Dawda saŋge gan ge Israyela ne pet
5
1 Pehir ge muluk ge Israyela ne ma pet, a mbo ya Dawda ta suwal Hebron go, a jan na go: «I mo hir ma ne, i mo duur ma ne. 2 Zaŋgal, swaga ge Sawul ne ka gan i pal ɗe, a mo ka dol tene naa ge mbal pore ge Israyela ne ma ndwara zḛ ke pore ne. Swaga mbe go, Bage ɗiŋnedin jya̰ mo go: ‹A mo mbo ɗame Israyela vya ma ne›.» 3 Ga̰l ge Israyela ne ma mwaɗak, a mbo ya gan Dawda ta suwal Hebron go. Dawda ke wak tuli ne nama Bage ɗiŋnedin ndwara se ge Hebron go. A naŋge Dawda num ndwara e na gan ge Israyela ne.4 Swaga ge Dawda ne ame gan go, ka da ne del tapolɗu, ke na gan zi del wara anda. 5 Suwal Hebron go, ka gan Yuda pal del ɓyalar ne saba myanaŋgal, Ursalima go, ka gan suwal Israyela ma ne Yuda pal pet del tapolɗu para ataa.
Dawda ame suwal Ursalima
6 Gan Dawda ma ne na naa ma mbo det suwal Ursalima. Yebus ma, naa ge suwal ma jan Dawda go: «Mo ɓol pool ge watɗa i suwal diŋ to. Ɓaal ma ne giɗi ma baba puy, a ma̰ tele mo zum ya.» A ndwara janna go, Dawda ne pool watɗa suwal diŋ to. 7 Amma Dawda ame gulum ga̰l ge Siyona ne. A na ge a ne gá tol na Suwal ge Dawda ne. 8 Dam mbe go, Dawda jan go: «Kadɗa ndu a̰me ɓyare mbo det Yebus ma ɗe, na dé nama da ne tuul ge ne sor mam ne suwar pe se go. Amma giɗi ma ne ɓaal mbe ma mbi laar ɓyare nama to.» Da ne pe no, a jan no go: «Ɓaal ma ne giɗi ma wat zok ge Dok ne zi to.» 9 Dawda gá katɗa gulum ga̰l mbe zi, hon na dḭl suwal ge Dawda ne. Dawda gwan sin kaŋ ma ne swaga torra ge Millo ne ya ɗiŋ det ya na yàl go. 10 Dawda ka gwan hat pool waɗeya, Bage ɗiŋnedin Dok ge naa ge mbal pore ma ne kat poseya ne na me.
11 Hiram gan ge suwal Tir ne, teme naa ya ɓol Dawda, ne uwara sedre ma, ne naa ge vyan uwara ma, ne naa ge cer njal ɗalla ma ndwara mbo ya sin na zok. 12 Dawda kwa go, na Bage ɗiŋnedin ɗu na gan pe se suwal Israyela pal ne, na he na muluk digi da ne na ɓase Israyela vya ma pe.
Dawda vya ge ne tó Ursalima go ma
13 Swaga ge Dawda ne ɗage ne Hebron ya gwan san gwale ma, ne wan gwale ma digi suwal Ursalima go. Gwan tol vya sonmo ma ne ge zaab ma. 14 Dawda vya ge ne tó Ursalima go ma dḭl ma no: Chammwa, Chobab, Natan, Salomon, 15 Yibar, Elichwa, Nefeg, Yafya, 16 Elichama, Elyada ne Elifelet.
Halla ge Dawda ne Filistiya ma pal
17 Swaga ge Filistiya ma ne za̰ go, a é Dawda ya gan suwal Israyela pal ɗe, a ɗage ya mwaɗak ndwara mbo ya det na pore. Swaga ge Dawda ne za̰ fare mbe, kan na pala mbo woy tene gulum ga̰l zi. 18 Filistiya ma yan’a, a kan ya baal pul ge Refayim ne se. 19 Dawda ele Bage ɗiŋnedin go: «Mbi da ne pool mbo det Filistiya ma ɗaa? Mo ma̰ ɓyan nama mbi tok go’a?» Bage ɗiŋnedin jan na go: «Mbo, mbi ma̰ ɓyan nama mo tok go.» 20 Dawda mbo ya Baal-Perasim go, hal nama swaga mbe go. Jan go: «Bage ɗiŋnedin há mbi naa ge ho̰l ma mbi ndwara zḛ dimma ne mam ne hal hub tok go ne.» Da ne pe no, a ho̰ swaga mbe dḭl no Baal-Perasima. 21 Filistiya ma ya̰ bama kaŋ sḭḭm ma swaga mbe go, Dawda ma ne na naa ma abe nama.
22 Uwale, Filistiya ma gwan ɗage pore ya, a kan ta ya baal pul ge Refayim ne se. 23 Dawda ele Bage ɗiŋnedin fare, Bage ɗiŋnedin gwan ne na janna go: «Mbo nama ndwara zi ya to, saŋge tene ne nama go̰r ya, mo ma̰ terse nama ya murum ge uwara murier ma ne zi. 24 Swaga ge mo ma̰ za̰ ko̰r ge koo ne ya uwara pala leŋge digi ya ɗe, há tene ya digi, ago a Bage ɗiŋnedin sḛ mbo mo ndwara zḛ ya mbal pore ne ndwara hal Filistiya ma.» 25 Dawda ke dimma ne Bage ɗiŋnedin ne ho̰ na wak go, hál Filistiya ma, ne Geba ya ɗiŋ mbo Gezer ya.