22
1 Da ne pe no, Dawda jya̰ no go: «Zok ge Bage ɗiŋnedin ne mbo kat go go, twal tuwaleya ge Israyela vya ma ne mbo kat go go me.»
Dawda kote kaŋ ma ne zok ge Bage ɗiŋnedin ne pe sinna
2 Dawda hon wak go, a kote naa ge pe bo ge ne ká ne suwal Israyela go ma ya mwaɗak. É nama ɓá njal ma ne cer njal ma ne zok ge Dok ne pe sinna. 3 Dawda kote walam ma gḛ ge be to ne nṵsi ponde ne zok wak ma pe pella, ne nṵsi walam ge san kaŋ ma pe me, kote fool ŋgirma gḛ ge be ge ndu ne mbyat isi na to, 4 kote uwara sedre ge naa ge suwal Sidon ma ne suwal Tir ma ne ho̰ na ma tabeya njinjik. 5 Dawda jya̰ tene go: «Mbi vya Salomon gale bool, ne kwarra gḛ to, ago zok ge a ne sin ne Bage ɗiŋnedin pe mbya kat siŋli ne hormo waɗe zok ge ne suwar pal ma pet. Ne no pe, a kwaɗa go mbi kote kaŋ ma nṵsiya ne na pe sinna.» A go mbe no ge Dawda ne nṵsi kaŋ ma ne zok sinna pe na siya ndwara zḛ.
Dawda jan Salomon na sḭ zok ge Dok ne
6 Dawda tol na vya Salomon, jan na go, na sḭ zok ge Bage ɗiŋnedin Dok ge Israyela ne. 7 Dawda jya̰ Salomon go: «Mbi vya, mbi é mbi dulwak zi go mbi sin zok ge Bage ɗiŋnedin Dok ge mbi ne ne. 8 Amma Bage ɗiŋnedin jya̰ mbi go: ‹Mo ka̰ swama se gḛ, swaga ge mo ne ka mbal pore ge ɓaŋlaŋ ma go, ne swama ge mo ne ka̰ na mbi ndwara se, suwar se gḛ pe, mo ne pool sin zok ne mbi pe to. 9 Ago mo mbo tol vya son a̰me, mbo kat ndu ge halas, mbi mbo e na kat swaga halas, ge na naa ge ho̰l ma ge a ne vé na se ma buwal zi. A mbo tol na dḭl Salomon, na sḭ go, ge halas. Na zaman go mbi mbo e suwal Israyela kat halas. 10 A na sḛ mbo sin zok ne mbi pe ne. Na sḛ mbo kat dimma ne mbi vya ge tolla go, mbi mbo kat na bá ge tolla me. Mbi mbo ɗur na hool gan pe se, suwal Israyela go ɗiŋnedin›. 11 Se no mbi vya, ya̰ Bage ɗiŋnedin na ka ne mo, na ho̰ mo zam zḛ mo temel kerra ma zi, ne da pe, mo ba sin zok ne Bage ɗiŋnedin Dok ge mo ne pe dimma ne na sḛ ne jya̰ fare mo pal go. 12 Ya̰ Bage ɗiŋnedin na ho̰ mo fare kwarra ne ɗalla swaga ge ne mbo e mo ya hool gan ge Israyela ne pal, ne da pe, mo ba koy na eya ma. 13 Go no, kadɗa mo koy eya ma ge Bage ɗiŋnedin ne ho̰ Israyela vya ma ne Musa ta ma ya, mo ke mborra nama pal me, mo mbo ka zam zḛ mo kaŋ kerra ma zi. Ɗeŋgo wa̰ mo laar, mḛ́ ndiŋ, sya vo to, ya̰ fare a̰me na ndace mo to. 14 Ndi mbi á tene ne kote kaŋ ma ne zok ge Bage ɗiŋnedin ne pe sinna: dinar kilo dudubu ataa, ne fool kaal kilo dudubu tapolɗu, ne fool ŋgirma ma ne walam ma gḛ ge be isiya. Mbi kote uwara ma ne njal ma ya go me, mo mbo gwan abe ya kan pal ta uwale. 15 Naa ge ke temel ma ya mo ziyar go gḛ. Naa ge cer njal ma, ne ge vyan uwara ma, ne naa ge ke temel ge daage hir ma ya go mwaɗak. 16 Mo da ne dinar ma, ne fool kaal ma, ne fool ŋgirma ma, ne walam ma tabeya mo ta go bindik, ho̰ tene ne temel pe kerra, ya̰ Bage ɗiŋnedin na ka poseya ne mo me.»
17 Go̰r go, Dawda jan ga̰l ge Israyela ne ma go, nama e nama tok ya mbar na vya Salomon. 18 Jya̰ nama go: «Bage ɗiŋnedin Dok ge aŋ ne te be dagre ne aŋ to’a? Te be na ho̰ aŋ swaga katɗa ge halas ne to’a? Ne swaga ge na sḛ ne ɓya̰ naa ge ne ka suwal mbe go zaŋgal ma mbi tok go day, suwal mbe ga ya Bage ɗiŋnedin tok go, ne na ɓase ma tok go me. 19 Se no ɗe, aŋ á me ta ne dulwak ɗu, ne aŋ sḛ ma mwaɗak ɓyare Bage ɗiŋnedin Dok ge aŋ ne pe. Wa̰ me ta digi, ne da pe aŋ ba mbo gene sandu wak tuli ge Bage ɗiŋnedin ne ya poseya ne kaŋ ge mbegeya ma mbo ya eya ge zok ge aŋ ne mbo sin na ya ne na pe zi.»