1gan Ma 13

Wak vḛneya ge anabi ne ge twal tuwaleya ge Betel ne pal

1 Ndi, ndu ge Dok ne a̰me ɗage ne suwal Yuda ya mbo Betel wak honna ge Bage ɗiŋnedin ne pal. Dé ya swaga ge Yerobowam ne ka mḛya twal tuwaleya pal ndwara til dukan go. 2 Ndage na ka̰l oyya ne wak vḛneya twal tuwaleya pal wak honna ge Bage ɗiŋnedin ne pal, jan go: «O, twal tuwaleya! O, twal tuwaleya! Bage ɗiŋnedin jan go: ‹Vya son a̰me mbo tol ne hir ge Dawda ne zi, a mbo tol na dḭl Yozias, mbo vyan naa ge ke tuwaleya ge swaga sḭḭm mbe ne ma, nama ge a ne til dukan ma mo pal, a mbo til naa dasana ma kal ma mo pal me!›» 3 Hon kaŋ ŋgayya a̰me, jan nama go: «Ne kaŋ ŋgayya mbe no ta aŋ kwa go na Bage ɗiŋnedin jya̰ fare ne. Twal tuwaleya mbo wage se, siim ge kavaar ma num ma ne mbo dasare suwar zi.» 4 Swaga ge gan Yerobowam ne za̰ fare janna ge ndu ge Dok ne ho̰l ne twal tuwaleya ge Betel ne ɗe, ne twal tuwaleya pal ya, tyare na tok, jan go: «Wa̰ me na!» Swaga mbe go, Yerobowam tok ga mwaɗeya, keɗe, day ge gwan ne na ya na ta zi to. 5 Twal tuwaleya wage, siim ge kavaar ma num ma ne dasare suwar zi dimma ne kaŋ ŋgayya ge ndu ge Dok ne ne jya̰ go, wak honna ge Bage ɗiŋnedin ne pal. 6 Swaga mbe go, gan jan ndu ge Dok ne go: «Kaɗe Bage ɗiŋnedin Dok ge mo ne, ne mbi pe, ne da pe, mbi gwa̰ ne mbi tok ya se.» Ndu ge Dok ne kaɗe Bage ɗiŋnedin, gan gwan ne na tok ya se, na tok gwan ne na byalam ge zaŋgal go.

7 Gan jan ndu ge Dok ne go: «Mbo nee mbi yadiŋ, nee mbo zam kaŋzam, mbi ba hon mo bobo me.» 8 Ndu ge Dok ne jan gan go: «Ko mo te ho̰ mbi mo yàl le ɗu puy, mbi wat mo diŋ to. Mbi zam kaŋzam ko njot mam swaga mbe no go to. 9 Ago Bage ɗiŋnedin ho̰ mbi na wak go: ‹Mo mbo zam kaŋzam, ko njot mam swaga mbe go to. Mo mbo gwan he koo pul ge mo ne he na ya swaga gwan di go to›.» 10 Hé viya̰ ge ɗogle gwan di, be ge viya̰ ge na ne he na mbo Betel to.

Ndu ge Dok ne, kuri Bage ɗiŋnedin wak

11 Ndi anabi sabar a̰me ɗu ka suwal Betel diŋ. Na vya ma mbo wan na kaŋ ma pet ge ndu ge Dok ne ne ke suwal Betel go ma̰ no pe, ne fare ma ge ne jya̰ gan. Swaga ge a ne á fare jan bama bá go ɗe, 12 nama bá ele nama go: «Hé ma viya̰ gwanna ɗaa?» Ago na vya ma kwa viya̰ ge ndu ge Dok ne ge ne mbo ne Yuda ya ne he na gwanna. 13 Jan na vya ma go: «Aŋ sá me mbi kwara ya.» A sá na kwara ya, ndwar na pal. 14 Kare ndu ge Dok ne pe ya, mbo ɓol na katɗa baŋre pe zi. Jan na go: «A mo ndu ge Dok ne ge ne mbo ne suwal Yuda ya ne’a?» Vin, jan go: «A mbi ne!» 15 Anabi mbe gwan jan na go: «Mbo nee mbi yadiŋ zam kaŋzam.» 16 Ndu ge Dok ne gwan ne na janna go: «Mbi ne pool mbo poseya ne mo, ko wat mo yadiŋ to. Mbi ne pool zam kaŋzam, ko njot mam dagre ne mo swaga mbe no go go to bat. 17 Ago Bage ɗiŋnedin jya̰ mbi go: ‹Mo mbo zam kaŋzam ko njot mam swaga mbe go to bat, mo mbo gwan he koo pul ge mo ne he na ya swaga gwan di go to.›» 18 Anabi mbe gwan jan na go: «Mbi me, mbi anabi ne dimma ne mo go. Maleka a̰me jya̰ mbi fare, jya̰ mbi ka̰l ge Bage ɗiŋnedin ne, jya̰ mbi go: ‹Mbo gwan ne na ya mo yadiŋ, na za kaŋzam, na njó mam me›.» E no, ka jan fare ge hale. 19 Ndu ge Dok ne gwan’a poseya ne na, zam kaŋzam, ne njot mam na yadiŋ.

Bage ɗiŋnedin e sonne wan ndu ge Dok ne

20 A gale ne swaga zam kaŋzam go, Bage ɗiŋnedin jan anabi ge ne gwa̰ ne ndu ge Dok ya̰ fare, 21 na sḛ tol ndu ge Dok ne ge ne mbo ne Yuda ya, jan na go: «Bage ɗiŋnedin jan go: ‹Ne jo̰ mo kuri wak honna ge Bage ɗiŋnedin ne, mo be koy eya ge Bage ɗiŋnedin, Dok ge mo ne, ge ne ho̰ mo ma to, 22 ne jo̰ mo gwa̰ ya, mo za kaŋzam, ne njot mam ge swaga ge na sḛ ne jya̰ mo go, mo za kaŋzam, ko mo njó mam go to go no, ago mo mbo su, a mbo mbul mo sḛ duur dagre ne mo bá ma to›.» 23 Swaga ge a ne za kaŋzam ne njot mam ɗe, anabi sá kwara ge anabi ge sabar ge ne gwa̰ ne na ya ne, 24 dol tene viya̰ go mborra, sonne ɓol na viya̰ zi, hun na, na siya ga dolla viya̰ go. Kwara gá mḛya na ziyar go le ɗu, sonne mḛ le ɗu me. 25 Naa ge ne kale ma a kwa siya dolla viya̰ go, sonne mḛya na ziyar go me. A mbo jan naa fare mbe ge suwal ge anabi ge sabar mbe ne ya. 26 Swaga ge anabi ge ne gwa̰ ne na ne viya̰ ya mbe ne za̰ fare mbe, jan go: «A ndu ge Dok ne ge ne gwa̰ ne na pala wak honna ge Bage ɗiŋnedin ne pe se to mbe ne. Bage ɗiŋnedin ɓya̰ na sonne wak zi, sonne hṵ na no dimma ne fare ge Bage ɗiŋnedin ne jya̰ na go.» 27 Uwale, jan na vya ma go: «Aŋ sá me mbi kwara ya.» A sá na kwara ya. 28 Ɗage mbo, mbo ɓol ndu mbe dolla viya̰ go, kwara ma ne sonne ne mḛya na ziyar go. Amma sonne be zam ndu mbe to, be hun kwara mbe to me. 29 Anabi ge sabar mbeɗe ndu ge Dok ne duur, dol na kwara pal, gwan ne na yadiŋ. Anabi ge sabar mbe gwan ne na suwal diŋ ya, mbul na, a fyal na. 30 Mbo e na duur taal ge na ne a na ne na sḛ pe zi, a ga mbal sḭ na pal go go:

«Hat mbi ná vya!»

31 Go̰r swaga ge a ne mbu na, jan na vya ma go: «Swaga ge mbi ne mbo su dḛ ya, aŋ mbo e mbi taal mbe zi, aŋ mbo mbul mbi na ziyar go me. 32 Ago fare ma ge na sḛ ne jya̰ na twal tuwaleya ge Betel ne pal, poseya ne fare ma ge na sḛ ne jya̰ na swaga sḭḭm ma ge ne suwal Samariya go ma pal pet, a fareba nama wak mbo wi.»

33 Go̰r mḛreya mbe ma no go puy ɗe, Yerobowam be ya̰ kaŋ kerra ge na ne ge sone ma to, ga dwage tal naa ge ke tuwaleya ma ge swaga sḭḭm ma ne, ne ɓase ma buwal zi. Ago ka hon temel tuwaleya ndu ge na laar ne wa̰ temel tuwaleya, ka e nama swaga sḭḭm ma go. 34 No a kaŋ ge ne e hir ge Yerobowam ne wat sone zi ne, da ne pe no, nama pehir burmi uzi ne suwar pal no.