Dawda ma ne Siba
16
1 Swaga ge Dawda ne kale njal le may ya ɗe, Siba ge Mefibochet dore mbo ya na ndwara zi ne kwara ma azi, yageya ne katugum kikis azi, ne oyo̰r kumar kis, ne fere kumar kis, ne oyo̰r jiya̰l tóól ɗu me. 2 Gan ele Siba go: «Mo ke da ne kaŋ mbe ma ɗaa?» Siba gwan ne na janna go: «Mo vya ma ndwá kwara mbe ma, bool ma wá ta ne katugum ma ne fere kumar mbe ma, naa ge ne lwage ya babur pul go ma ɗele bama dulwak ne oyo̰r jiya̰l me.» 3 Gan ele Siba go: «Mo bageyal vya ya le da ya ɗaa?» Siba gwan ne gan janna go: «Gá ya Ursalima diŋ ya, jan go: ‹Ma̰ no na dam ge Israyela vya ma gwan ne na bá gan hon na ne›.» 4 Gan jan Siba go: «Kaŋ ge Mefibochet ne ma pet, a gá ge mo ne.» Siba gur na koo gan ndwara se, jan na go: «O gan, mbi bageyal, gugu hon mo ne mo ne kwa mbi a̰se pe.»Chimey vḛne na wak Dawda pal
5 Gan Dawda yan’a suwal Bahurim go. Chimey ge Gera vya, ne pehir ge Sawul ne zi, zut ne suwal diŋ ya zum, ka vḛne na wak Dawda pal. 6 Ne jo̰ ɓase ma ne na naa ge mbal pore ma ka na tok matoson ma ne na tok magul pal puy ɗe, ka mbal Dawda ma ne na naa ga̰l ma ne njal. 7 Chimey ka vḛne na wak na pal go: «Mbo uzi ya, mbo uzi ya, ndu ge hun siya, ndu ge bernde. 8 Bage ɗiŋnedin pot mo ya̰l ge mo ne ke ne yàl ge Sawul ne. Mo maŋge Sawul gan, da ne pe no, Bage ɗiŋnedin gwan ne gan mbe hon mo vya Absalom no. Ndi mo ne yál zi no, ago mo ndu ge hun siya ne.» 9 Abichay ge Seruya vya jan gan go: «Gú ge siya mbe no vḛne na wak mbi bageyal gan pal gyana ɗaa? Ya̰ mbi mbo fete na pala uzi.» 10 Gan jan na go: «Seruya vya ma, aŋ te wat ta mbi fare zi gyana ɗaa? Kadɗa na vḛne na wak ɗe, a Bage ɗiŋnedin jya̰ na ne go na vḛne na wak mbi pal. A wuɗi tele na ne go, na ke to ɗaa?» 11 Dawda jan Abichay ma ne ga̰l ge ne na pe go ma pet go: «Mbi vya ge mbi ne tó na ne mbi pul zi sḛ zo ɓyare hun mbi ne, ba kat da ne hir ge Bayami ne mbe no’a! Kadɗa a Bage ɗiŋnedin jya̰ na ne ɗe, ya̰ me na vḛne na wak. 12 Tamekyala Bage ɗiŋnedin mbo kwa mbi a̰se, mbo er wak vḛneya ge na ne ge mbi pal ma̰ mbe no ne wak busu.»
13 Dawda ma ne na naa ma kan ta viya̰ go mborra, Chimey ka mborra na ziyar go njal kiya̰r go, ka gwan vḛne na wak na pal, ka mbal nama ne njal, ka kan kuci digi nama pal ya me. 14 Gan ma ne ɓase ma mwaɗak a det ya tyaneya kakatak Urdun wak go. A gá ɗigli ta.
Gwanna ge Huchay ne Absalom pe ya
15 Absalom poseya ne ɓase ge Israyela vya ma ne ma pet, a wat ya Ursalima diŋ, Ahitofel ka na pe go me. 16 Swaga ge Huchay ge ne hir ge Arkiya ma ne zi, ge Dawda kondore ne dé ya Absalom ta, jan na go: «O gan! O gan!» 17 Absalom jan Huchay go: «No a kwa a̰se ge mo ne ŋgay mo kondore ta ne no’a? Mo te mbo mo kondore pe ya to gyana ɗaa?» 18 Huchay gwan ne na janna go: «To! Mbi ya ndu ge Bage ɗiŋnedin ma ne ɓase ge Israyela vya ma ne pet ne tá na pe go, mbi kat da ne na. 19 Uwale, mbi gwan ke temel hon wuɗi ɗaa? Te be hon na vya to’a? Dimma ne mbi ne ke temel hon mo bá go, mbi mbo ke temel hon mo go no me.»
Absalom ma ne gan Dawda gwale ma
20 Absalom jan Ahitofel go: «Ɓó me ta ndil kaŋ ge nee ba mbo kerra!» 21 Ahitofel gwan ne Absalom janna go: «Mbo ɓan ne mo bá gwale ge wanna digi ge ne ya̰ nama koy yàl ma, go mbe no, swaga ge Israyela vya ma pet a ma̰ za̰ ya go mo hat tene ya seŋgre mo bá ta ɗe, naa ge ne mo pe go ma ma̰ vwal bama pul digi.» 22 A lar gur ge gan zok pala digi ne Absalom pe. Absalom ɓan ne na bá gwale mbe ma ge Israyela vya ma ndwara go pet. 23 Fare yuwaleya ge Ahitofel ne ge dam mbe go ka dimma ne fare ge Dok ne go. Ago Ahitofel yuwaleya ma ka go mbe no Dawda ta, ko ne Absalom ta me.