Naa Ge Kun Sarya Ma 11

Yafta saŋge bage kun sarya suwal Israyela go

1 Yafta, ndu ge suwal Galaad ne ka ndu ge pateya, na sḛ ka gwale kaya vya. A Galaad tó na ne. 2 Galaad gwale ge sanna tol na vya ma. Swaga ge na vya ma ne há ga̰l, a yan Yafta ne bama buwal zi, a jan na go: «Mo zam joo ge i bá ne to, mo gwale kaya vya ne.» 3 Yafta sya na bá vya ma ndwara zḛ, mbo kat suwal Tob ya. Naa ge be a̰me pe to ma ɓan ta ne Yafta, a ka mbo det naa pore mballa.

4 Dam ma kwaɗa lwak go̰r go ɗe, Ammon vya ma ka mbo det Israyela vya ma pore. 5 Ne jo̰ Ammon vya ma, ka mbal pore ne Israyela ɗe, ga̰l ge Galaad ne ma mbo ɓyare Yafta pe ne suwal Tob ya. 6 A jan na go: «Mbo ya, mḛ i ndwara zḛ, nee ba mbo mbal pore ne Ammon vya ma.» 7 Yafta gwan ne ga̰l ge Galaad ne ma janna go: «Aŋ te va kuri mbi ne, aŋ ya̰ mbi ne mbi bá yadiŋ ya no to’a? Aŋ gale det yál zi ɓya, aŋ ba ɗage gwan’a ɓyare mbi pe ɗaa?» 8 Ga̰l ge Galaad ne ma gwan ne Yafta janna go: «Da ne pe no, i gwa̰ ya mo ta no, ne da pe, mo gwa̰ ya, nee mbo me mbal Ammon vya ma pore. Ka i, ne naa ge ne Galaad go ma pet ndwara zḛ.» 9 Yafta jan ga̰l ge Galaad ne ma go: «Kadɗa aŋ gwan ne mbi ya mbal pore ne Ammon vya ma, kadɗa Bage ɗiŋnedin ɓyan nama ya mbi tok go, a mbi kat aŋ pal ne.» 10 Ga̰l ge Galaad ne ma jan Yafta go: «Bage ɗiŋnedin za̰ fare ge nee ne jan ta ya go, i mbo ke dimma ne mo ne jya̰ go.» 11 Yafta mbo ne ga̰l ge Galaad ma ne. Ɓase ma e na bama ndwara zḛ, kat nama garlaŋ. Yafta gwan dwage fare ge na ne jya̰ ga̰l ge Galaad ma Bage ɗiŋnedin ndwara se Mispa go.

Fare ge Yafta ne jya̰ Ammon vya ma

12 Yafta teme naa mbo ɓol gan ge Ammon vya ma ne, jan na go: «A ma fare ne nee ne mo buwal zi ne, mo ba mbo ya det mbi suwal pore mballa ɗaa?» 13 Gan ge Ammon vya ma ne jan naa ge Yafta ne teme nama ma go: «Swaga ge Israyela vya ma ne ɗage ne suwal Masar ya, a ame mbi suwal ne mam arnon wak go ɗiŋ mbo mam Yabbok wak ya, ɗiŋ mbo maŋgaɗam Urdun wak ya. Se no, gwa̰ ne mbi na ya digi be gool.»

14 Yafta gwan teme naa mbo ɓol gan ge Ammon vya ma ne, 15 ne fare janna go: «Israyela vya ma be ame Mowab ma ne Ammon vya ma suwal ma to. 16 Ago, swaga ge Israyela vya ma ne ɗage ne suwal Masar ya, a he viya̰ ful pul zi ɗiŋ mbo ya maŋgaɗam ge teer ne wak go, a dé ya Kades go no. 17 Ne swaga mbe go, Israyela vya ma teme naa mbo jan gan ge Edom ne go: ‹Ya̰ i kaleya mo suwal go nde.› Amma gan ge Edom ne be vin to bat. A gwan teme naa mbo ɓol gan ge Mowab ma ne no, na sḛ puy be vin to me. A go no, Israyela ma gá katɗa Kades go no. 18 Go̰r go, a he viya̰ ful pul zi ya, cole suwal Edom ma ne Mowab, a dé suwal Mowab le ge ham ge ya no. A mbo ɗur bama swaga katɗa ge mam Arnon le may ya, a be wat suwal Mowab zi to. Ago mam Arnon a warbe ge suwal Mowab ne ne. 19 Israyela vya ma gwan teme naa mbo ɓol Sihon gan ge Amoriya ma ne, na ge ne ka suwal Hechbon go no, a jya̰ na no go: ‹Ya̰ i kaleya mo suwal go, ɗiŋ mbo i swaga katɗa ya nde.› 20 Amma Sihon be vin ya̰ i kaleya to, kote na asagar ma ya no pet, a mbo goɗe katɗa Yahas go no, ndwara det i, Israyela vya ma. 21 Bage ɗiŋnedin, Dok ge Israyela ne, ɓya̰ Sihon ma ne na ɓase ma pet Israyela vya ma tok go, a há nama no. Israyela vya ma ame suwal ge Amoriya ma ne ka go ma no pet. 22 A ame suwal ge Amoriya ma ne pet, ne mam Arnon wak go ɗiŋ mbo mam Yabbok wak ya, ne ful pul zi ya ɗiŋ mbo det maŋgaɗam Urdun wak se ya. 23 A Bage ɗiŋnedin, Dok ge Israyela ne, yá̰ Amoriya ma na ɓase Israyela vya ma ndwara zḛ ne, a mo sḛ ɓyare ame suwal mbe ma ne i tok go ne ɗaa? 24 Mo te be kat ya suwal ge mo dok Kemos ne ho̰ mo na go mo ka na go to’a? I sḛ ma ne pool kat suwal ge Bage ɗiŋnedin Dok ge i ne, ne ho̰ i na go, i ka na go to ɗaa? 25 Mo waɗe Balak ge Sippor vya, gan ge Mowab ne waɗe ne kwaɗa ɗaa? Na sḛ be ke gool ne Israyela vya ma to, be det nama to me. 26 Ndi del ma no kikis ataa ge Israyela vya ma ne ka ne suwal Hechbon ma ne na suwal lew ma, ne suwal Aroyer ma ne na suwal lew ma, ne suwal ge ne mam Arnon wak go ma go pet: Aŋ te ame nama dam mbe ma zi ya to kyaɗa ɗaa? 27 A be mbi ke mo ya̰l ne to, a mo ke mbi sone ne, mo mbal pore ne mbi no. Bage ɗiŋnedin bage ne kun sarya, na kṵ i ge Israyela ma ne aŋ ge Ammon ma buwal ma̰ no!» 28 Amma gan ge Ammon ma ne za̰ fare ge Yafta ne teme naa ya janna to bat.

Wak tuli ge Yafta ne ke

29 O̰yom ge Bage ɗiŋnedin wat Yafta zi, Yafta kale mbo suwal Galaad ma ne suwal ge Manasa ne ya, kale mbo Mispa ge Galaad ne ya. Ne Mispa ge Galaad ne go, kale ɗiŋ mbo Ammon ma suwal ya. 30 Yafta ke wak tuli Bage ɗiŋnedin ndwara se go: «Kadɗa mo ɓyan Ammon ma ya mwaɗak mbi tok go, 31 kaŋ ge ne mbo wat ja mbi ndwara zum zaŋgal ne mbi diŋ ya kun mbi, mbi mbo mbege na ne mo ge Bage ɗiŋnedin pe, mbi mbo tyare na tuwaleya ge tilla uzi hon mo, swaga ge mbi ne mbo ɗageya gwanna ne swaga hal Ammon ma ya go.»

32 Yafta ɗage mbo det Ammon ma pore, Bage ɗiŋnedin ɓyan nama na tok go. 33 Hál nama halla ge ɓaŋlaŋ, ame nama suwal ma wara azi, ne Aroyer go ɗiŋ mbo Minit ya, kale ɗiŋ det Abel-Keramim ya. Israyela vya ma gwan ne Ammon ma pala se.

34 Swaga ge Yafta ne ka gwanna ya na diŋ, suwal Mispa go ɗe, ndi, na vya ge gwale zut ya na ndwara zum kun na ne gaŋga, ne kaŋ ndalla. Ago a na vya mbe ne ɗu kikit, be gwan tol vya ge ɗogle to. 35 Swaga ge na ndwara ne ka̰ ne na ɗe, taabe na ba̰r ne na ta uzi, jan go: «Aya! Mbi vya, mo hun mbi go, mo ya nama ge ne iigi mbi ma buwal zi! Mbi ke wak tuli Bage ɗiŋnedin ndwara se, mbi ne pool gwan ne go̰r to.» 36 Na vya gwan ne na janna go: «Báá, kadɗa mo ke wak tuli Bage ɗiŋnedin ndwara se, ke ne mbi kaŋ ge mo laar ne ɓyare dimma ne mo ne ke wak tuli go, ne jo̰ Bage ɗiŋnedin e mo ja gele tene ne mo naa ge ho̰l, Ammon ma.» 37 Na sḛ gwan jan na bá go: «Ho̰ mbi saba azi, i ne mbi koŋkale ma mbo njal pala digi, mbo fyal pul tub ge mbi ne.» 38 Yafta ya̰ na viya̰, mbo ke ya saba azi. A ne na koŋkale ma mbo njal pala digi ya mbo fyal na pul tub mbe. 39 Swaga ge saba azi ne mbya ɗe, gwan’a na bá ta, na sḛ wi wak tuli ge na ne ke na pal. Na sḛ be kwa ndu son to, da ne pe no, ne swaga mbe ya day, a njaŋge eya mbe ge suwal Israyela go no go: 40 Del ge daage zi, Israyela ma vya kale ma ka mbo ke vḛso ge Yafta ndu ge suwal Galaad ne vya ne dam anda.