar saal ya go.
7 Swaga ge mbi ne ka halas ɗe, mbi ka jan go:
«A̰me ge syal mbi koo to.»
8 Bage ɗiŋnedin, pe kerra ge mo ne zi,
mo ɗū mbi njal pe se.
Amma mo cigi mo ndwara ne mbi ta uzi,
vo wa̰ mbi.
9 O Bage ɗiŋnedin, mbi tó mo!
Mbi Bageyal, mbi kaɗe mo, mo kwa mbi a̰se!
10 Kadɗa mbi su ya, kadɗa mbi det ya táál ge siya ma ne se ya,
mo ɓol ma kaŋ mam ɗaa?
Kuci uware mo uware ɗaa?
Wan fareba ge mo ne pe zum wan ɗaa?
11 Bage ɗiŋnedin za̰ mbi, kwa mbi a̰se!
Bage ɗiŋnedin sya mbi ko̰r!
12 Mo e mbi kḭḭmi ne laar saal,
mo fage mbi ba̰r kḭḭmi ma ne mbi ta uzi,
mo ka̰ mbi ba̰r vḛso ma no.
13 Ne pe no, mbi mbo ka siya̰le mo,
mbi mbo kat wak ɗamal to bat.
O Bage ɗiŋnedin Dok ge mbi ne, mbi mbo ka uware mo ɗaɗak.