Naa Ge Kun Sarya Ma 20

Israyela vya ge may ma abe pore hir ge Bayami ne ma pal

1 Israyela vya ma pet a kote ta ya digi dimma ne ndu ge ɗu go ge Mispa go, Bage ɗiŋnedin ndwara se. A mbo ne swaga ma ya pet, ne suwal Dan ya ɗiŋ mbo Bercheba ya, ne suwal Galaad ya me. 2 Ga̰l ma ne naa ge ne pehir ge Israyela ne ma zi ma mwaɗak a kote ya pala ɓanna ge Israyela vya ma ne mbe go. Pet naa ge ne mbya mbal pore ma naa dudubu kikis anda. 3 Naa ge ne pehir ge Bayami ne zi ma za̰ go Israyela vya ge may ma kote ya Mispa ya.

Israyela vya ma jan go: «Wa̰ me i fare pe gale, sone mbe pe mbo ya gyana ɗaa?» 4 Levi vya, ndu ge a ne hṵ na gwale mbe jan go: «I ne mbi gwale mbo dwam suwal Gibeya ge Bayami vya ma ne go. 5 Naa ga̰l ge ne suwal Gibeya diŋ ma ɗage ya, a ve yàl ge mbi ne ka na diŋ se ɗaal zi no. A ɓyare hun mbi sḛ, a gá wan mbi gwale mbo fi ne na no, ɗiŋ su no. 6 A go no, mbi he mbi gwale no, mbi pó na se no, mbi teme na suwal Israyela go no pet, ago a ke kaŋ ge seŋgre, fare ge daal ge suwal Israyela go. 7 Israyela vya ma, aŋ ya se pet, za̰ me ta, vḭ me ta fare a̰me ɗu pal!»

8 Ɓase ma pet a abe digi dimma ne ndu ge ɗu go, a jan go: «Ndu a̰me ɗu na gwa̰ mbo na diŋ ya to, ndu a̰me ɗu na gwa̰ mbo di to. 9 Kaŋ ge nee ba mbo kerra suwal Gibeya go no: Nee uusi baare nee ba mbo det na, 10 nee tá ne pehir ge Israyela ne ge daage zi naa wol ne kis zi, naa kis ne dubu zi, naa dubu ne dudubu wol zi, nama ba mbo ɓyare kaŋzam ne ɓase ma pe, nama ge a ne mbo ke suwal Gibeya ge Bayami ne yál mbyatɗa ge nama fare dale ge a ne ke suwal Israyela go pe.» 11 Go no, Israyela vya ma pet a kote ta ya digi dimma ne ndu ge ɗu go mbo det suwal Gibeya.

12 Pehir ge Israyela ne ge may ma dol temel mbo jan pehir ge Bayami ne ma pet go: «Aŋ te ke ma ya̰l hir ge go mbe pe aŋ buwal zi ɗaa? 13 Ne se no, ho̰ me i naa ge a ne ke fare mbe ma, naa ge bernde ge ne Gibeya go mbe ma ya zum, i hṵ nama uzi, i ndage sone ne suwal Israyela pal uzi.» Amma Bayami vya ma kuri, a vin fare ge bama ná vya Israyela vya ma ne to.

14 Bayami vya ma kote ta ne bama swaga ma ya pet suwal Gibeya go, ndwara det Israyela vya ge may ma pore. 15 Dam mbe go, a isi Bayami vya ge ne mbo ne swaga ma ya pet, a ɓol naa dudubu wara azi para myanaŋgal, be ge isi naa ge Gibeya ma to. A ka naa kikis ɓyalar, naa ge tok mbal kaŋ vagal ma mwaɗak. 16 Ne naa mbe ma buwal zi, naa kikis ɓyalar a ka magul, naa ge tok darap ma, nama ge a ne bama ŋgoo fyageya ma. kadɗa a saare pala susu puy nama tok wat se to. 17 A isi Israyela vya ge may ma me, a ɓol naa dudubu kikis anda, naa ge ne kwa pore mballa ma pet. 18 Israyela vya ma mbo suwal Betel ya, mbo ele fare ne Dok ta, a ele na go: «A pehir ge daage ne i buwal zi dol tene zḛ mbo det Bayami vya ma ne ɗaa.» Bage ɗiŋnedin jan nama go: «A pehir ge Yuda ne mbo zḛ ne!»

19 Israyela vya ma ɗage digi cya̰wak, a mbo kat suwal Gibeya ndwara ya. 20 Israyela vya ma zut mbo mbal pore ne Bayami vya ma, a nṵsi ta syareya Gibeya ndwara zi. 21 Bayami vya ma zut ne Gibeya diŋ ya zum, a hun Israyela vya ma naa dudubu wara azi para azi dam mbe go. 22 Naa ge Israyela ne ma gwan sal bama pul ya digi, a gwan’a mḛya swaga ge a ne mḛ dam ge zḛ ge mbe go. 23 Israyela mbo fyal Bage ɗiŋnedin ndwara se ɗiŋ mbo gasamal. A ele na go: «I da ne pool gwan mbo det i ná vya Bayami vya ma iya ɗaa?» Bage ɗiŋnedin jan nama go: «Mbo me.» 24 Israyela vya ma gwan’a mḛya Bayami vya ma ndwara zi dam ge azi go. 25 Dam ge azi mbe go uwale, Bayami vya ma zut ne suwal Gibeya diŋ ya, a hun Israyela vya ma naa dudubu wol para tiimal, pet naa ge ne kwa pore mballa ma. 26 Israyela vya ma pet a gwan mbo suwal Betel ya. Dam mbe go, a wan asiyam, a fyal Bage ɗiŋnedin ndwara se ɗiŋ mbo gasamal, a tyare tuwaleya ge tilla uzi ma, ne tuwaleya ge ba̰a̰n ne ma me hon Bage ɗiŋnedin. 27 A ele Bage ɗiŋnedin fare. Ago sandu wak tuli ge Dok ne ka dam mbe ma zi ya swaga mbe go. 28 Dam mbe ma zi ya uwale, a Pineyas ge Eleyazar vya, Aaron baŋ ka bage tuwaleya sandu wak tuli wak go ne. A jan go: «I da ne pool gwan mbo det i ná vya Bayami vya ma iya, ko i ya̰ baŋ ɗaa?» Bage ɗiŋnedin jan nama go: «Mbo me, mbi kwap ɓyan nama aŋ tok go.»

29 Israyela vya ma e naa huliya suwal Gibeya go̰r zum. 30 Israyela vya ma mbo det Bayami vya ma dam ge ataa go, a syare pore mḛya suwal Gibeya ndwara zi dimma ne ge ndwara zaŋgal ma go. 31 Bayami vya ma zut ya nama ndwara zum, a ya̰ ta laseya mbo uzi ya kaal ne suwal. A ɗage hun naa ne ge ndwara zaŋgal ma go, a hun naa mbo kaŋ ge tapolɗu go ge ful zi, viya̰ ge ne mbo suwal Betel ya go, ne viya̰ ge ne mbo suwal Gibeya ya go me. 32 A ka dwatɗa go bama ma̰ gwan hun nama dimma ne ge ndwara zaŋgal ma go. Amma Israyela vya ma za̰ ta go bama so uzi ya, bama lase nama mbo ful zi ya, uzi ya kaal ne suwal. 33 Israyela vya ma ɗage ne bama swaga ma go, a mbo mḛ Baal-Tamar ya. Naa ge a ne ka huliya ma ɗage ne bama swaga huliya ge ne babur pul ge Geba ne se ya digi. 34 Naa dudubu wol ge Israyela vya ma ne tá nama ne bama buwal zi ma mbo ya suwal Gibeya ndwara go. Pore mbe ka ndaar ge be to. Ago Bayami vya ma be kwa go bama ma̰ ɓol yál to. 35 Dam mbe go, Bage ɗiŋnedin hál Bayami vya ma Israyela vya ma ndwara zḛ, a hun nama naa ge mbal pore ma naa dudubu wara azi para anuwa̰y para kis.

36 Bayami vya ma kwa bama halla, Israyela vya ma ya̰ Bayami vya ma swaga, ne da pe, a ka isi bama naa ge ne ka huliya ne Gibeya ya ma pal. 37 Naa ge ne ka huliya ma ɗage ya digi avun cap, a ame Gibeya, a hun naa ge ne suwal diŋ ma uzi mwaɗak. 38 Israyela vya ma ne naa ge ne ka huli swaga ma za̰ ta go, swaga ge nama ne watɗa suwal diŋ ya ɗe, nama ndugi ol swama digi 39 Israyela vya ma saŋge ta ya se nama ndwara zi. Swaga ge Israyela vya ma ne ka tit ne go̰r pore mballa zi go ɗe, Bayami vya ma hṵ nama naa tapolɗu go. A ka jan ta go, bama ma̰ gwan hal nama dimma ne ge ndwara zaŋgal go. 40 Swaga mbe go, ol swama ɗage ndugi digi suwal pal go, Bayami vya ma saŋge ta se ndil swaga bama go̰r go, a kwa ol ame suwal se mwaɗak 41 Israyela vya ma saŋge ya se nama pal, Bayami vya ma sḛ wan vo, a kwa go fare ɓol bama ya go. 42 A syat bama pe so Israyela vya ma ndwara zḛ, mbo ful pul zi ya. Naa ge ne suwal diŋ ya ma e tok ya nama ndwara zi hunna, a ver nama bama tuŋsi zi, a ɓol viya̰ ge ɓurra to. 43 Israyela vya ma ver Bayami vya ma se, a yan nama pe, a bwat nama pe Gibeya ndwara le ge ham ge go. 44 Bayami vya ma naa dudubu wol para tiimal su, pet naa ge pateya ma. 45 Ne naa ge ne sya mbo ful pul zi ma le ge njal Rimmon ne ya ma, a hun naa viya̰ zi dudubu anuwa̰y, a yan naa ge may ma pe diŋ mbo Gidom ya, a gwan hun naa ta dudubu azi. 46 Bayami vya ma ge a ne su dam mbe go ma mwaɗak, a ka naa dudubu wara azi para anuwa̰y, pet naa ge pateya ma. 47 Naa dudubu kikis myanaŋgal syat bama pe so mbo ful pul zi ya, le njal Rimmon ya, a ga katɗa swaga mbe go ɗiŋ saba anda. 48 Israyela vya ma gwan’a det Bayami vya ma, a hun naa sonmo, ne kavaar ma, ne kaŋ ge daage pet ge a ne ɓol na bama ndwara zḛ ne suwal diŋ uzi mwaɗak. A til suwal ge nama ne ma ge a ne ɓó nama bama ndwara zḛ ma uzi mwaɗak.