1samiyel 6

Gwanna ge sandu wak tuli ne ya suwal Israyela go

1 Sandu wak tuli ge Bage ɗiŋnedin ne ke Filistiya ma tok go saba ɓyalar. 2 Go no a tol bama naa ge ke tuwaleya ma ne bama naa ge é waɗal ma ya se, a ele nama go: I ke ne sandu wak tuli ge Bage ɗiŋnedin ne gyana ɗaa? Ŋgay me i, i ke ne na gyana ge i ba gwan ne na mbo na suwal ya ɗaa? 3 Naa ge ke tuwaleya ge Filistiya ma ne ma ne naa ge é waɗal ma a jan bama naa go: Kadɗa aŋ gwan da ne sandu wak tuli ge Dok ge Israyela ne ɗe, kaage aŋ gwan ne na pul bàŋ to, aŋ gwa̰ ne na ne kaŋ tuwaleya ma ge ne pore ta pe ma. Kadɗa aŋ ɓol zonna ya, aŋ mbo kwa go na Bage ɗiŋnedin é yál mbe aŋ pal ne.

4 A ele nama go: I ke ma kaŋ tuwaleya pe hon na ɗaa? Nama sḛ ma jan go: Ɗeere me dir ge moy pe zamma ne ma ɗu ɗu anuwa̰y ne dinar, ne fóy ma ɗu ɗu anuwa̰y ne dinar me, isiya ga̰l ge Filistiya ma ne ma pal. Ago moy mbogom ge ɗu ge mbe iya aŋ ne aŋ ga̰l ma ne mwaɗak. 5 Ɗeere me dir ge moy ge pe zamma ne, ne dir ge fóy ge ne burmi aŋ suwal ne ma. Ho̰ me Dok ge Israyela ne ga̰l, tamekyala na laar ba iyal se, aŋ ba ɓol fogeya, aŋ ne aŋ dok ma, ne aŋ suwal me. 6 Kyaɗa aŋ ba ka togre aŋ dulwak ma, dimma ca ne Faraon ma ne naa ge Masar ma ne togre bama dulwak ma go ɗaa? Amma swaga ge Dok ne e yál ma nama pal, a te be ya̰ Israyela vya ma mborra to ɗaa? 7 Se no vya̰ me pus ge giya̰l, wá̰ me nday ná ge nama vya ma gale ne nama pe go, ge a ne do nama jug to ma azi, do me nama jug nama zwa pus mbe, abe me nama vya ma ne nama pe go gwanna ya ɗyagarta zi. 8 He me sandu wak tuli ge Bage ɗiŋnedin ne, è me na pus mbe go, abe me kaŋ ge aŋ ne ɗeere nama ne dinar mbe ma, ka̰ me nama ge sandu a̰me zi, è me na sandu wak tuli ziyar go, ya̰ me nday mbe ma mborra. 9 Ndi me nama, kadɗa a he viya̰ ya mbo suwal Israyela, viya̰ ge mbo Bet-Chemes ya, ago, a Dok ge Israyela ne é yál ge ɓaŋlaŋ mbe no nee pal ne, amma kadɗa go to, a be Dok ge Israyela ne é yál mbe nee pal ne to, yál mbe mbo ya nee pal bàŋ ɗar.

10 Naa mbe ma ke go tem. A wan nday ná ge ne vya bama pe go ma azi, a é nama zwal pus mbe, a dibi nama vya ma zok zi. 11 A é sandu wak tuli ge Bage ɗiŋnedin ne pus mbe go, a è sandu ge a ne ka̰ fóy ge a ne ɗeere nama ne dinar, ma ne dir ge nama pe zamma ma ne mbe ma pus mbe go me. 12 Nday mbe ma he viya̰ ge mbo Bet-Chemes temel tat, ne fyaso bama ndwara zḛ, a sele tok magul ko tok matoson pal to bat. Ga̰l ge Filistiya ma ne ma a kare nama pe ɗiŋ mbo warbe ge suwal Bet-Chemes ne ya.

13 Swaga mbe go, naa ge ne suwal Bet-Chemes go ma, a ne sal gḛme ne baal pul se, swaga ge a ne ka̰ bama ndwara kwar sandu wak tuli, a ke laar saal gḛ ge be to. 14 Nday mbe ma mbo ne pus mbe ya Juswa, ndu ge suwal Bet-Chemes ne gaaso zi. Ge gaaso mbe zi, njal ga̰l dó ya go. A ɓá pus mbe uwara ma se, a tyare nday mbe ma tuwaleya ge tilla uzi hon Bage ɗiŋnedin. 15 Levi vya ma he sandu wak tuli ge Bage ɗiŋnedin ne poseya ne sandu ge a ne ka̰ kaŋ ge a ne ɗeere nama ne dinar ma zi mbe ma ya se, a é nama njal mbe pala digi. Dam mbe go, naa ge suwal Bet-Chemes ma tyare tuwaleya ge tilla uzi ma, ne bobo ma hon Bage ɗiŋnedin. 16 Dam mbe go uwale, swaga ge ga̰l ge anuwa̰y ge Filistiya ma ne ma ne kwa kaŋ mbe ma no, a gwan mbo Ekron ya.

17 Dir ge moy pe zamma ne ma ge Filistiya ma ne ɗeere nama ne dinar hon Bage ɗiŋnedin ndwara pore bama sone ma isiya no: ɗu ne suwal Asdod pe, ɗu ne suwal Gaza pe, ɗu ne suwal Askalon pe, ɗu ne suwal Gat pe, ɗu ne suwal Ekron pe me. 18 A ho̰ fóy ge a ne ɗeere nama ne dinar ma isiya ge suwal ge Filistiya ma ga̰l ge anuwa̰y ma pal, ndwara go, suwal ge ne vé ne gulum ga̰l ma ne suwal ge jyale ma pal. Nama suwal warbe mbo ɗiŋ ŋgoy ga̰l ge a ne é sandu wak tuli na pal ya, na ge ne Juswa ndu ge suwal Bet-Chemes ne gaaso zi ta ya. 19 Bage ɗiŋnedin mḛre naa ge suwal Bet-Chemes ma, ne nama ne ndi sandu wak tuli pul pe. Hun naa wara ɓyalar ne naa dudubu wara anuwa̰y ma buwal zi. Naa ge Bet-Chemes ma wan kḭḭmi ne Bage ɗiŋnedin ne hṵ bama naa pe. 20 A jan go: A wuɗi mbya mḛ Bage ɗiŋnedin, Dok ge mbegeya mbe no ndwara se ne ɗaa? Kadɗa na mbe go ɗe, nee ḭ sandu wak tuli mbe mbo é wuɗi ya ɗaa? 21 A dol temel mbo naa ge suwal Kiryat-yeharim ma pal ya, jan nama go: Filistiya ma gwan ne sandu wak tuli ge Bage ɗiŋnedin ne ja, mbo me ya her na.