Dawda zwagre sandu wak tuli ya Ursalima diŋ
15
1 Dawda sin tene zok ma ge suwal ge Dawda ne go, nṵsi swaga a̰me ne sandu wak tuli ge Dok ne pe, ɗur gur ndwara é sandu wak tuli zi. 2 Swaga mbe go, Dawda jan go: «A Levi vya ma mbya in sandu wak tuli ge Dok ne ne ɗeŋgo, ago Bage ɗiŋnedin tá nama ne ne in sandu wak tuli pe, ne na temel pe me ɗiŋnedin.»3 Dawda kote Israyela vya ma ya mwaɗak Ursalima go, ndwara mbo zwagre sandu wak tuli ya eya ge swaga ge na ne nṵsi na ne na pe eya go. 4 Dawda kote Aaron vya ma ne Levi vya ma ya: 5 Ne vuwal pe ge Kehat ne go, nama ga̰l Uriyel ne naa na pe go kis para wara azi, 6 Ne vuwal pe ge Merari ne go, nama ga̰l Asaya, ne naa na pe go kikis azi ne para wara azi. 7 Ne vuwal pe ge Gerson ne go, nama ga̰l Juwel, ne naa na pe go kis para tapolɗu, 8 Ne vuwal pe ge Elisafan ne go, nama ga̰l Chemaya, ne naa na pe go kikis azi. 9 Ne vuwal pe ge Hebron ne go, nama ga̰l Eliyel, ne naa na pe go wara tiimal, 10 Ne vuwal pe ge Uziyel ne go, nama ga̰l Amminadab, ne naa na pe go kis para wol para azi.
11 Dawda tol Sadok ma ne Abiyatar naa ge ke tuwaleya ma, poseya ne Uriyel, Asaya, Juwel, Chemaya, Eliyel ne Amminadab ge Levi vya ma, 12 jan nama go: «Aŋ ga̰l ge Levi vya ma ne ma ne, mbege me ta, aŋ ne aŋ ná vya ma, mbo me mbo in sandu wak tuli ge Dok ge Israyela ne ya eya ge swaga ge mbi ne nṵsi na ne na pe eya go. 13 Ago, ge ndwara zaŋgal go, aŋ be kat go to, da ne pe no, Bage ɗiŋnedin Dok ge nee ne mḛre i no, ne da pe, i be ke laar ɓyareya ge Dok ne eya ma pal ne sandu mbe pe inna to.»
14 Naa ge ke tuwaleya ma ne Levi vya ma mbege ta ndwara mbo in sandu wak tuli ge Bage ɗiŋnedin Dok ge Israyela ne ya. 15 Levi vya ma par uwara ma sandu wak tuli tok ma zi, a é na bama ka̰l pal dimma ne Musa ne ho̰ nama na wak go, fare janna ge Bage ɗiŋnedin ne pal.
16 Dawda jan ga̰l ge Levi vya ma ne ma go: «Aŋ tá me aŋ ná vya ge ne kaŋ mballa pe ma, nama ka hale biliŋ ge ka̰l ndaar ma, ne biliŋ ge ka̰l ga̰l ma, ne pot simbala ma. Nama ka mbal kaŋ ne laar saal.» 17 Levi vya ma tal Heman ge Juwel vya ma ne na sele Asaf ge Berekiya vya, ne vuwal ge Merari ne zi, a tal bama sele Etan ge Kuchaya vya. 18 Uwale a gwan tal bama sele ma, naa ge ne nama pe se ma, ge a ne nama ba ɓan ke temel dagre ma. Naa ge koy zok wak ma dḭl no: Zakariya, Ben, Yaaziyel, Chemiramot, Yehiyel, Unni, Eliyab, Benaya, Maaseya, Mattitiya, Elifelehu, Mikneya, Obed-Edom, ne Yeyel. 19 Heman, Asaf, ne Etan, naa ge mbal kaŋ ma, a ka da ne simbal ge ne fool ŋgirma bama tok ne potɗa pe. 20 Zakariya, Aziyel, Chemiramot, Yehiyel, Unni, Eliyab, Maaseya ne Benaya a ka da ne biliŋ ge ka̰l ndaar ma bama tok go haleya. 21 Mattitiya, Elifelehu, Mikneya, Obed-Edom, Yeyel ne Azariya, a ka da ne biliŋ ge taal tiimal bama tok go haleya. 22 Kenaniya, ga̰l ge Levi vya ge a ne ka in sandu wak tuli ma ne, na sḛ dó na ndwara ge sandu inna pal, ne da pe, ka ndu ge ne kwar na temel kerra kwaɗa. 23 Berekiya ma ne Elkana a ka naa ge koy sandu wak tuli ma. 24 Uwale, Obed-Edom ma ne Yehiya a ka naa ge koy sandu wak tuli ma me. Naa ge ke tuwaleya ma, Chebaniya, Yosafat, Nataneel, Amasay, Zakariya, Benaya, ne Eliyezer a ka da ne burci ma bama tok go sunna sandu wak tuli ndwara zḛ.
25 Swaga mbe go, Dawda ma ne ga̰l ge Israyela vya ma ne ma, ne asagar ma ga̰l ma, a kan ta viya̰ go ndwara mbo ɗame sandu wak tuli ge Bage ɗiŋnedin ne, ne Obed-Edom yadiŋ ya ne laar saal. 26 Swaga in sandu wak tuli go, a Dok sḛ ka mbar Levi vya ma ne. A tyare nday pool digli ɓyalar ne gamla ma ɓyalar me hon Bage ɗiŋnedin. 27 Dawda kan ba̰r ge ɓoso lin ge siŋli na ta. Uwale, Levi vya ma ge a ne ka in sandu wak tuli ma, poseya ne naa ge mbal kaŋ ma, ne Kenaniya ga̰l ge naa ge in kaŋ ma ne, naa ge mbal kaŋ ma, a kan ba̰r ɓoso lin ne ma bama ta me. Dawda gwan kan pargalaŋ ge ne ke ne ɓoso lin ne ge naa ge ke tuwaleya ma ne na ta me. 28 Israyela vya ma pet a mbo her sandu wak tuli ge Bage ɗiŋnedin ne ya laar saal ge ɓaŋlaŋ zi, ne tṵ sunna ma, ne burci sunna ma, ne simbal potɗa ma, ne biliŋ ge ka̰l ndaar ma ne ge ka̰l ga̰l ma haleya. 29 Swaga ge sandu wak tuli ge Bage ɗiŋnedin ne ne ka wat ya suwal ge Dawda ne diŋ ɗe, Mikal ge Dawda gwale, ge Sawul vya njole swaga ya fenetre go, kwa Dawda ne ndal kaŋ ne laar saal, Mikal ndil na kaŋ senna.