Esdras 5

Yuda ma gwan wan temel ge zok ge Dok ne sinna

1 Anabi Haggay ma ne anabi Zakariya ge Iddo vya, a jan Yuda, ge ne suwal Yuda ma ne Ursalima go ma fare ne dḭl ge Dok ge Israyela ne. 2 Zorobabel ge Chaltiyel vya ma ne Juswa ge Yosadak vya a é pe sin zok ge Dok ne ge ne Ursalima go digi, anabi ge Dok ne ma kat nama ziyar go ndwara mbar nama me. 3 Swaga mbe go, Tatnay bage ne dó na ndwara ne suwal ge ne maŋgaɗam Efrat le may ya ma pal, poseya ne Chetar-Boznay ma ne bama kaam ma, a mbo ya jan nama go: «A wuɗi ho̰ aŋ wak ne go aŋ sḭ zok mbe ma ne na gulum ma digi ɗaa? 4 Ho̰ me i naa ge ne sin zok mbe ma dḭl» 5 Amma Dok ge nama ne ndwara ka Yuda ma ga̰l ma pal. A be tele nama be ke temel to, ɗiŋ a teme maktub mbo hon Dariyus, Dariyus gwan ne nama vinna ya ɓya.

A fut Yuda ma pe gan Dariyus ta

6 Maktub ge Tatnay bage ne dó na ndwara ne suwal ge ne maŋgaɗam Efrat le may ya ma pal, ne Chetar-Boznay, ne bama kaam ga̰l ma ge ne Afarsak go ma, nama ge ne maŋgaɗam Efrat le may ya ma, ne teme hon gan Dariyus no. 7 A njaŋge bama maktub mbe zi go:

«Gan Dariyus, ame i wak sanna! 8 I ke gan kwarra go, i mbo suwal Yuda ya, ge zok ge Dok ge ɓaŋlaŋ ne ya. I ɓó go a sin zok mbe ne go da ne njal ge cerra ma, a dol ne go uwara ma zok mbe pala digi. Temel ke ne nama tok go fogor, ke ne go kwaɗa me. 9 I ele nama ga̰l ma go, na wuɗi ho̰ nama wak ne go nama sḭ zok mbe, ne na gulum ma digi ne de. 10 Uwale, i ele nama go, nama ho̰ i naa ge ne sin zok mbe ma dḭl, ne da pe, i ba teme mo naa ge ne nama ndwara zḛ ma dḭl ya njaŋgeya. 11 Za̰ nama fare ge a ne jya̰ i no: ‹I Dok ge ne digi digi ya ma ne suwar dore ma ne, i sin zok ge a ga dḛ ne sḭ na, ke ya del ma kaal, gan ga̰l a̰me ge Israyela ne sḭ na ne, á na no. 12 Amma i bá ma e Dok ge ne digi zi ya laar hotɗa, ɓya̰ nama Nebukadnezar, ge kaldeya, gan ge Babilon ne tok go no, gu zok mbe se no, pá nama mbo Babilon no me. 13 Go no puy ɗe, del ge zḛ ge ge Sirus gan ge Babilon ne ne ame gan go, ho̰ wak no go, a sḭ zok ge Dok ne mbe digi. 14 Uwale, gan Sirus abe kaŋ ge ne ɗeere ne dinar ma ne kaŋ ge ne ɗeere ne fool kaal ma ge gan Nebukadnezar ne abe nama dḛ ne zok ge Dok ne ge ne Ursalima go zi ya ma, mbo ya kanna zok ge na dok ne zi ma ya zum hon Chechbasar, é na ndil suwal no me. 15 Jya̰ na no go: Abe kaŋ mbe ma no, mbo é nama zok ge Dok ne ge ne Ursalima go zi ya, a sḭ zok mbe digi na byalam go me. 16 Chechbasar mbe mbo ya, dó zok ge Dok ne ge ne Ursalima go mbe pe no. Ne swaga mbe ya day ɗiŋ ne se no, a be á zok mbe sinna gale to.› 17 Se no, kadɗa gan vinna, a ɓyare fare mbe pe ge maktub ge gan ge Babilon ma ne zi, ndwara kwar pe go, gan Sirus ho̰ wak ne go, a sḭ zok ge Dok ne ge ne Ursalima go mbe digi de. Go no, gan ba hon i na dwatɗa ya fare mbe pal.»