Filistiya ma tele Dawda be ge mbo mbal pore ne bama dagre
29
1 Filistiya ma kote bama naa ma ya mwaɗak Afek go, Israyela ma me, a kote ta ya mam so̰o̰l ge Jizreel ne wak go gwa me. 2 Filistiya ma asagar ma ga̰l ge naa kis ma ne, ne ge naa dubu ma a ka mborra zḛ, Dawda ma ne na naa ma a kat ne nama go̰r ya poseya ne Akis me. 3 Filistiya ma ga̰l ma ele go: «Ibriniya mbe ma wuɗi ma ne ɗaa?» Akis gwan ne Filistiya ma ga̰l ma fare janna go: «A Dawda ge Sawul, gan ge Israyela ne dore ne. Ya mbi ta, ke ya kaal nde, del ɗu ko azi go. Ne swaga ge ne ya̰ na bageyal day, ɗiŋ ma̰ no, mbi be kwa a̰me ge sone ne na ta to.»4 Amma ga̰l ge Filistiya ma ne ma laar hot Akis ta, a jan na go: «Yá̰ ndu mbe na gwa̰ mbo na suwal ge mo ne e na kat na go ya, be ke kwaɗa ge na sḛ mbo mbal pore ne nee to, ago swaga pore mballa zi, da ne pool saŋge tene nee naa ge ho̰l ma pe ya. A ma kaŋ mbo é na saŋge ndu ge kwaɗa na bageyal ge zaŋgal ndwara zi ne ɗaa? Te be swaga ge na sḛ ne hun nee naa hon na go to’a? 5 Te va Dawda ge a ne ka mbal gagso ne na dḭl go:
Sawul hṵ naa dudubu ma
Dawda hṵ naa dudubu ma wol, ne to’a?»
6 Akis tol Dawda ya, jan na go: «Ne dḭl ge Bage ɗiŋnedin ge ne ndwara ne, mo ndu ge dosol ne, mbi ɓyare go nee ne mo mbo mbal pore dagre, ne da pe ɗiŋ ma̰ no, mbi be kwa mo kaŋ kerra a̰me ge sone to bat. Amma ga̰l ge Filistiya ma ne ma a ɓyare mo to. 7 Se no, gwa̰ mbo mo swaga katɗa ya ne halas, na kaage mo gwan ke a̰me ge sone ge é Filistiya ma ga̰l ma laar hotɗa to.» 8 Dawda jan Akis go: «Mbi ke da ɗaa? Mo ɓo ma fare ge sone ne mbi ta ne swaga ge mbi ne mbo ya go day diŋ ma̰ no ge go mbi ba mbo mbal mo naa ge ho̰l ma pore to ɗaa?» 9 Akis gwan ne Dawda janna go: «Mbi kwa kwa, mbi laar wa̰ mo wan dimma ne temeya ge Dok ne go, amma ga̰l ge Filistiya ma ne ma a jan go, na kaage mo mbo mbal pore ne bama dagre to. 10 Kwap cya̰wak vḛ aŋ ne mo naa ma, aŋ gwa̰ mbo aŋ swaga ge mbi ne é aŋ katɗa na go ya, tek ge swaga ma̰ ben na pe ja, mbo me.»
11 Dam ge kwap ge go, cya̰wak vḛ Dawda ma ne na naa ma a gwan mbo Filistiya ma suwal ya. Filistiya ma me, a mbo suwal Jizreel ya me.