Ayuba dwat yál njotɗa ge na ne
30
1 Ne se no ɗe, mbi gá ya kaŋ maam naa jabso ge mbi ne waɗe nama ne dam ma ta,nama ge mbi dḛ ne ka ndil nama bá ma kaŋ senna,
ge a ne mbya kat mbi gú ma buwal zi koy mbi kavaar ma to ma.
2 Nama ge be pool to mbe ma no,
nama sḛ ma mbar mbi da ne da ɗaa?
3 Ne jo̰ kyamal ma ne a̰se á nama pool ya kakaɗak,
a á babur pul ya bama pul zi po̰yya anna ɓyare kaŋzam,
ge swaga yo̰l ma ne her ma pal.
4 A al momoy ma ne uwara ma pe zi,
a ka al uwara too ma zamma.
5 A ka yan nama ne naa buwal zi uzi,
a ka pot lulu nama pe go dimma ne syala ma go.
6 A ka mbo woy ta wakal hudmul ma zi,
ne njal pṵṵl ma, na tuul ma zi.
7 A ka pot fyaso ne kore ma buwal zi ya,
a ka mbo woy ta ge sugur ge sone ma zi.
8 Bernde ma, naa ge be pala kwaya̰l go to ma,
a yan nama ya ne suwal diŋ uzi ya.
9 Se no, mbi gá ya nama kaŋ e zwak,
a gá ya kat uwara pe da ne mbi.
10 A gá ya be ge gwan kwa mbi bama ndwara go to,
a gá ya abe ta uzi ya ne mbi ta,
a gá sen waktwara mbi pe go.
11 Ne jo̰ Dok kan mbi táál pe ya digi, ho̰ mbi saaso no me,
a gwan wan ta go ŋgeɗo mbi ta to.
12 A ɗage ja ɓase gḛ mbi tok matoson pal fat mbi koo ma,
a her viya̰ ja mborra mbi pal ndwara ban mbi uzi.
13 A ver mbi ya se, ndu ge daage ke viya̰ ge ban mbi uzi,
a ɓyare mbarra ne ndu a̰me ta to.
14 A wat ja mbi ta diŋ ne gulum pṵṵl ya,
a harge ta mborra ya gulum ba̰a̰leya mbe go.
15 Vo wan mbi go,
mbi hormo kwal ya uzi ya dimma ne saam go,
tuli ge mbi ne kale ya uzi ya dimma ne pḭr ne kwal go.
16 Se no, mbi dam ma á go,
mbi á mbi dam ma ya yál njotɗa zi baŋ.
17 Ɗaal zi, mbi za̰ yál ɗiŋ wat mbi kal ma zi,
yál mbe ya̰ mbi viya̰ ge ɗigliya go ŋgeɗo to bat.
18 Dok ɓocome mbi ya zi,
terse mbi ya zi dimma ne ba̰r ka̰l ge gorse go.
19 Dol mbi ya njiyal zi,
mbi gá ya dimma ne kuci ma ne sḭḭm go.
20 Mbi á tene tol mo puy, mo gwan ne mbi vinna to,
mbi gá katɗa puy, mo ndil mbi da ne mo ndwara baŋ.
21 Mo laar saŋge ya ol bibilu mbi pal,
mo á mo pool ja se tyatyat mbi pal.
22 Mo fyage mbi digi dimma ne saam ne fyage kaŋ go,
mo kot mbi ya se.
23 Mbi kwa kwa tyatyat go, mo mbo ne mbi siya zi,
ge swaga ge naa ge ne ndwara ma pet a ne mbo ya go.
24 Amma ndu ge ne mbo siya zi, kaɗe Dok to ɗaa?
Ndu ge ne njot yál, tol swaga go a sya na ko̰r to ɗaa?
25 Mbi be ka fyalla ne naa ge ne njot yál ma pe to ɗaa?
Mbi be ka ɓol tiiɗiya ne naa ge woɗegeya ma pe to ɗaa?
26 Mbi ka jobre ɓol sḛ tuli, amma mbi ɓó wak nonna,
mbi ka saare ɓol kwaya̰l, a tṵ dibi mbi zi ne.
27 Mbi laar gá zet ne zi zet,
dam ma ge yál ma ɓol mbi go.
28 Mbi sḛ piibi ya go, a be gyala piibi mbi ne to,
mbi ɗage digi ɓase ma buwal zi, mbi ka oy fyaso.
29 Mbi gá ya ha̰na ma ná vya,
mbi gá ya gugusu ma kondore.
30 Mbi bol piibi ya pisil muɗud,
mbi duur dolla ol kekeŋ.
31 Mbi biliŋ gá hale sḭ mballa wak go,
mbi gal ga sun sḭ mballa wak go.