Achab ɓyare ame suwal Ramot
22
1 Del ataa, Israyela vya ma ne Siriya ma be mbal ta pore to. 2 Del ge ataa go, Yosafat, gan ge Yuda ne mbo ndil gan ge Israyela ne. 3 Gan ge Israyela ne jan na naa go: «Aŋ da kwarra tyatyat go, Ramot ge ne suwal Galaad go, a nee ne ne ya’a? Nee ke a̰me ne go ge gwan ame na ne Siriya ma gan tok go to.» 4 Jan Yosafat go: «Mo ma̰ kat ne viya̰ ge mbo mbal pore ne mbi dagre ame Ramot ge ne suwal Galaad go’a?» Yosafat jan gan ge Israyela ne go: «Mbi ma̰ mbo mbal pore ne mo, mbi naa poseya ne mo naa, mbi tisi ma poseya ne mo tisi ma me.» 5 Uwale, Yosafat gwan jan na go: «Mbi kaɗe mo, ele fare ne Bage ɗiŋnedin ta gale ɓya.»Anabi Mika ma ne anabi ge hale ma
6 Gan ge Israyela ne kote anabi ma ya se naa kikis anda, ele nama go: «Mbi da ne pool mbo det suwal Ramot ge ne Galaad go, ko mbi mbo to’a?» A jan na go: «Mbo, Bageyal ɓyan na ya mo tok go.» 7 Yosafat gwan ele na go: «Anabi a̰me ge Bage ɗiŋnedin ne be ga ne go go ɗu ge nee ba ele na fare to’a?» 8 Gan ge Israyela ne gwan ne Yosafat janna go: «Ndu a̰me ga ya go ɗu, ge nee ba ele Bage ɗiŋnedin fare ne na ta. Amma mbi ɓyare na fare to. Ago waage mbi fare ge kwaɗa to, waage mbi ɗeŋgo fare ge sone. A Mika ge Yimla vya.» Yosafat jan na go: «Kaage mo jan fare ge go to.» 9 Gan ge Israyela ne tol na ajibaŋ a̰me ɗu, jan na go: «Mbo tol mbi Mika ge Yimla vya ya avun cap.» 10 Gan ge Israyela ne poseya ne Yosafat, gan ge Yuda ne, ne bama ba̰r gan ma bama ta, a kat bama hool gan ma pal, a kat tandal viya̰ wak ge suwal Samariya ne go. Anabi ma mwaɗak, a ka waage fare ma nama ndwara se me. 11 Sedekiyas ge Kenaana vya, sol kaŋ kḭḭm ma ne walam, ka janna go: «Bage ɗiŋnedin jan go: ‹Ne kaŋ kḭḭm mbe ma no, mo mbo hun Siriya ma, ɗiŋ mo burmi nama pe›.» 12 Anabi ma mwaɗak, a ka jan mbe go me: «Mbo det suwal Ramot ge ne Galaad go, mo mbo hál na. Bage ɗiŋnedin ɓyan na ya mo tok go.»
Anabi Mika waage detɗa ge Achab ne
13 Swaga ge ndu ge a ne dó na mbo tol Mika ne dé ya Mika ta, jan na go: «Anabi ma ka̰l jan ne ya̰ fare ge ɗu, a jan ne ya fare ge kwaɗa ne gan pe. Mo me, jya̰ dimma ne nama ne jan go, jya̰ fare ge kwaɗa ne gan pe.» 14 Mika jan na go: «Ne dḭl ge Bage ɗiŋnedin, Bage ndwara ne, mbi jan ɗeŋgo fare ge Bage ɗiŋnedin ma̰ jan mbi ya go mbi jya̰.» 15 Swaga ge ne dé ya gan ta, gan ele na go: «Mika, i mbo det suwal Ramot ge ne Galaad go pore, ko i mbo to’a?» Mika jan na go: «Mbo ɗaŋ, mo mbo hál na, Bage ɗiŋnedin ɓyan na ya mo tok go!» 16 Amma gan jan na go: «Mbi é mo guni tene ndwara gyana ga ɗo mo ba jan mbi fare ge fareba ne dḭl ge Bage ɗiŋnedin ne ɗaa!» 17 Mika jan na go: «Mbi kwa Israyela vya ma ɓarseya se sasar njal ma pala digi dimma ne tame ge be bage koyya go. Bage ɗiŋnedin jan go: ‹Naa mbe ma a ne bageyal to. Ago ndu ge daage na gwa̰ na yadiŋ halas zi›.» 18 Gan ge Israyela ne jan Yosafat go: «Mbi te be jan mo to’a? Waage mbi fare ge kwaɗa to, waage mbi ɗeŋgo fare ge sone ma.» 19 Mika gwan jan na go: «A kwaɗa, za̰ fare ge Bage ɗiŋnedin ne jya̰! Mbi kwa Bage ɗiŋnedin katɗa na hool gan pal, na naa ga̰l ge temel ge ne digi digi zi ya ma mḛya na ziyar go, na tok matoson ma ne na tok magul pal. 20 Bage ɗiŋnedin ele swaga go: A wuɗi mbo lase Achab ne go, na mbo det suwal Ramot ge ne Galaad go pore ɗo, na ba su pore zi ɗaa? A ka jan ta fare ta buwal zi. 21 O̰yom a̰me zut ya zum mḛya Bage ɗiŋnedin ndwara se, jan na go: A mbi mbo lase na ne. Bage ɗiŋnedin ele na go: Mo lase na gyana gyana ɗaa? 22 Jan na go: Mbi mbo mbo, mbi mbo par o̰yom ge hale na anabi ma wak zi. Bage ɗiŋnedin jan na go: A fareba, mo mbo lase na, ke na mbe go. 23 Se no, a Bage ɗiŋnedin pá o̰yom ge hale mo anabi mbe ma no mwaɗak wak zi ne, a Bage ɗiŋnedin vḭ tene ne go, yál na dé mo pal.» 24 Sedekiyas ge Kenaana vya mbo ya yar Mika na gasa zi, jan na go: «O̰yom ge Bage ɗiŋnedin ne ndage ne mbi zi ma swaga go ba jan mo fare ɗaa?» 25 Mika jan na go: «Mo mbo kwar na tyatyat dam ge mo ne mbo ɗage ya so zok ma pul zi woy tene go.» 26 Gan ge Israyela ne hon na dore a̰me wak go: «Wa̰ Mika, gene na mbo hon Amon, ga̰l ge suwal ne ma ne mbi vya Yowas. 27 Jya̰ nama go, gan jan go: ‹Dó me ndu mbe no daŋgay zi, aŋ ka hon na kaŋzam ma ne mam ŋgeŋgeɗo, ɗiŋ mbi gwan ne pore zi ya halas ɓya›.» 28 Mika jan na go: «Kadɗa mo gwan ja halas ɗe, a Bage ɗiŋnedin jya̰ mbi fare mbe ne to.» Gwan jan uwale, ɓase ma pet, aŋ za̰ me.
Siya ge gan Achab ne
29 Achab gan ge Israyela ne ma ne Yosafat gan ge Yuda ne, a mbo det suwal Ramot ge ne Galaad go. 30 Gan ge Israyela ne jan Yosafat go: «Mbi er tene mbo pore, mo ɗe, ka̰ mo ba̰r gan ma mo ta.» A go no, gan ge Israyela ne e tene no, a zú pore no me. 31 Gan ge Siriya ne ho̰ na ga̰l ge pus pore ma ne, ge tapolɗu para azi ma na wak go: «Lwage me ta ne asagar ge zaaso ma, ne ge ga̰l ma pe to, e me aŋ haŋgal ɗeŋgo gan ge Israyela ne pal.» 32 Swaga ge ga̰l ge pus pore ma ne ne kwa Yosafat, a jan ta go: «A Israyela ma gan mbe ne!» A ɗage ya na ta mballa. Yosafat tol tew. 33 Swaga ge ga̰l ge pus pore ma ne ma ne kwa go na be gan ge Israyela ne ne to ɗe, a kan bama pala ne na ta uzi. 34 Asagar ge Siriya ne a̰me ɗu mbal na kajamle be ge wan pe to, na kajamle mbe mbo ya mbal gan ge Israyela ne na galam-wak zi, na goŋroŋ pe se. Gan jan na ndu ge ne wa̰ na tisi wak go: «Saŋge mbi pus se, wá mbi ne pore wak zi ya zum, ago mbi ɓol jwaŋ go.» 35 Dam mbe go, pore mbe ká ndaar ge be to, a ya̰ gan mḛya na pus pore digi Siriya ma ndwara zi, ɗiŋ mbo gasamal, gan su. Na swama ga ɓulla na pus pore pul go. 36 Swaga ge gyala ne dḭ, a ka oyya swaga pore go go: «Ndu ge daage na gwa̰ na suwal diŋ ya, ne na yadiŋ ya.» 37 Gan su, a gwan ne na ya suwal Samariya diŋ, a mbul na suwal diŋ. 38 Swaga ge a ne ka usi Achab pus pore ge baal ge Samariya ne wak go, gú ma mbo ya ɗar na swama, naa ge kaya ma ka son ta baal mbe se me, dimma ne fare ge Bage ɗiŋnedin ne jya̰ go. 39 Kaŋ ge Achab ne ke ma, na zok ge ne pé na ne andalam kiya̰r ma, na suwal ge ne sḭ ma, na kaŋ ge ne ke ma pet, a njaŋge nama ya Maktub Maana ge Gan ge Israyela ma ne zi. 40 Achab su na bá ma pe ya, na vya Ahaziya er na byalam hool gan pal.
Yosafat, gan ge Yuda ne
41 Yosafat ge Asa vya ame gan ge suwal Yuda pal swaga ge gan ge Israyela ne ne ke del wol para anda na gan zi go. 42 Yosafat ame gan, da ne del tapolɗu para anuwa̰y, za gan Ursalima go del wara azi para anuwa̰y. Na ná dḭl Azuba, a Chilhi vya ne. 43 He na bá Asa koo-pul go tetem, be ge sele uzi go ŋgeɗo to bat, ka ke kaŋ ge dosol Bage ɗiŋnedin ndwara se. 44 Go no puy ɗe, swaga sḭḭm ma be gul uzi to. Ɓase ma ka mbo ke tuwaleya ne til dukan ma ge swaga sḭḭm mbe ma go. 45 Yosafat ma ne gan ge Israyela ne buwal ka halas. 46 Yosafat kaŋ ge ne ke ma, na pateya ma, ne na pore mballa ma, a njaŋge nama ya Maktub Maana ge Gan ge Yuda ma ne zi. 47 A na á naa ge ne ka ke kaya ne sḭḭm pe, ne zaman ge na bá Asa ne zi ya day ma pe uzi ne.
48 Na zaman go, gan a̰me be kat suwal Edom go to, amma na sḛ é ɗeŋgo ndu ge ndil suwal. 49 Yosafat cer fak ga̰l ge Tarsisa ne ma, ndwara mbo suwal Ofir mbo ɓyare dinar. Amma a day det ya to, ne da pe, fak ga̰l mbe ma ha uzi ge suwal Esiyon-Geber go. 50 Ahaziya ge Achab vya jan Yosafat go: «Ya̰ mbi dore ma poseya ne ge mo ne ma ɓa̰ fak go dagre mborra.» Amma Yosafat kuri uzi bat.
51 Yosafat jyat na bá ma pe ya, a mbul na ge Dawda suwal go. Na vya Yoram zam gan na byalam go.
Ahaziya, gan ge Israyela ne
52 Ahaziya ge Achab vya ame gan ge Israyela go, suwal Samariya diŋ, swaga ge Yosafat, gan ge Yuda ne ne ke del wol para ɓyalar na gan zi go. Ke na gan zi del azi. 53 Ke kaŋ ge sone Bage ɗiŋnedin ndwara se, he koo-pul ge na bá, ma ne na ná, ma ne Yerobowam ge Nebat vya ma ne, nama ge a ne é Israyela vya ma wat sone zi ma. 54 Ka mbo ke uwareya hon Baal, ne mbo gur na koo na ndwara se. E Bage ɗiŋnedin, Dok ge Israyela ne laar hotɗa dimma ne na bá ne ke go me.