39
1 Mo kwa swaga ge bagɗe ma ne tol bama vya ma ne go kwa’a?Mo kwa gomol ya ne ke twala ɗu’a?
2 A in emel saba gyana ga ɗaa?
Mo kwa nama dam tolla kwa’a?
3 A syal bama koo ma se, a tol bama vya ma ya se,
nama yál tolla á,
4 nama vya ma sirsi, a ka don digi babur go war,
go̰r go, a caɗe ta ne bama ná ma ta, a gwan’a nama ta to.
5 A wuɗi ya̰ kwara ge ful zi ge digi suli ne ɗaa?
A wuɗi fage kwara ge ful zi ge digi ne ɗaa?
6 Mbi ho̰ na swaga katɗa babur pul,
na swaga katɗa a suwar ge yo̰l go.
7 Man ko̰r ge ne ke ne suwal diŋ man,
za̰ ba̰yya ge bage ne mbo ne kwara ne to.
8 An njal ma pala digi ɓyare na zam,
ka ɓyare swaga ge zam twagal ne go.
9 Sáy da ne pool vin ke mo temel ɗaa?
Da ne pool dwam mo kir pal ɗaa?
10 Mo da ne pool kan na táál gar mo gaaso ɗaa?
Da ne pool zwal uwara nṵsi gaaso pul mo pe go baal pul se ɗaa?
11 Ne pool gḛ ge na ne pe, mo da ne pool e jobreya ge mo ne na pal ɗaa?
Mo da ne pool ya̰ temel ge mo ne na pal ɗaa?
12 Mo da ne pool e saareya ge mo ne na pal go,
na mbo in mo swara ma mbo diŋ ɗaa?
13 Gugusu abe na ganwak digi siŋli ge be to,
amma na ganwak saam ma siŋli no puy ɗe,
a be mbyat ne karway saal ne to.
14 Swaga ge gugusu ne ya̰ na fa̰ ma kanna suwar zi ya,
ya̰ suwar zwamleya gá hiɗi nama,
15 vyale go, naa da ne pool ndal nama, a ɓa uzi,
ko kavaar ma da ne pool ɓa nama uzi.
16 Ke na vya ma yál, dimma ne mo jo̰ nama ne be na vya ma ne to go,
dwat ne yál ge na ne za̰ na to.
17 Ago Dok be hon na zwama to,
be hon na fare kwarra to.
18 Amma swaga ge ne nṵsi tene so ta,
man tisi ma ne bage ne dwa ne na pal man baŋ.
19 A mo ho̰ tisi pool ne ɗaa?
A wuɗi e keker donna na ka̰l pal ne ɗaa?
20 A wuɗi e na ganeya dimma ne tere go ne ɗaa?
Na swa̰seya ge ndaar kan vo naa zi.
21 Ge baal pul se, ga gar na koo suwar zi ne laar saal ne pool ge na ne pe,
ka kan ba̰a̰re mbo pore wak zi ya.
22 Na sḛ ndil vo kaŋ cotɗa, sya a̰me vo to bat,
gwan ne go̰r kasagar ndwara zḛ to bat.
23 Swaga ge ne za̰ kajamle kul pul vinna,
swaga ge ne kwa ra̰y, ko deŋso serra,
24 abe gane gane baba saam zi.
Swaga ge tṵ pul ne vin, gwan wan tene to bat.
25 Swaga ge tṵ ne sun, ɗage swa̰seya.
Ne uzi ya kaal, ka hur pore,
ka za̰ garlaŋ pore ma ka̰l, ne suwa̰leya ge pore ne ma.
26 Da ne fare kwarra ge mo ne ta ɗo, gwala ma ɗage ne digi no,
a kan ta ɗageya mbo ndwara mbii no ɗaa?
27 A mo hon boge mo wak ne ɗo, ɗage digi no,
mbo e na vum digi ya kaal no ndit ɗaa?
28 Mbo kat dwamma njal pala digi ya,
ge njal wak zuwa̰l ge ndu ne day ndé na ya to go.
29 Ne digi ya, ka huli na kaŋzam,
ne kaal ya, na ndwara ka kwa kaŋ ma.
30 Na vya ma njot swama,
swaga ge kaŋ suya ma ne go, na sḛ ya go me.