Ndu ge ya̰l da ne pool tol Dok ɗaa
27
1 Ayuba gwan he fare, jan go:2 Ne dḭl ge Dok ge ndwara ne, na ge ne ɗuuli dosol ge mbi ne pala se,
ne dḭl ge Bage pool pet ne, na ge ne ho̰ mbi laar pisil,
3 tek ge mbi gale da ne ndwara,
o̰yom ge Dok ne be ndage ne mbi zi to me,
4 mbi guni tene go, mbi mbo ndage fare ge sone janna ne mbi wak zi to,
mbi wak mbo jan fare ge hale to bat.
5 Mbi ne pool vin go, fare ge aŋ ne jan no na fare ge fareba ne to bat.
Ɗiŋ siya, mbi ne pool ya̰ be ge jan go mbi dosol to to.
6 Mbi wa̰ tene ya dosol ge mbi ne zi ndindiŋ,
mbi ne pool kan mbi tok digi to.
mbi dam ma zi, mbi dulwak wan mbi ne fare a̰me ge mbi ne ke pal to.
7 Mbi ndu ge ho̰l ɓó potɗa ge naa ge sone ma ne,
mbi ndu ge huur ɓó potɗa ge naa ya̰l ma ne.
8 Swaga ge Dok ne kun ndu ge sone táál pe digi,
swaga ge ne ndage na o̰yom,
na jobreya gwan kat da pal ɗaa?
9 Swaga ge yál ne det na pal,
Dok za̰ na fyaso za̰ ɗaa?
10 Na sḛ ɓol tuli ya Bage pool pet zi ɗaa?
Ko tol Dok tol ɗaɗak ne na wak zi ɗaa?
11 Mbi hate aŋ kaŋ kerra ge Dok ne ma,
mbi woy aŋ dwatɗa ge Bage pool pet ne to.
12 Aŋ ɗe, aŋ kwa na kwa yaɗat,
kyaɗa aŋ ba ka gwan kare fare ma se baŋ yayak ɗaa?
13 No a kaŋ ge Dok ne koy na ne naa ge sone ma pe ne,
no a joo ge Bage pool pet ne e na ne naa ge ke fare pool ma pe ne.
14 Ko nama vya ma zuli se ceɗed puy ɗe, pore zam nama ne,
nama vya kon ma ɓol kaŋzam ge zamma huriya to.
15 Nama ge ne gá ya ne ndwara ma siya mbo hun nama,
nama kumur ma mbo ɓol viya̰ ge fyal nama to.
16 Ko nama goole bware dimma ne suwar go,
ko nama kote ba̰r ma dimma ne njiyal go puy,
17 a ndu ge dosol mbo gá par ba̰r mbe ma ne,
a ndu ge fare ne na pal to mbo gá abe bware mbe ma ne.
18 Zok ge naa mbe ma ne sin na, a dadale boy ne baŋ,
a dimma ne gur ge ndu ge koy gaaso ne lar na baŋ go.
19 Fi se gan, gale ne be suya to,
swaga ge ne hage na ndwara, a̰me gá to.
20 Vo wan na dimma ne mam ne ame swaga go,
ɗaal zi, kurum mbo ya hé na swaga.
21 Saam ge ne kwal ne kuu ya hé na, mbo ne na,
mbugi na uzi ne na swaga katɗa go.
22 Dok he na na ndwara zḛ dimma ne kaŋ ho̰l go, gwan kwa na a̰se to.
Gá labre so na ndwara zḛ ndwara má tene ne na tok go.
23 Naa gá fol tok na pe go,
naa gá fyage wak swaga ge a ne kwa na swaga katɗa.