Kaɗeya
5
1 Ne naa ge mbal kaŋ ma ga̰l pe. Kaŋ mballa ge Dawda ne. A ka sun gal na wak go.
2 O Bage ɗiŋnedin, só mo togor za̰ mbi!
Za̰ sun tene ge mbi ne!
3 O gan, Dok ge mbi ne,
za̰ mbi fyaso, sya mbi ko̰r,
mbi kaɗe mo!
4 O Bage ɗiŋnedin, za̰ mbi ka̰l cya̰wak no,
cya̰wak, mbi deŋge tene mo ta,
mbi kat huli da̰reya.
5 Ago mo Dok ge ne za̰ tuli ne ya̰l ne to,
Mo kat swaga ne sone to.
6 Naa ge jegreya ma mḛ mo ndwara se to,
mo kwane naa ge ke ya̰l ma kwane pet.
7 Mo burmi naa ge ne kun hale ma pe uzi.
Bage ɗiŋnedin, mo sen naa ge hun siya ma
ne naa ge mbuɗi naa ma sen.
8 Amma kwar a̰se ge mo ne ge ɓaŋlaŋ zi,
mbi mbo mbo mo zok zi ya.
Ne hormo, mbi mbo mbo gur zok ge mo ne ge mbegeya zi.
9 O Bage ɗiŋnedin, ɗame mbi dosol ge mo zi,
ne mbi naa ge ho̰l ma pe,
ɗaɗe mo viya̰ mbi ndwara zḛ.
10 Ago fare ge fareba ne nama wak zi to,
nama dulwak dwat siya hunna,
nama wak á naa,
nama ɗel gene naa pugiya zi.
11 O Dok, ŋgay go nama naa ge sone ma,
nama dwatɗa ma é nama detɗa.
Ne nama sone ge a ne ke gḛ pe, pu nama pe uzi,
ne da pe a kuri mo wak.
12 Amma pet nama ge ne woy ta ne mo zi ma,
a mbo ka ke laar saal.
A mbo ka suwa̰le digi ne laar saal ɗaɗak,
mo mbo lar sugur nama pal,
nama ge nama laar ne wa̰ mo ma,
a mbo kat ne sḛ fafa̰y mo zi.
13 Ago, mo Bage ɗiŋnedin, mo e mo wak busu ndu ge dosol pal ne,
mo cage na zi ne kwaɗa ge mo ne
dimma ne ndu ne cage tene ne ɓiyaar go.