2samiyel 14

Gwanna ge Absalom ne ya Ursalima go

1 Yowab ge Seruya vya kwa go gan dulwak ne Absalom pal to. 2 Tol gwale a̰me ge zwama ne suwal Tekowa ya, jan na go: «Wa̰ kḭḭmi, mo kan kasigir ma mo ta, ɗusi tene ne kaŋ ge hur tuli ma to. Ke tene dimma ne gwale ge ne wan kḭḭmi ya kaal go. 3 Go mbe no, mo ba mbo ɓol gan, mo ba jan na fare ge mbi ma̰ yuwale mo ya.» Yowab yuwale na ge na ba mbo jan gan. 4 Gwale ge suwal Tekowa mbe mbo ɓol gan, gur na koo na ndwara se, jan na go: «O gan, sya mbi ko̰r!» 5 Gan ele na go: «A ma fare ɓó mo ne!» Na sḛ gwan ne na janna go: «Mbi obe su go, mbi gá ne go kumur. 6 Mbi ka da ne vya sonmo ma azi. Ge ful zi ya, a ɓó gool ta buwal zi no, ndu be kat ge wan nama uzi to, ge ɗu hṵ na kon no. 7 Naa ge ne i vuwal pe go ma ɗage mbi ta no pet go, mbi ho̰ bama na, bama ba hun na ne na ne hṵ na ná vya pe. Bama ba̰ na ge ne mbya zam joo uzi. Swaga ke go mbe no, a ɓyare ban na ge ne gá ne mbi pe ɗu kikit uzi. A ɓyare burmi mbi obe dḭl ne suwar pal go uzi.» 8 Gan jan gwale mbe go: «Mbo di. Mbi ma̰ hon wak ne mo pe.» 9 Gwale mbe jan gan go: «O gan, mbi bageyal, sone mbe na ka i ne mbi hir ma pal, na ka mo pal, ko mo muluk pal to.» 10 Gan jan na go: «Kadɗa ndu a̰me jan mo fare ya, gene na ya mbi ta. Na sḛ mbo gwan ke mo fare a̰me ne go̰r go tá to bat.» 11 Gwale gwan jan na go: «Ya̰ gan guni tene ne dḭl ge Bage ɗiŋnedin Dok ge na ne go, ndu ge ne mbya gele mbi vya, na gwan hun mbi vya ge ne gá ɗu kikit ne mbi pe uzi to.» Gan jan na go: «Ne dḭl ge Bage ɗiŋnedin ne, mo vya pala susu go ɗu puy mbo det suwar zi to.»

12 Gwale mbe gwan jan gan go: «Gan, mbi bageyal, ho̰ mbi viya̰ jan mo fare a̰me ta ɗu!» Gan jan na go: «Jya̰ mo fare!» 13 Gwale mbe jan go: «Mo te ke fare ge go mbe ɓase ge Dok ne ma pal gyana ɗaa? Ne fare ge mo ne jya̰ no ɗe, mo ke ya̰l, ne mo ne yá̰ ndu ge mo ne ya̰ na kat mbay ne zum ya be ge gwan ne na ya suwal diŋ to pe. 14 Nee pet nee su su, a dimma ne mam ne kan suwar zi ndu ne day gwan abe na digi to go. Dok gwan ɗage ne ndu ge su ya digi to, amma ɓyare go ndu ge ne mbo kat mbay uzi ya, na ka uzi ya kaal tata ne na to. 15 Kadɗa mbi mbo ya jan gan fare mbe ma no ɗe, ago naa ho̰ mbi vo. Mbi jya̰ tene no go, mbi ma̰ jan gan fare mbe ma ya ɗe, na sḛ ma̰ ke fare janna ge mbi ne pal. 16 Gan ma̰ za̰ mbi, ma̰ zur i ne mbi vya ne ndu ge ne ɓyare hun i ne joo ge Dok ne go uzi. 17 Mbi jya̰ go: Fare janna ge mbi bageyal gan ne iyal naa laar. Ago mbi bageyal gan a dimma ne maleka ge Dok ne go, kwa varse kwaɗa ma ne sone buwal kwa. Bage ɗiŋnedin Dok ge mo ne, na ka poseya ne mo.»

18 Gan jan gwale mbe go: «Mbi ɓyare ele mo fare, woy mbi a̰me to.» Gwale mbe jan na go: «Bageyal, gan, jya̰ mo fare!» 19 Gan jan na go: «Yowab ne fare mbe zi to ɗaa?» Gwale gwan ne na janna go: «Ne jo̰ mbi bageyal gan da ne ndwara, ndu ne pool lase mo ne fare to. A mo dore Yowab ho̰ mbi wak ne, pá fare mbe ma mbi wak zi ne. 20 A ndwara er fare ma, mo dore Yowab ke fare mbe no. Amma mbi bageyal a zwama dimma ne maleka ge Dok ne go, kwa kaŋ ge ne ke ne suwar pal ma kwa pet.»

21 Gan jan Yowab go: «Mbi vin’a ke dimma ne mo ne ɓyare go. Mbo gwan ne Absalom ya.» 22 Yowab gur na koo suwar pal gan ndwara se, gwan ne gugu hon na, jan na go: «Mo dore kwa ma̰ ya go go, mbi dé mo ndwara zi kwaɗa, ne jo̰, mbi bageyal gan ke fare janna ge mbi ne pal.»

23 Yowab mbo suwal Gechur ya, gwan ne Absalom ya Ursalima go. 24 Amma gan jan go: «Na gwa̰ na ya, na mbo ya na ndwara go to.» Go no, Absalom mbo ne na ya, gwan mbo ya gan ndwara go to.

Dawda pore Absalom

25 Ge suwal Israyela go pet, ndu a̰me ge dore ge a ne dore na dimma ne Absalom go to: ne na koo se ɗiŋ mbo na pala digi, a ɓol sáso a̰me na ta to. 26 Ka sot na pala del zi ndwara ɗu, ago na pala susu ka ke na dṵṵl. Na pala susu dṵṵl ka waɗe kilo azi go, ŋgayya ge gan ne. 27 Absalom tó vya sonmo ma ataa ne vya gwale ɗu. Na vya gwale mbe dḭl Tamar, ka kale ge be to.

28 Absalom kat Ursalima diŋ, ɗiŋ del azi be ge kwa gan ndwara. 29 Absalom é temel tol Yowab, na ba dol na mbo gan ta. Yowab kuri be mbo ya na ta. Gwan é temel ge ndwara azi, go no puy ɗe, Yowab kuri. 30 Absalom jan na dore ma go: «Yowab gaaso ge gḛme ge fogor ne ya mbi ziyar go gwa, mbo me dun na ol.» Absalom dore ma dun gaaso mbe ol. 31 Se se no, Yowab ɗage mbo ɓol Absalom na diŋ, ele na go: «Mo dore ma te dṵ mbi gaaso ol gyana ɗaa?» 32 Absalom gwan ne Yowab janna go: «Mbi é temel tol mo go mo mbo ya, mo kuri no. Mbi ɓyare dol mo mbo gan ta, mo mbo jan na go: ‹Mbi gwa̰ ne suwal Gechur ya da ne da pe ɗaa? A kwaɗa ge mbi kat te ya gale. Se no, mbi ɓyare mbo ɓol gan, kadɗa mbi ke sone a̰me ya go, na hṵ mbi uzi.›» 33 Yowab mbo ɓol gan, wan na fare mbe ma pe. Gan e temel tol Absalom, Absalom mbo ya na ta, gur na koo na ndwara se, gan abe na na sḛ zi.