Gan ge Bage ɗiŋnedin ne mbege na
2
1 Kyaɗa pehir ge ɗogle ma ba ka iigi ta go ɗaa?Kyaɗa a ba ka hun ta farra baŋ go yak ɗaa?
2 Ndi, gan ge ne suwar pal ma ɓan ta ya digi,
ga̰l ma ɓan pe ya digi,
ge Bage ɗiŋnedin ma ne bage na ne naŋge na pal.
3 A jan ta go: «Há me nee nama zul ma,
cigi me nee nama táál uzi ya.»
4 Bage ne ka ne digi zi ya ka man nama,
Bageyal ka cot tene ne nama.
5 Jan nama fare ne laar ol,
pore ge na ne zi, ka e nama ndatɗa.
6 A mbi e mbi gan
mbi njal ge mbegeya, Siyona go ne.
7 Mbi waage aŋ wak honna ge Bage ɗiŋnedin ne,
Jya̰ mbi go: «Mo mbi vya ne!
Ne ma̰ no, mbi mo bá ge tolla ne!
8 Ele mbi, mbi mbo hon mo pehir ge ɗogle ma joo,
mo joo mbo det ɗiŋ dunya pe ndegɗe ya.
9 Mo mbo rot nama ne calaŋ pala walam,
Mo mbo ɓá nama dimma ne naa ne ɓá il go.»
10 Se no, aŋ ge gan ma, ka me naa ge kwa fare ma!
Aŋ ge ne kun sarya ne suwar pal ma, vḭ me yuwaleya!
11 Ke me Bage ɗiŋnedin temel ne vo,
ke me laar saal ne ndatɗa.
12 Komre me vya,
ne da pe, na kaage na saŋge pore ɗo,
na ba̰ aŋ uzi viya̰ zi to.
Ago ame pore avun cap.
Nama ge ne woy ta na zi ma da ne laar saal!